Lentsoe la Jehova ha le Hlōlehe le ka Mohla
“Ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala. A phethahetse kaofela bakeng sa lōna.”—JOSHUA 23:14.
1. Joshua e ne e le mang, hona o ile a etsa’ng ho ella qetellong ea bophelo ba hae?
E NE e le molaoli oa lebotho la ntoa ea mahlahahlaha le ea sebete, monna oa tumelo ea bileng a tšepahalang. O ile a tsamaea le Moshe ’me o ile a khethoa ke Jehova hore a etelle pele sechaba sa Iseraele ho se ntša lefeelleng le tšosang hore a se ise naheng e kollang lebese le mahe a linotši. Ho ella qetellong ea bophelo ba hae, monna enoa ea neng a hlomphuoa haholo Joshua, o ile a fa banna ba baholo ba Iseraele puo ea tumeliso e susumetsang maikutlo. Ha ho pelaelo hore puo eo e ile ea matlafatsa tumelo ea ba neng ba mo mametse. Le uena e ka u matlafatsa tumelo.
2, 3. Ha Joshua a ne a bua le banna ba baholo ba Iseraele, boemo e ne e le bofe Iseraele, hona Joshua o ile a re’ng?
2 Nahana ka boemo bona, joalokaha bo hlalosoa ka Bibeleng: “Matsatsi a mangata ka mor’a hore Jehova a fe Baiseraele phomolo ho lira tsohle tsa bona ka hohle, ha Joshua a tsofetse ’me a se a ile lilemong, Joshua a bitsa Baiseraele bohle, banna ba bona ba baholo le lihlooho tsa bona le baahloli ba bona le balaoli ba bona, a re ho bona: ‘Ha e le ’na, ke tsofetse, ke se ke ile lilemong.’”—Joshua 23:1, 2.
3 Joshua o ne a atamela lilemo tse 110, ’me o ne a phetse nakong e thabisang ka ho fetisisa historing ea batho ba Molimo. O ne a bone ka mahlo liketso tse matla tsa Molimo, a bile a bone ha litšepiso tse ngata tsa Jehova li phethahala. Ka lebaka leo, o ne a ka bua ka kholiseho e feletseng ka lebaka la lintho tseo a iponetseng tsona ha a ne a re: “Le tseba hantle ka lipelo tsa lōna tsohle le ka meea ea lōna eohle hore ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala. A phethahetse kaofela bakeng sa lōna. Ha ho lentsoe leha le le leng la ’ona le hlōlehileng ho phethahala.”—Joshua 23:14.
4. Jehova o ile a tšepisa Baiseraele eng?
4 Ke mantsoe afe a Jehova a ileng a phethahala nakong ea Joshua? Re tla hlahloba lintho tse tharo tseo Jehova a ileng a li tšepisa Baiseraele. Ea pele, Molimo o ne a tla ba lokolla botlamuoeng. Ea bobeli, o ne a tla ba sireletsa. Ea boraro, o ne a tla ba hlokomela. Jehova o file bahlanka ba hae ba kajeno litšepiso tse tšoanang, ’me re li bone ha li phethahala bophelong ba rōna. Leha ho le joalo, pele re hlahloba seo Jehova a se entseng mehleng ea kajeno, a re ke re hlahlobeng seo a se entseng mehleng ea Joshua.
Jehova o Lopolla Batho ba Hae
5, 6. Jehova o ile a lopolla Baiseraele Egepeta joang ’me see se ile sa bontša’ng?
5 Ha Baiseraele ba ne ba llela Molimo ka lebaka la bokhoba ba bona Egepeta, Jehova o ile a ba mamela. (Exoda 2:23-25) Jehova o ile a bua le Moshe a le sehlahleng se tukang a re: “Kea theoha ho ea lopolla [sechaba sa ka] matsohong a Baegepeta le ho se ntša naheng eo ho se isa naheng e ntle le e khōlō, naheng e phallang lebese le mahe a linotši.” (Exoda 3:8) E tlameha ebe e ile ea e-ba ntho e thabisang hakaakang ho bona Jehova a phethahatsa see! Ha Faro a ne a hanela Baiseraele ho tloha Egepeta, Moshe o ile a mo bolella hore Molimo o ne a tla fetola metsi a Nile mali. Lentsoe la Jehova ha lea ka la hlōleha ho phethahala. Metsi a Nōka ea Nile a ile a fetoha mali. Litlhapi li ile tsa shoa, ’me metsi a nōka a ne a sa noehe. (Exoda 7:14-21) Faro o ile a ithatafatsa hlooho, ’me Jehova o ile a tlisa likotlo tse ling tse robong, ’me o ne a hlalosa kotlo ka ’ngoe pele a e tlisa. (Exoda, likhaolo 8-12) Ka mor’a hore kotlo ea leshome e bolaee matsibolo ’ohle a Egepeta, Faro o ile a laela Baiseraele hore ba tsamaee—’me ba ile ba fela ba tsamaea!—Exoda 12:29-32.
6 Topollo eo e ile ea bula monyetla oa hore Jehova a nke Baiseraele a ba etse sechaba sa hae seo a se khethileng. E ile ea tlotlisa Jehova ea bontša hore ke Mophethahatsi oa litšepiso, eo le ka mohla lentsoe la hae le ke keng la hlōleha ho phethahala. E ile ea bonahatsa hore Jehova o phahametse melimo ea lichaba. Ha re bala ka topollo eo tumelo ea rōna ea matlafala. Nahana feela hore na ho ile ha e-ba joang ho ba neng ba lopolloa! Joshua o ile a bona hore ntle ho potang Jehova ke “Ea Phahameng ka ho Fetisisa holim’a lefatše lohle.”—Pesaleme ea 83:18.
Jehova o Sireletsa Batho ba Hae
7. Jehova o ile a sireletsa Baiseraele lebothong la Faro joang?
7 Ho thoe’ng ka tšepiso ea bobeli—ea hore Jehova o ne a tla sireletsa batho ba hae? Tšepiso ena e ne e akarellelitsoe tšepisong ea Jehova ea hore o ne a tla lopolla Baiseraele Egepeta a ba kenye Naheng e Tšepisitsoeng. Hopola hore Faro ea neng a halefile o ile a lelekisa Baiseraele ka lebotho la hae le matla, le neng le hlometse ka likoloi tsa ntoa tse makholo-kholo. E tlameha ebe monna eo oa moikakasi o ile a utloa a le sebete hakaakang, haholo-holo ha ho ne ho bonahala eka Baiseraele ba qabeletsoe lipakeng tsa lithaba le leoatle! Joale, Molimo o ile a kenella ho sireletsa batho ba hae ka hore a behe leru lipakeng tsa lihlopha tsena tse peli. Ka lehlakoreng la Baegepeta ho ne ho le lefifi; ka lehlakoreng la Baiseraele ho ne ho khanya. Ha leru le ntse le sitisa Baegepeta ho tsoela pele, Moshe o ile a phahamisa lere la hae ’me metsi a Leoatle le Lefubelu a ile a aroha likoto, a bulela Baiseraele tsela ea ho pholoha ’me a chehela Baegepeta leraba. Jehova o ile a timetsa lebotho le matla la Baegepeta ka ho feletseng, a sireletsa batho ba Hae hore ba se ke ba hlōloa.—Exoda 14:19-28.
8. Baiseraele ba ile ba sireletsoa joang (a) lefeelleng le (b) ha ba kena Naheng e Tšepisitsoeng?
8 Ka mor’a ho tšela Leoatle le Lefubelu, Baiseraele ba ile ba phaila naheng e hlalosoang e le ‘lefeella le leholo le le tšabehang, le nang le linoha tse chefo le liphepheng le mobu o nyoriloeng o se nang metsi.’ (Deuteronoma 8:15) Jehova o ile a sireletsa batho ba hae le hona moo. Empa ho ile ha etsahala’ng ha ba kena Naheng e Tšepisitsoeng? Mabotho a matla a Bakanana a ile a ba loantša. Leha ho le joalo, Jehova o ile a re ho Joshua: “Ema, u tšele Jordane ena, uena le sechaba sena sohle, le kene naheng eo ke se fang eona, bara ba Iseraele. Ha ho ea tla ema a tiile ka pel’a hao matsatsing ’ohle a bophelo ba hao. Ke tla ba le uena feela joalokaha ke bile le Moshe. Nke ke ka u lahla kapa ka u tlohela ka ho feletseng.” (Joshua 1:2, 5) Mantsoe ao a Jehova ha aa ka a hlōleha ho phethahala. Ka nako e ka etsang lilemo tse tšeletseng, Joshua o ile a hlōla marena a 31 ’me a hapa likarolo tse khōlō tsa Naha e Tšepisitsoeng. (Joshua 12:7-24) Haeba Jehova a ne a sa ba hlokomela ka ho ba sireletsa, ba ka be ba sa hlōla.
Jehova o Hlokomela Batho ba Hae
9, 10. Jehova o ile a hlokomela batho ba hae joang lefeelleng?
9 Joale, nahana ka tšepiso ea boraro—Jehova o ne a tla hlokomela batho ba hae. Nakoana ka mor’a hore ba lopolloe Egepeta, Molimo o ile a tšepisa Baiseraele a re: “Bonang! ke le nesetsa bohobe bo tsoang maholimong; sechaba se tla tsoa ’me e mong le e mong a nke ho mo lekaneng letsatsi le letsatsi.” Feela joalokaha a boletse, Molimo o ile a fela a ba fa ‘bohobe bo tsoang leholimong.’ “Ha bara [ba] Iseraele ba bo bona, ba qala ho buisana ba re: ‘Ke eng?’” E ne e le manna, bohobe boo Jehova a neng a ba tšepisitse bona.—Exoda 16:4, 13-15.
10 Ka lilemo tse 40 ba le lefeelleng, Jehova o ile a hlokomela Baiseraele, a ba fa lijo le metsi. O ile a ba a etsa bonnete ba hore liaparo tsa bona tsa ka holimo ha li tsofale le hore maoto a bona ha a ruruhe. (Deuteronoma 8:3, 4) Joshua o ile a bona lintho tsena kaofela. Jehova o ile a lopolla, a sireletsa a ba a hlokomela batho ba hae feela joalokaha a ne a ba tšepisitse.
Ho Lopolloa Mehleng ea Kajeno
11. Ho ile ha etsahala’ng Brooklyn, New York, ka 1914, ’me ho ne ho fihlile nako ea eng?
11 Ho thoe’ng ka mehleng ea rōna? Hoseng ka Labohlano la la 2 October, 1914, Charles Taze Russell, ea neng a eteletse Liithuti Tsa Bibele pele, o ile a kena ka holong ea ho jela ea Bethele, Brooklyn, New York. Ka thabo o ile a re: “Lumelang.” Joale, pele a lula setulong o ile a phatlalatsa ka thabo: “Linako tsa Balichaba li felile; nako ea marena a bona e felile.” Ho ne ho boetse ho fihlile nako ea hore Jehova, ’Musi oa bokahohleng, a nke bohato molemong oa batho ba hae. ’Me o ile a fela a nka bohato!
12. Ke topollo efe e ileng ea etsahala ka 1919, ’me see se ile sa hlahisa litholoana life?
12 Lilemo tse hlano feela hamorao, Jehova o ile a lopolla batho ba hae “Babylona e Moholo,” ’muso o moholo oa lefatše oa bolumeli ba bohata. (Tšenolo 18:2) Ke ba seng bakae har’a rōna ba baholo hoo e ka bang ba bone ha topollo eo e thabisang e ne e etsahala. Leha ho le joalo, re bona litholoana tsa eona ka ho hlaka. Jehova o ile a tsosolosa borapeli bo hloekileng a ba a kopanya ba neng ba labalabela ho mo rapela. Sena se ne se ile sa boleloa esale pele ka moprofeta Esaia: “Karolong e qetellang ea matsatsi thaba ea ntlo ea Jehova e tla tiisoa ka thata ka holim’a litlhōrō tsa lithaba, ’me ka sebele e tla phahamela maralla; lichaba tsohle li tla phallela ho eona.”—Esaia 2:2.
13. Ke keketseho efe eo u e boneng har’a batho ba Jehova?
13 Mantsoe a Esaia ha aa ka a hlōleha ho phethahala. Ka 1919 ka sebete masala a tlotsitsoeng a ile a kena letšolong la ho paka lefatšeng ka bophara le ileng la phahamisetsa borapeli ba Molimo oa ’nete boemong bo phahameng. Lilemong tsa bo-1930, ho ile ha totobala hore “linku tse ling” li ne li bokelloa. (Johanne 10:16) Qalong ho ile ha bokelloa tse likete, joale ea e-ba tse makholo a likete ’me hona joale ba limilione ba tšehetsa borapeli bo hloekileng! Ponong e ileng ea fuoa moapostola Johanne, ba hlalosoa e le ‘bongata bo boholo, boo ho seng motho ea neng a khona ho bo bala, bo tsoang lichabeng tsohle le melokong eohle le bathong bohle le malemeng ’ohle.’ (Tšenolo 7:9) Uena u bone’ng bophelong ba hao? Lipaki Tsa Jehova li ne li le kae ka palo lefatšeng ha u ne u qala ho ithuta ’nete? Kajeno, batho ba sebeletsang Jehova ba feta 6 700 000. Ka ho lokolla batho ba hae Babylona e Moholo, Jehova o ile a bula monyetla oa hore ho be le keketseho ena e thabisang eo re e bonang e etsahala lefatšeng lohle.
14. Ke topollo efe eo e leng hona e tlang?
14 Ho sa na le topollo e ’ngoe eo e leng hona e tlang—ena e tla ama motho e mong le e mong ea phelang lefatšeng. Jehova o tla sebelisa matla a hae ka tsela e tsotehang ho fiela bohle ba khahlanong le eena, ’me o tla pholosetsa batho ba hae lefatšeng le lecha moo ho loka ho tla aha teng. E tla ba thabo e kaakang ha bokhopo bo felisoa ’me ho qala nako e khanyang ka ho fetisisa historing eohle ea motho!—Tšenolo 21:1-4.
Tšireletso ea Jehova Mehleng ea Rōna
15. Ke hobane’ng ha tšireletso ea Jehova e ’nile ea hlokahala mehleng ea kajeno?
15 Joalokaha re se re bone, Baiseraele ba mehleng ea Joshua ba ne ba hloka tšireletso ea Jehova. Na batho ba Jehova ba mehleng ea kajeno bona ba fapane? Che! Jesu o ile a lemosa balateli ba hae: “Batho ba tla nehelana ka lōna matšoenyehong ’me ba tla le bolaea, ’me le tla hlouoa ke lichaba tsohle ka lebaka la lebitso la ka.” (Matheu 24:9) Ka lilemo tse ngata, linaheng tse ngata Lipaki Tsa Jehova li mameletse khanyetso e matla le mahloriso a sehlōhō. Leha ho le joalo, ho hlakile hore Jehova o tšehetsa batho ba hae. (Baroma 8:31) Lentsoe la hae lea re tiisetsa hore—‘ha ho sebetsa leha e le sefe se tla etsoa khahlanong le rōna’—se tla emisa mosebetsi oa rōna oa ho bolela le ho ruta ka ’Muso.—Esaia 54:17.
16. U bone bopaki bofe bo supang hore Jehova o sireletsa batho ba hae?
16 Ho sa tsotellehe taba ea hore lefatše le ba hloile, batho ba Jehova ba ’nile ba eketseha. Lipaki Tsa Jehova lia eketseha linaheng tse 236—sena ke bopaki bo totobetseng ba hore ka sebele Jehova o na le rōna ho re sireletsa ho ba ratang ho re timetsa kapa ho re koala melomo. Na u hopola mabitso a baeta-pele ba lipolotiki ba matla kapa ba bolumeli bao bophelong ba hao ba ileng ba hatella batho ba Molimo habohloko? Ho etsahetse’ng ka bona? Ba hokae hona joale? Ba bangata ba bona ba fetohile lefeela, feela joaloka Faro mehleng ea Moshe le Joshua. Empa ho etsahetse’ng ka bahlanka ba Molimo ba mehleng ea kajeno ba shoeleng ba tšepahala ho Molimo? Ba sireletsehile mohopolong oa Jehova. Ha ho sebaka se seng seo ba neng ba ka sireletseha ho sona ho feta sena. Ho hlakile hore mantsoe a Jehova a mabapi le ho fana ka tšireletso a phethahetse.
Jehova o Hlokomela Batho ba Hae Kajeno
17. Mabapi le lijo tsa moea, Jehova o ile a tšepisa eng?
17 Jehova o ile a hlokomela batho ba hae lefeelleng, ’me le kajeno oa ba hlokomela. “Lekhoba le tšepahalang le le masene” le re fepa moeeng. (Matheu 24:45) Re fumana tsebo ea linnete tsa moea tse ileng tsa lula e le lekunutu ka makholo a lilemo. Lengeloi le ile la re ho Daniele: “Etsa hore mantsoe ana e be sephiri ’me u tiise buka, ho fihlela nakong ea bofelo. Ba bangata ba tla phenya, ’me tsebo ea ’nete e tla ba ngata.”—Daniele 12:4.
18. Ke hobane’ng ha ho ka thoe kajeno tsebo ea ’nete e ngata?
18 Hona joale re phela nakong ea bofelo, ’me ruri tsebo ea ’nete e ngata. Lefatšeng ka bophara, moea o halalelang o entse hore batho ba ratang ’nete ba fumane tsebo e nepahetseng ka Molimo oa ’nete le ka merero ea hae. Kajeno Libibele lia eketseha lefatšeng, ’me le lingoliloeng tse thusang batho hore ba utloisise linnete tsa bohlokoa tse fumanoang ka Bibeleng le tsona lia eketseha. Ho tea mohlala, nahana ka lethathamo la tse ka hare bukeng ea ho ithuta ea Ha e le Hantle ke Eng Seo Bibele e se Rutang? a Har’a lihlooho tsa eona ho akha tse reng: “Ke Eng Seo e Leng ’Nete ka Molimo?,” “Bafu ba Hokae?,” “’Muso oa Molimo ke Eng?” le “Ke Hobane’ng ha Molimo a Lumeletse Bohloko?” Batho ba ’nile ba nahana ka lipotso tsena ka lilemo tse likete. Hona joale likarabo li fumaneha habonolo. Esita le ka mor’a hore batho ba hloke tsebo ka lilemo tse makholo le ka mor’a hore Bokreste-’mōtoana bo rute lithuto tse khelohileng, Lentsoe la Molimo lea hlōla, le thusa bohle ba labalabelang ho sebeletsa Jehova.
19. Ke litšepiso life tseo u boneng ha li phethahala, ’me u fihletse qeto efe?
19 Ntle ho pelaelo, ho latela seo re se boneng le rōna re ka re: “Ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala. A phethahetse kaofela bakeng sa lōna. Ha ho lentsoe leha le le leng la ’ona le hlōlehileng ho phethahala.” (Joshua 23:14) Jehova oa lopolla, oa sireletsa o bile o hlokomela bahlanka ba hae. Na u ka supa tšepiso leha e le efe ea hae e ileng ea hlōleha ho phethahala ka nako eo a neng a e behile? U ke ke! Ka bohlale re tšepa Lentsoe la Molimo le tšepahalang.
20. Ke hobane’ng ha re ka lebella bokamoso re e-na le tšepo?
20 Ho thoe’ng ka nakong e tlang? Jehova o re boleletse hore boholo ba rōna re ka ba le tšepo ea ho phela lefatšeng le tla beng le fetotsoe paradeise e thabisang. Ba seng bakae har’a rōna ba na le tšepo ea hore ba tla busa le Kreste leholimong. Ho sa tsotellehe hore na tšepo ea rōna ke efe, re na le mabaka a hore re lule re tšepahala joaloka Joshua. Ka letsatsi le leng tšepo ea rōna e tla phethahala. Joale re tla hetla morao re nahane ka litšepiso tsohle tseo Jehova a re etselitseng tsona ebe le rōna re re: ‘Li phethahetse kaofela.’
[Mongolo o botlaaseng ba leqephe]
a E hatisitsoe ke Lipaki Tsa Jehova.
Na U ka Hlalosa?
• Ke litšepiso life tsa Jehova tseo Joshua a ileng a li bona ha li phethahala?
• Ke litšepiso life tsa Molimo tseo u boneng ha li phethahala?
• Re ka kholiseha ka eng mabapi le lentsoe la Molimo?
[Setšoantšo se leqepheng la 23]
Jehova o ile a kenella ho lopolla batho ba hae
[Setšoantšo se leqepheng la 23]
Jehova o ile a sireletsa batho ba hae joang Leoatleng le Lefubelu?
[Setšoantšo se leqepheng la 24]
Jehova o ile a hlokomela batho ba hae joang lefeelleng?
[Setšoantšo se leqepheng la 25]
Jehova o hlokomela batho ba hae kajeno