Ho Tsamaea Tseleng ea Leseli le Ntseng le Eketseha
“Tsela ea ba lokileng e joaloka leseli le khanyang le ntseng le khanya ka ho eketsehileng ho fihlela motšehare o moholo.”—LIPROVERBIA 4:18.
1, 2. Batho ba Molimo ba bone eng ka lebaka la leseli le eketsehileng le tsoang ho Jehova?
KE MANG ea ka hlalosang hamolemo kamoo ho chaba ha letsatsi ho amang lefifi la bosiu kateng ho feta Jehova Molimo, e leng eena Mohloli oa leseli? (Pesaleme ea 36:9) Molimo o re: ‘Ha mafube a tšoara lipheletso tsa lefatše, a iphetola joaloka letsopa tlas’a tiiso, lintho li ema joalokaha eka li apere.’ (Jobo 38:12-14) Ha khanya ea letsatsi e ntse e eketseha, libōpeho tsa lefatše li hlaka le ho feta, feela joalokaha letsopa le bonolo le fetoha ka mor’a hore ho hatisoe setšoantšo se setempeng sa tiiso ho lona.
2 Jehova e boetse ke Mohloli oa leseli la moea. (Pesaleme ea 43:3) Ha lefatše le ntse le le lefifing le letšo-letšo, Molimo oa ’nete o tsoela pele ho fa batho ba hae leseli. Ka liphello life? Bibele ea araba: “Tsela ea ba lokileng e joaloka leseli le khanyang le ntseng le khanya ka ho eketsehileng ho fihlela motšehare o moholo.” (Liproverbia 4:18) Leseli le ntseng le eketseha le tsoang ho Jehova le tsoela pele ho khantša tsela ea batho ba hae. Le ntlafatsa mokhatlo oa bona o hlophisitsoeng, lithuto tsa bona le boitšoaro ba bona.
Leseli la Moea le Ntlafatsa Mokhatlo o Hlophisitsoeng
3. Ho entsoe tšepiso efe ho Esaia 60:17?
3 Jehova o ile a bua esale pele ka moprofeta Esaia, a re: “Ke tla tlisa khauta ho e-na le koporo, ke tla tlisa silevera ho e-na le tšepe, ’me ke tla tlisa koporo, ho e-na le lehong, ke tlise tšepe, ho e-na le majoe.” (Esaia 60:17) Feela joalokaha ho nkela thepa ea boleng bo tlaase sebaka ka ea boleng bo phahameng ho bontša ntlafatso, Lipaki Tsa Jehova li bone ha ho ntlafatsoa litokisetso tse itseng ka har’a mokhatlo oa tsona o hlophisitsoeng nakong ena ea “qetello ea tsamaiso ea lintho,” kapa ‘matsatsi a ho qetela.’—Matheu 24:3; 2 Timothea 3:1.
4. Ke tokisetso efe e ileng ea qala ho sebetsa ka 1919, hona molemo oa eona e bile ofe?
4 Qalong ea matsatsi a ho qetela, liphutheho tsa Liithuti Tsa Bibele, e leng kamoo Lipaki Tsa Jehova li neng li tsejoa kateng ka nako eo, li ne li khetha baholo le badiakone ka ho ba voutela. Leha ho le joalo, baholo ba bang ba ne ba se na moea oa sebele oa boevangeli. Ba bang ba ne ba se leqe feela ho kopanela mosebetsing oa boboleli empa ba ne ba boetse ba nyahamisa ba bang ho kopanela ho oona. Kahoo, phuthehong ka ’ngoe ka 1919, ho ile ha thehoa boikarabelo bo bocha—e leng ba motsamaisi oa tšebeletso. Motsamaisi oa tšebeletso o ne a sa khethoe ke phutheho, empa ofisi ea lekala ea batho ba Molimo ke eona e neng e mo khetha ka tsela ea puso ea Molimo. Mesebetsi ea motsamaisi ea khethiloeng e ne e akarelletsa ho hlophisa mosebetsi oa boboleli, ho aba masimo le ho khothalletsa ho kopanela tšebeletsong ea tšimo. Lilemo ka mor’a moo, mosebetsi oa ho bolela ka ’Muso o ile oa tšehetsoa ka matla haholo.
5. Ke ntlafatso efe e ileng ea etsoa lilemong tsa bo-1920?
5 Litho tsohle tsa phutheho li ile tsa boela tsa matlafatsoa ke khothatso e reng, “Phatlalatsang, phatlalatsang, phatlalatsang, Morena le ’muso oa hae,” e ileng ea fanoa ka 1922 kopanong ea Liithuti Tsa Bibele e neng e tšoaretsoe Cedar Point, Ohio, U.S.A. Ka 1927 ho ile ha hlophisoa tšebeletso ea tšimo ’me ha khethoa letsatsi la Sontaha e le lona le molemo haholo bakeng sa ho kopanela mosebetsing oa ho bolela ka ntlo le ntlo. Ke hobane’ng ha ho ile ha khethoa letsatsi la Sontaha? Ke hobane letsatsi la Sontaha e ne e le lona letsatsi leo batho ba bangata ba neng ba sa sebetse ka lona. Kajeno Lipaki Tsa Jehova li bontša moea o tšoanang ka ho leka ho etela batho ka nako eo li ka ’nang tsa fumana ba bangata ba le teng malapeng, joaloka mafelo-beke kapa mantsiboea.
6. Ho ile ha amoheloa qeto efe ka 1931, hona e ile ea ama mosebetsi oa ho bolela ka ’Muso joang?
6 Ntho e ileng ea susumetsa ka matla mosebetsi oa ho bolela ka ’Muso e ile ea etsahala ka Sontaha motšehare oa mantsiboea oa la 26 July , 1931, ha qeto e ne e amoheloa pele kopanong ea Columbus, Ohio, U.S.A, ’me hamorao e amoheloa lefatšeng lohle. Karolo ea qeto eo e re: “Re bahlanka ba Jehova Molimo ba laetsoeng ho etsa mosebetsi lebitsong la hae, ’me ka lebaka la ho utloa taelo ea hae ea ho bolela molaetsa oo Jesu Kreste a neng a o bolela, le ho tsebisa batho hore Jehova ke Molimo oa ’nete le ea Matla ’Ohle, ka thabo re amohela lebitso leo molomo oa Morena Molimo o le boletseng ebile re ipitsa ka lona, ’me re lakatsa ho tsejoa le ho bitsoa ka lebitso leo, e leng, Lipaki Tsa Jehova.” (Esaia 43:10) Ka sebele lebitso leo le lecha le ne le hlalosa ka ho hlakileng mosebetsi o ka sehloohong o etsoang ke bohle ba ipitsang ka lona! Ruri Jehova o ne a file bahlanka bohle ba hae mosebetsi oo ba neng ba lokela ho o etsa. Ka kakaretso karabelo e ile ea e-ba matla haholo!
7. Ho ile ha etsoa phetoho efe ka 1932, hona hobane’ng?
7 Baholo ba bangata ba ile ba ikokobetsa eaba ba ikakhela ka setotsoana mosebetsing oa boboleli. Empa, libakeng tse ling, baholo ba neng ba khethiloe ka ho vouteloa ba ile ba hanyetsa khopolo ea hore e mong le e mong ka phuthehong o lokela ho kopanela tšebeletsong ea phatlalatsa. Leha ho le joalo, ntlafatso e eketsehileng e ne e tla tloha e etsahala. Ka 1932 Molula-Qhooa o ile oa laela liphutheho hore li khaotse ho khetha baholo le badiakone ka ho ba voutela. Ho e-na le hoo, li ne li lokela ho khetha komiti ea tšebeletso ea banna ba moea ba neng ba kopanela mosebetsing oa ho bolela phatlalatsa. Kahoo mosebetsi oa ho okamela o ile oa behoa mahetleng a ba neng ba kopanela ka mafolofolo tšebeletsong, ’me mosebetsi o ile oa hatela pele.
Ha Leseli le Eketseha ho ba le Ntlafatso e Eketsehileng
8. Ke ntlafatso efe e ileng ea etsoa ka 1938?
8 Leseli le ne ‘le ntse le khanya ka ho eketsehileng.’ Ka 1938 mokhoa oa ho khetha ka livoutu o ile oa felisoa ka ho feletseng. Bahlanka bohle ka phuthehong ba ne ba tla khethoa ka tsela ea puso ea Molimo ka tataiso ea “lekhoba le tšepahalang le le masene.” (Matheu 24:45-47) Hoo e ka bang liphutheho tsohle tsa Lipaki Tsa Jehova li ile tsa amohela phetoho ena ntle ho tikatiko, ’me mosebetsi oa ho paka o ile oa tsoela pele ho beha litholoana.
9. Ho ile ha qalisoa tokisetso efe ka 1972, hona ke hobane’ng ha ho ka thoe e ne e le ntlafatso?
9 Ho qala ka la 1 October, 1972, ho ile ha etsoa phetoho e ’ngoe mokhoeng oa ho hlokomela phutheho. Liphuthehong tsa Lipaki Tsa Jehova lefatšeng lohle ho ile ha qalisoa tokisetso ea hore mosebetsi oa ho hlokomela phutheho o etsoe ke sehlopha sa baholo, ’me e ne e nka sebaka sa tokisetso ea hore phutheho e hlokomeloe ke mohlanka a le mong, kapa molebeli. Tokisetso ena e ncha e ile ea susumetsa ka matla banna ba hōlileng tsebong hore ba tšoanelehele mosebetsi oa ho etella pele ka phuthehong. (1 Timothea 3:1-7) Ka lebaka leo, barab’abo rōna ba bangata ba fumane phihlelo tabeng ea ho hlokomela mesebetsi ea phutheho. Ka sebele ba thusitse haholo hore ho hlokomeloe batho ba bangata ba bacha ba amohetseng ’nete ea Bibele!
10. Ho ile ha qalisoa tokisetso efe ka 1976?
10 Ho ile ha hlophisoa hore litho tsa Sehlopha se Busang li sebeletse likomiting tse tšeletseng, ’me ho qala ka la 1 January, 1976, mesebetsi eohle ea mokhatlo o hlophisitsoeng le ea liphutheho tsohle ho pota lefatše e ile ea tsamaisoa ke likomiti tsena. Ka sebele e ile ea e-ba tlhohonolofatso e khōlō hore likarolo tsohle tsa mosebetsi oa ’Muso li tsamaisoe ke ‘baeletsi ba bangata’!—Liproverbia 15:22; 24:6.
11. Ka 1992 ho ile ha etsoa ntlafatso efe, hona hobane’ng?
11 Ka 1992 ho ile ha e-ba le ntlafatso e ’ngoe hape, e ka bapisoang le se ileng sa etsahala ka mor’a hore Baiseraele le ba bang ba khutle kholehong Babylona. Mehleng eo, ho ne ho se na Balevi ba lekaneng ba neng ba ka hlokomela mesebetsi ea tempele. Kahoo Banethinime, bao e neng e se Baiseraele, ba ile ba fuoa mosebetsi o eketsehileng oa ho thusa Balevi. Ka ho tšoanang, e le ho thusa sehlopha sa lekhoba le tšepahalang le le masene ho hlokomela mosebetsi oa sona o ntseng o hōla lefatšeng, ka 1992 ba bang ba “linku tse ling” ba ile ba fuoa boikarabelo bo eketsehileng. Ba ile ba khetheloa ho thusa likomiting tsa Sehlopha se Busang.—Johanne 10:16.
12. Jehova o ile a beha khotso hore e be balebeli ba rōna joang?
12 See sohle se hlahisitse liphello life? Jehova o re: “Ke tla beha khotso hore e be balebeli ba hao le ho loka hore e be ba u abelang mosebetsi.” (Esaia 60:17) Kajeno ho rena “khotso” har’a bahlanka ba Jehova, ’me ho rata “ho loka” ho se ho fetohile ‘motho ea ba abelang mosebetsi’—e leng matla a ba susumeletsang ho sebeletsa Molimo. Ba hlophisehile hantle hore ba etse mosebetsi oa ho bolela ka ’Muso le oa ho etsa barutuoa.—Matheu 24:14; 28:19, 20.
Jehova o Khantša Tsela Litabeng Tsa Thuto
13. Lilemong tsa bo-1920, Jehova o ile a khantša tsela ea batho ba hae litabeng tsa thuto joang?
13 Jehova o boetse o khantša tsela ea batho ba hae litabeng tsa thuto mohato ka mohato. Tšenolo 12:1-9 ke mohlala oa sena. Tlaleho ena e bua ka lintho tse tharo tse tšoantšetsang—“mosali” oa moimana ea belehang, “drakone,” le “mora, e motona.” Na ua tseba hore na e ’ngoe le e ’ngoe ea lintho tsee tse tšoantšetsang e emela’ng? Lintho tsena tse tšoantšetsang li ile tsa hlalosoa sehloohong se ileng sa hlaha tokollong ea Molula-Qhooa (oa Senyesemane) oa March 1, 1925, se reng, “Ho Tsoaloa ha Sechaba.” Sehlooho sena se ile sa etsa hore batho ba Molimo ba utloisise hamolemo boprofeta bo mabapi le ho tsoaloa ha ’Muso, ’me kutloisiso eo e ile ea etsa hore ho hlake hore ho na le mekhatlo e ’meli e sa tšoaneng—oa Jehova le oa Satane. Joale ka 1927/28, batho ba Molimo ba ile ba lemoha hore Keresemese le mekete ea letsatsi la tsoalo ha e lumellane le Mangolo, ’me ba ile ba khaotsa ho e keteka.
14. Ke linnete life tsa thuto ea bolumeli tse ileng tsa hlakisoa lilemong tsa bo-1930?
14 Lilemong tsa bo-1930, ho ile ha khantšoa leseli le eketsehileng linneteng tse tharo tsa thuto ea bolumeli. Ka lilemo-lemo, Liithuti Tsa Bibele li ne li tseba hore letšoele le leholo, kapa “bongata bo boholo,” bo boletsoeng ho Tšenolo 7:9-17 bo fapane le ba 144 000, ba neng ba tla busa le Kreste e le marena le baprista. (Tšenolo 5:9, 10; 14:1-5) Leha ho le joalo, ho ne ho ntse ho sa hlaka hore na letšoele leo le leholo ke bo-mang. Feela joalokaha khanya ea hoseng e etsa hore lintho tse neng li sa bonahale li hlake le ho hlahisa ’mala oa tsona, ka 1935 ho ile ha hlakisoa hore letšoele le leholo ke batho ba tla pholoha ‘matšoenyeho a maholo,’ ba nang le tšepo ea ho phela ka ho sa feleng lefatšeng. Hamorao hona selemong seo ho ile ha hlakisoa taba e ileng ea ama bana ba kenang sekolo ba Lipaki Tsa Jehova linaheng tse ngata. Ha moea oa ho rata naha o ntse o e-ba matla lefatšeng ka bophara, Lipaki li ile tsa lemoha hore ho lumelisa folakha hase mokhoa feela tjee o sa reng letho. Selemong se latelang, ho ile ha hlalosoa ’nete e ’ngoe ea thuto ea hore Kreste ha aa shoela sefapanong, empa o shoetse thupeng.—Liketso 10:39.
15. Taba ea khalalelo ea mali e ile ea hatisoa neng hona joang?
15 Ka mor’a Ntoa ea II ea Lefatše, e leng nakong eo ho neng ho se ho tloaelehile hore masole a lemetseng a phekoloe ka ho tšeloa mali, ho ile ha chabisoa leseli le eketsehileng tabeng ea khalalelo ea mali. Molula-Qhooa [oa Senyesemane] oa July 1, 1945, o ile oa khothalletsa “barapeli bohle ba Jehova ba batlang ho phela ka ho sa feleng lefatšeng la hae le lecha la ho loka hore ba hlomphe khalalelo ea mali ’me ba latele litaelo tse lokileng tsa Molimo tabeng ena ea bohlokoahali.”
16. Phetolelo ea Lefatše le Lecha ea Mangolo a Halalelang e ile ea lokolloa neng, hona litšobotsi tsa eona tse peli tse ikhethang ke life?
16 Ka 1946 ho ile ha totobala hore ho hlokahala phetolelo e ncha ea Bibele e neng e tla ngoloa ho latela tsebo ea morao-rao le e neng e sa silafatsoa ke lithuto tse thehiloeng lineanong tsa Bokreste-’mōtoana. Mosebetsi oa ho e fetolela o ile oa qala ka December 1947. Ka 1950 ho ile ha lokolloa Phetolelo ea Lefatše le Lecha ea Mangolo a Segerike a Bakreste ka Senyesemane. Mangolo a Seheberu a fetoletsoeng ka Senyesemane a ile a hatisoa meqolong e mehlano e ileng ea lokolloa ka mekhahlelo, ho qala ka 1953. Moqolo oa ho qetela o ile oa lokolloa ka 1960, lilemo tse batlang li feta tse 12 ka mor’a hore ho qalisoe phetolelo. Ka 1961, ho ile ha lokolloa Phetolelo ea Lefatše le Lecha ea Mangolo a Halalelang e feletseng e le moqolong o le mong. Hona joale, phetolelo ena e fumaneha ka lipuo tse ngata, ’me e na le litšobotsi tse itseng tse ikhethang. E khutlisetsa lebitso la Molimo Jehova, sebakeng sa lona. Ho feta moo, tsela e tobileng moelelo eo e fetolelang mangolo a pele ka eona e ralile motheo bakeng sa kutloisiso e tsoelang pele ea Lentsoe la Molimo.
17. Ke leseli lefe le eketsehileng le ileng la khantšoa ka 1962?
17 Ka 1962, ho ile ha hlakisoa taba ea “balaoli ba phahameng” ba boletsoeng ho Baroma 13:1 le hore na Bakreste ba lokela ho ikokobeletsa bona ho isa bohōleng bofe. Ho hlahloba ka botebo Baroma khaolo ea 13 le litemana tsa Mangolo a kang Tite 3:1, 2 le 1 Petrose 2:13, 17 ho ile ha hlakisa hore polelo e reng “balaoli ba phahameng” ha ea lebisoa ho Jehova Molimo le Jesu Kreste, empa e lebisitsoe ho batho ba boholong pusong.
18. Tse ling tsa linnete tse ileng tsa hlakisoa lilemong tsa bo-1980 ke life?
18 Lilemo hamorao, tsela ea ba lokileng e ile ea ’na ea khanya le ho feta. Ka 1985 ho ile ha khantšoa leseli tabeng ea hore na ho bolela eng hore motho a boleloe a lokile “bakeng sa bophelo” le hore a boleloe a lokile hore ke motsoalle oa Molimo. (Baroma 5:18; Jakobo 2:23) Ka 1987 ho ile ha hlalosoa ka botlalo hore na Jubile ea Bokreste e bolela eng.
19. Jehova o khantšelitse batho ba hae leseli le eketsehileng la moea lilemong tsa morao tjee joang?
19 Ka 1995 re ile ra utloisisa ka ho hlaka haholoanyane taba ea ho aroloa ha “linku” ho “lipōli.” Ka selemo sa 1998, pono ea Ezekiele ea tempele, e seng e ntse e phethahala, e ile ea hlalosoa ka mokhoa o qaqileng. Ka 1999 ho ile ha hlakisoa hore na ‘ntho e nyonyehang e ile ea ema sebakeng se halalelang’ neng hona joang. (Matheu 24:15, 16; 25:32) ’Me ka 2002 re ile ra utloisisa haholoanyane hore na ho rapela Molimo “ka moea le ka ’nete” ho bolela’ng.—Johanne 4:24.
20. Batho ba Molimo ba ile ba bona ntlafatso ntlheng efe e ’ngoe?
20 Ho phaella ntlafatsong ea mokhatlo o hlophisitsoeng le ea lithuto, ho bile le ntlafatso tabeng ea boitšoaro ba Bokreste. Ka mohlala, ka 1973 ho ile ha utloisisoa hore ho sebelisa koae ho ‘silafatsa nama’ ’me ho ne ho lokela ho nkoa e le phoso e tebileng. (2 Bakorinthe 7:1) Lilemo tse leshome hamorao, tokollo ea Molula-Qhooa oa July 15, 1983, e ile ea hlakisa boemo ba rōna tabeng ea ho sebelisa lithunya. Ena ke mehlala e seng mekae feela ea leseli le ntseng le eketseha mehleng ea rōna.
Tsoela Pele U Tsamaea Tseleng ea Leseli le Ntseng le Eketseha
21. Ke boikutlo bofe bo tla re thusa hore re tsoele pele re tsamaea tseleng ea leseli le ntseng le eketseha?
21 Moholo e mong oa khale oa lumela: “Ha ho bonolo ho amohela phetoho le ho lumellana le eona.” Ke eng e mo thusitseng hore a amohele lintho tse ngata tseo a boneng li ntlafatsoa lilemong tse 48 tseo e bileng ’moleli oa ’Muso ka tsona? Ha a araba o re: “Ntho ea bohlokoa ke ho ba le boikutlo bo botle. Ho hana ho amohela ntlafatso ho bolela hore motho o batla ho salla morao ha mokhatlo o hlophisitsoeng o hatela pele. Haeba ke hlokomela hore ke se ke thatafalloa ke ho amohela liphetoho, ke nahana ka mantsoe ao Petrose a ileng a a bolella Jesu: ‘Morena, re tla tloha re ee ho mang? Ke uena ea nang le lipolelo tsa bophelo bo sa feleng.’ Ebe kea ipotsa, ‘Ke tla tloha ke ee ho mang—lefatšeng le lefifi?’ Sena se nthusa hore ke khomarele mokhatlo o hlophisitsoeng oa Molimo.”—Johanne 6:68.
22. Re rua molemo ofe ka ho tsamaea leseling?
22 Ka sebele lefatše le re potolohileng le lefifing le letšo-letšo. Ha Jehova a ntse a khantšetsa batho ba hae leseli, phapang pakeng tsa bona le batho ba lefatše e ntse e e-ba khōlō le ho feta. Leseli lee le re thusa joang? Feela joalokaha ho khantša likoti tse tseleng e lefifi ka lebone le matla ho sa tlose likoti tseo, leseli le tsoang Lentsoeng la Molimo ha le tlose likotsi tse leng teng. Leha ho le joalo, ha ho pelaelo hore leseli le tsoang ho Molimo le re thusa ho li qoba e le hore re ka tsoela pele re tsamaea tseleng ea leseli le ntseng le eketseha. Kahoo, a re tsoeleng pele ho ela hloko lentsoe la Jehova la boprofeta, “joaloka lebone le khanyang sebakeng se lefifi.”—2 Petrose 1:19.
Na U sa Hopola?
• Ke ntlafatso efe mokhatlong o hlophisitsoeng eo Jehova a ileng a e etsetsa batho ba hae?
• Leseli le ntseng le eketseha le tlisitse ntlafatso efe lithutong?
• Ke liphetoho life tseo uena ka bouena u li boneng, ’me ke eng e u thusitseng hore u li amohele?
• Ke hobane’ng ha u batla ho tsoela pele u tsamaea tseleng ea leseli le ntseng le eketseha?
[Litšoantšo tse leqepheng la 27]
Kopano ea 1922 ea Cedar Point, Ohio, e ile ea matlafatsa Liithuti Tsa Bibele hore li etse mosebetsi oa Molimo
[Setšoantšo se leqepheng la 29]
“Phetolelo ea Lefatše le Lecha ea Mangolo a Segerike a Bakreste” e ileng ea lokolloa ke N. H. Knorr ka 1950
[Tlhaloso ea Moo Setšoantšo se Nkiloeng Teng e leqepheng la 26]
© 2003 BiblePlaces.com