Seo Jehova a se Profetang Sea Phethahala

“KE ’NA Ea Nang le Bomolimo ’me ha ho na Molimo e mong, leha e le mang ea joaloka ’na; Ea bolelang qetello ho tloha tšimolohong, le eo ho tloha khale a bolelang lintho tse e-s’o etsoe.” (Esaia 46:9, 10) Jehova ke eena ea buang mantsoe ana, ke eena ea khonang ho profeta bokamoso ntle ho phoso.

Hoa tsebahala hore batho ba sitoa ho profeta ka nepo lintho tseo e leng hona li tla etsahala. Kahoo, kaha Bibele ke buka e buang ka boprofeta, bohle ba ratang ’nete ba lokela ho batlisisa hore na ho fela ho le joalokaha e bolela hore e ngotsoe ke Molimo. A re hlahlobeng bo bong ba boprofeta ba eona bo seng bo phethahetse.

Lichaba Tsa Boholo-holo

Molimo o ile a profeta hore Babylona, Edomo, Moabe le Ammone li ke ke tsa hlola li e-ba teng. (Jeremia 48:42; 49:17, 18; 51:24-26; Obadia 8, 18; Sofonia 2:8, 9) Ho timela ha lichaba tsena tse neng li hlaheletse ho paka hore boprofeta ba Lentsoe la Molimo ke ’nete.

Motho a ka ’na a re mang kapa mang a ka bolela esale pele hore sechaba se itseng, ho sa tsotellehe hore na se matla hakae, se tla qetella se le sieo. Empa ka ho rialo o lebala ntlha ea bohlokoa ea hore Bibele eona e ile ea fana ka boitsebiso bo eketsehileng. Ka mohlala, e ile ea fana ka lintlha tse qaqileng mabapi le hore na Babylona e ne e tla hlōloa joang. Bibele e ile ea profeta hore motse oo o ne o tla haptjoa ke Bamede, hore masole a Bamede a futuhang a ne a tla etelloa pele ke Cyruse le hore linōka tse neng li sirelelitse motse li ne li tla psha.—Esaia 13:17-19; 44:27–45:1.

Hase lichaba tsohle tse ileng tsa hlōloa tseo Bibele e ileng ea profeta hore li ne li ke ke tsa hlola li e-ba teng. Ho e-na le hoo, ha Molimo a profeta hore Jerusalema e ne e tla hlōloa ke Bababylona, o ile a re motse oo o ne o tla tsosolosoa, le hoja Babylona e ne e e-na le leano la ho se lokolle batšoaruoa ba eona. (Jeremia 24:4-7; 29:10; 30:18, 19) Ho ile ha fela ha e-ba joalo, ’me litloholo tsa Bajuda li ntse li le teng ho fihlela kajeno.

Ho feta moo, Jehova o ile a profeta hore Egepeta e ne e tla nkeloa matla a ho busa lefatše empa “ka mor’a moo [e ne] e tla hahoa joaloka matsatsing a khale.” Hamorao, ’muso ona oa boholo-holo o ne o tla “fetoha ’muso o tlaase.” (Jeremia 46:25, 26; Ezekiele 29:14, 15) Le boprofeta bona bo ile ba phethahala. Ho feta moo, Jehova o ile a profeta hore Greece e ne e tla nkeloa matla a ho busa lefatše, empa ha ho mohla a kileng a re sechaba seo se ne se ke ke sa hlola se e-ba teng. Re ithuta eng ka ho timela ha lichaba tseo Jehova a neng a profetile hore li tla timela le ho ba teng ha tseo a sa kang a re li tla timela? Re ithuta hore Lentsoe la Molimo le na le boprofeta ba ’nete, bo tšepahalang.

E Bolela Lintlha Tse Qaqileng ka Tsela e Makatsang

Joalokaha re bone, Jehova o ile a bolela lintlha tse ngata mabapi le kamoo Babylona e neng e tla hlōloa kateng. Ka ho tšoanang ha buka ea Ezekiele e profeta timetso ea Tyre, e ile ea re majoe a eona, lintho tse entsoeng ka lehong le lerōle li tla behoa “ka har’a metsi.” (Ezekiele 26:4, 5, 12) Boprofeta bona bo ile ba phethahala ka 332 B.C.E. ha Alexandere e Moholo a laela mabotho a hae hore a sebelise lithako tsa motse oo o hapuoeng ho haha borokho bo lebang karolong ea Tyre e sehlehlekeng, eo le eona e neng e hapuoe.

Boprofeta bo tlalehiloeng ho Daniele 8:5-8, 21, 22 le 11:3, 4 le bona bo ile ba bolela lintlha tse qaqileng ka tsela e makatsang mabapi le “morena oa Greece” ea neng a le matla ka ho sa tloaelehang. Morena enoa o ne a tla bolaoa nakong ea ha a le matla haholo, ’me muso oa hae o ne tla aroloa likarolo tse ’nè empa o sa aroleloe litloholo tsa hae. Lilemo tse fetang 200 boprofeta bona bo tlalehiloe, Alexandere e Moholo o ile a bontša hore ke eena morena eo ea matla. Histori e re bolella hore o ile a shoa ho sa lebelloa ’me qetellong ’muso oa hae oa aroleloa balaoli ba bane ba mabotho a hae—bao e neng e se litloholo tsa hae.

Bahlahlobisisi ba re e tlameha ebe boprofeta bona bo tlalehiloe ka mor’a hore lintho tsena li etsahale. Leha ho le joalo, ak’u boele u shebe tlaleho ena e hlahang bukeng ea Daniele. Haeba re nka hore ke boprofeta, lintlha tsa bona li qaqile ka tsela e makatsang. Empa haeba re nka hore ke histori e etsoang eka ke boprofeta, na ha ho bonahale ho e-na le lintlha tseo ho totobetseng hore lia haella? Haeba moikhakanyi ea phetseng ka mor’a lefu la Alexandere o ne a leka ho khahla babali ka seo a neng a re ke boprofeta, ke hobane’ng ha a sa ka a bolela hore hang ka mor’a lefu la Alexandere, bara ba hae ba babeli ba ile ba leka ho inkela borena empa ba bolaoa? Ke hobane’ng ha a sa ka a bolela hore ho ile ha feta lilemo tse ngata pele balaoli bao ba bane ba sesole ba busa likarolong tse fapaneng tsa ’muso oa Alexandere? Ha e le hantle, ke hobane’ng ha a sa ka a bolela lebitso la morena eo e moholo le a balaoli ba hae ba bane ba sesole?

Ke khale batho ba bolela hore boprofeta ba Bibele bo ngotsoe ka mor’a hore lintho tseo bo buang ka tsona li etsahale le hoja ba buang joalo ba sa khone ho paka seo ba se buang hobane ba lumela ba e-s’o hlahlobe bopaki hore ho ke ke ha etsahala hore liketsahalo tsa nakong e tlang li boleloe esale. Kahobane ba latola hore Bibele ke Lentsoe la Molimo, ba se ba tlameha ho hlalosa ntho e ’ngoe le e ’ngoe ka kutloisiso ea botho. Leha ho le joalo, ka bohlale Molimo o ile a bululela boitsebiso bo lekaneng feela ho paka hore boprofeta boo bo ngotsoe ke eena.a

Boprofeta ba Bibele bo ka tiisa tumelo ea hao haeba u khetha bo itseng ebe u ipha nako ea ho thuisa ka bona le kamoo bo phethahetseng kateng. Ho ka ba joang ha u ka ithuta boprofeta ba Bibele? Chate e leqepheng la 343 ho ea ho 346 bukeng ea “Lengolo Lohle le Bululetsoe ke Molimo ’me le Molemo” e ka u thusa.b Haeba u etsa sena, se etse ka morero oa ho haha tumelo ea hao. U se ke ua hoalotsa feela. Ho e-na le hoo, nahanisisa ka hore eng kapa eng eo Jehova a e profetang, e phethahala ntle ho phoso.

[Mongolo o botlaaseng ba leqephe]

[Lebokose/Setšoantšo se leqepheng la 24]

MELAO-MOTHEO EO RE KA E SEBELISANG BOPHELONG BA RŌNA

Nahana ka sena hape. Molimo ea profetileng ka nepo kamoo mebuso e matla ea lefatše e neng e tla hlahella kateng e be e fele, ke eena Mohloli oa melao-motheo e ka Bibeleng eo re ka e sebelisang bophelong ba rōna. E meng ea eona ke ena:

U kotula seo u se jalang.—Bagalata 6:7.

Ho fana ho tlisa thabo e khōlō ho feta ho amohela.—Liketso 20:35.

U tla thaba hafeela u ela hloko tlhoko ea hao ea moea.—Matheu 5:3.

Haeba u sebelisa melao-motheo ena bophelong ba hao, ha ho pelaelo hore e tla u tsoela molemo.

[Litšoantšo tse leqepheng la 22, 23]

Lentsoe la Molimo le ile la profeta hore lichaba tsena li tla felisoa ka ho feletseng . . .

EDOMO

BABYLONA

. . . empa eseng

GREECE

EGEPETA

[Moo Litšoantšo li Nkiloeng Teng]

Pictorial Archive (Near Eastern History) Est.

WHO photo by Edouard Boubat

[Setšoantšo se leqepheng la 23]

Alexandere e Moholo