O Ile a Buisana le Liithuti-’moho le Eena ka Tumelo ea Hae

NA U ka rata ho thusa liithuti-’moho le uena ho utloisisa hamolemo tumelo ea hao e thehiloeng Bibeleng? Magdalena, e leng seithuti se lilemo li 18 sekolong se phahameng Poland, o atisa ho buisana le liithuti-’moho le eena ka tumelo ea hae kaha ke e mong oa Lipaki Tsa Jehova. Ka lebaka lena, o atisa ho botsoa lipotso tse kang e reng, ‘Ho bolela’ng ho ba e mong oa Lipaki Tsa Jehova?’ le e reng, ‘Na ha le lumele ho Jesu Kreste?’ O ne a ka khona ho thusa liithuti-’moho le eena joang? Magdalena o ile a rapela Jehova hore a mo tataise ’me a etsa se tumellanong le lithapelo tsa hae.—Jakobo 1:5.

Ka letsatsi le leng, Magdalena o ile a kōpa tichere e ’ngoe e hlomphang tumelo ea hae hore na ebe a ka bontša tlelase video ea Jehovah’s Witnesses—The Organization Behind the Name.a Tichere eo e ile ea lumela. Magdalena a ntan’o bolella liithuti-’moho le eena: “Ke kōpile motsoalle e mong oa ka hore a buisane le tlelase ka metsotso e 90. O tla le bontša le video le ho buisana le lōna ka Lipaki Tsa Jehova. Na le tla rata ho ba teng?” Bohle ba ile ba lumela. Magdalena le Wojciech, e leng moevangeli oa nako e tletseng ea nang le phihlelo, ba ile ba qala ho lokisetsa project eo.

Morero e ne e le ho qala nehelano eo ka puo ea metsotso e 20 e thehiloeng bukaneng ea Lipaki Tsa Jehova—Ke Bo-mang? Li Lumela Eng?b ebe ho latela puisano ea lipotso le likarabo. Ka mor’a moo ho ne ho tla bontšoa video ka laebraring ea sekolo. Seithuti se seng le se seng ka tlelaseng se ne se lokela ho fuoa mpho—e leng enfelopo e khōlō e kentseng libukana tse seng kae, buka ea Lipotso Bacha Baa Botsa—Likarabo tse Sebetsang,c le lipampitšana le limakasine.

Letsatsing leo ho fanoang ka nehelano ka lona, ho ne ho e-na le liithuti-’moho le eena tse 14, tichere le bana ba bang ba 4 ba sekolo ba neng ba itletse laebrari feela. Wojciech o ile a qala ka ho hlalosa hore bangoli ba bangata ba Mapolishe ba ngolang lithoko le libuka ba sebelisitse lebitso la Molimo, e leng Jehova. O ile a boela a bua ka likatikisima tse ling tsa khale tsa K’hatholike tse nang le lebitso la Molimo. Ha a hlalosa mosebetsi oo Lipaki Tsa Jehova li o etsang kajeno, o ile a hlahisa libukana tse bontšang liofisi tsa makala a sa tšoaneng le litšoantšo tsa Liholo Tsa Likopano.

Ho ile ha latela puisano e tletseng bophelo. Magdalena le Wojciech ba ile ba arabela lipotso ba sebelisa Bibele. Sena se ile sa khahla bamameli le ho ba kholisa hore Lipaki Tsa Jehova ha li rute maikutlo a tsona. Tse ling tsa lipotso tse ileng tsa botsoa ke life, hona li ile tsa arabeloa joang?

Potso: Bibele e tletse lipolelo tse sa hlakang le mekhabo-puo tse ka hlalosoang ka litsela tse ngata. Motho a ka khona ho phela tumellanong le seo Bibele e se buang joang?

Karabo: Ba bang ba re Bibele e tšoana le vaeoline eo ho eona u ka letsang linoto leha e le life tseo u li ratang. Empa ak’u nahane: Haeba u batla ho utloisisa hore na seo mongoli a se ngotseng se bolela’ng, na ha ho molemo hore u mo botse? Ho fapana le bangoli ba batho ba shoeleng, Mongoli oa Bibele, e leng Jehova Molimo, oa phela. (Baroma 1:20; 1 Bakorinthe 8:5, 6) Taba e potolohileng temana e ka fana ka tlhaloso e nepahetseng. Ho feta moo, Bibele e atisa ho bua ka taba e tšoanang likarolong tse ’maloa, kahoo ho li bapisa ho ka thusa. Ka tsela eo re ka lumella Molimo hore a tataise menahano ea rōna, joalokaha eka ke eena ea re hlalosetsang temana. Na ka tsela eo, re ke ke ra tseba thato ea hae le ho phela tumellanong le eona joalokaha e senotsoe ka Bibeleng?

Potso: Phapang ke efe pakeng tsa Bakreste le Lipaki Tsa Jehova?

Karabo: Re Bakreste! Empa Lipaki Tsa Jehova ha li ipolele feela hore ke Bakreste, ho e-na le hoo li ikitlaelletsa ho phela tumellanong le seo li se lumelang le seo Molimo a li rutang sona molemong oa tsona. (Esaia 48:17, 18) Kaha sohle seo li se rutang se thehiloe Bibeleng, lia tseba hore li tšoere ’nete.—Matheu 7:13, 14, 21-23.

Potso: Ke hobane’ng ha le ea ho batho bao le sa ba tsebeng le bile le phehella ho buisana le bona? Na seo hase ho qobella ba bang ho amohela tumelo ea lōna?

Karabo: Na u nahana hore ho fosahetse ha motho e mong a buisana le uena hantle seterateng a kōpa ho utloa maikutlo a hao ka taba e itseng? (Jeremia 5:1; Sofonia 2:2, 3) (Wojciech le Magdalena ba ntan’o etsa pontšo ea ha ba botsa motho ea iphetelang ka tsela hore na Molimo o tsotella batho ba maqakabetsing a bakiloeng ke sekhohola se sa tsoa ba teng moo Poland.) Ka mor’a hore re utloe seo motho a se nahanang, re mo bontša se ka Bibeleng. Haeba motho eo a sa batle ho bua, re re a tsamaee hantle ebe re itsoella pele. (Matheu 10:11-14) Na seo ke ho qobella ba bang hore ba buisane le rōna? Kapa batho ha ba sa lokela ho buisana?

Potso: Ke hobane’ng ha le sa keteke matsatsi a phomolo?

Karabo: Re keteka ketsahalo e le ’ngoe feela eo Bibele e re laelang hore re e keteke—e leng Sehopotso sa lefu la Jesu Kreste. (1 Bakorinthe 11:23-26) Ha e le ka matsatsi a phomolo teng, le ka iphumanela hore na a qalile hokae ka ho sheba li-encyclopedia le mehloli e meng e tšepahalang. Ha le ka li sheba, le tla hlokomela habonolo feela hore na ke hobane’ng ha re sa keteke liketsahalo tse joalo.—2 Bakorinthe 6:14-18.

Ho ile ha botsoa le lipotso tse ling tse ngata ’me tsa arajoa. Puisano eo e ile ea nka nako e telele hoo ba ileng ba tlameha hore ba chechise ho bapala video.

Liithuti li ile tsa arabela joang? E-re Magdalena a re bolelle: “Ke ile ka makatsoa ke hore liithuti tse ling tse atisang ho etsa lintho tse se nang kelello le ho soma tse ling li ne li botsa lipotso tse utloahalang. Le hoja li ne li re ha li lumele hore Molimo o teng, nakong ea puisano li ile tsa bontša hore li lumela ho Molimo!” Ba bileng teng ba ile ba thabela limpho tseo ba li fuoang—e leng kakaretso ea libuka tse 35, libukana tse 63 le limakasine tse 34 tseo ba ileng ba li sieloa.

Project eo ea sekolo e bile le liphello tse ntle hakaakang! Hase feela hore e ile ea thusa liithuti-’moho le Magdalena ho tseba le ho utloisisa Lipaki Tsa Jehova hamolemo empa e ile ea boela ea khothalletsa bacha ba bangata hore ba nahane ka morero oa bophelo. Ke hobane’ng ha u sa ikitlaelletse ho thusa liithuti-’moho le uena hore li ithute ho eketsehileng ka seo u se lumelang?

[Mongolo o botlaaseng ba leqephe]

[Setšoantšo se leqepheng la 31]

Magdalena le Wojciech ba lokisetsa puisano