Kamoo U ka Bang Ntate oa Khonthe

“Lōna bo-ntate, le se ke la khentša bana ba lōna, e le hore ba se ke ba nyahama.”​—Bakolose 3:21.

NTATE a ka qoba ho khentša bana ba hae joang? O lokela ho lemoha hore ho ba ntate ke boikarabelo ba bohlokoa. Sengoliloeng se seng se buang ka mafu a kelello se re: “Ho ba ntate ke boikarabelo bo thata le ba bohlokoa bo ka amang ngoana ka ho tebileng maikutlong le kelellong.”

Boikarabelo ba ntate ke bofe? Malapeng a mangata ntate ke eena ea khalemelang bana. Hangata ’mè o atisa ho re ho ngoana ea setoutu, ‘Ke tlil’o joetsa ntat’ao!’ Ha ho pelaelo hore ho hlokahala hore bana ba khalemeloe hantle ’me ka linako tse ling ho tiisoe letsoho e le hore e tle e be batho ba baholo ba tsitsitseng. Leha ho le joalo, ho na le lintho tse ling tse hlokahalang tse etsang hore motho e be ntate oa khonthe.

Ka masoabi, hase ntate e mong le e mong ea bileng le motho ea mo behetseng mohlala o motle. Banna ba bang ba hōletse malapeng a se nang bo-ntate. Empa maemong a mang banna ba hōlisitsoeng ke bo-ntate ba thata, le bona ba ka ’na ba tšoara bana ba bona joalo. Ke joang ntate ea joalo a ka qobang mokhoa oo ’me a ntlafatsa tsela eo a tšoarang lelapa ka eona?

Ho na le moo re ka fumanang keletso e atlehang le eo re ka e tšepang ea ho ba ntate oa khonthe. Bibele e na le keletso e molemo ka ho fetisisa litabeng tsa lelapa. Keletso ea eona ea atleha ebile ha ho mohla e re ntšang kotsi. Keletso ea Bibele e bontša kamoo Mongoli oa eona ea thehileng lelapa, e leng Jehova Molimo, a leng bohlale kateng. (Baefese 3:14, 15) Haeba u ntate, ho molemo hore u bale keletso ea Bibele e mabapi le ho hōlisa bana.a

Ho ba ntate oa khonthe ho thusa bana hore ba hōle hantle ’meleng le maikutlong hape ho ba thusa hore ba be le kamano e ntle le Molimo. Ho ka ba bonolo hore ngoana ea utloanang le ntate oa hae a be le kamano e ntle le Molimo. Etsoe, Bibele e bolela hore ka tsela e itseng, Jehova, ’Mōpi oa rōna, ke Ntate oa rōna. (Esaia 64:8) A re ke re tšohleng lintho tse tšeletseng tseo bana ba li hlokang ho bo-ntate ba bona. Ntlheng ka ’ngoe re tla hlahloba kamoo ho sebelisa melao-motheo ea Bibele ho ka thusang ntate kateng hore a fe bana lintho tseo.

1 Bana ba Hloka Lerato la Ntate oa Bona

Jehova ke Ntate ea behang mohlala o motle ka ho fetisisa. Ha Bibele e hlalosa kamoo Molimo a ikutloang kateng ka Jesu, Mora oa hae oa letsibolo, e re: “Ntate o rata Mora.” (Johanne 3:35; Bakolose 1:15) Ka makhetlo a ’maloa, Jehova o ile a re o rata Mora oa hae ebile o mo amohetse. Ha Jesu a kolobetsoa, Jehova o ile a bua a le maholimong a re: “U Mora oa ka, ea ratoang; ke u amohetse.” (Luka 3:22) Ha ho mohla Jesu a kileng a ipotsa hore na ebe Ntate oa hae o fela a mo rata. Bo-ntate ba ka ithuta’ng mohlaleng oo oa Molimo?

Le ka mohla u se ke ua tsoafa ho bolella bana ba hao hore ua ba rata. Ntate oa bana ba bahlano ea bitsoang Kelvin o re: “Kamehla ke leka ho bontša bana ba ka lerato eseng feela ka ho ba bolella hore kea ba rata empa le ka ho ba bontša hore ke thahasella e mong le e mong oa bona. Ke ne ke ba chencha maleiri ke bile ke ba hlapisa.” Ho phaella moo, ho hlokahala hore bana ba hao ba tsebe hore u motlotlo ka bona. Kahoo, u se ke ua ba thata haholo, ua lula u ba khalemela. Ho e-na le hoo, ba babatse haholo. Ntate ea nang le banana ba babeli ba baroetsana ea bitsoang Donizete o fana ka keletso ena, “Ntate o lokela ho batla lintho tseo a ka babatsang bana ba hae ka tsona.” Ha bana ba hao ba tseba hore u motlotlo ka bona, ba ke ke ba ikhella fatše. Sena se tla etsa hore ba be le kamano e ntle le Molimo.

2 Bana ba Hloka Mohlala o Motle

Johanne 5:19 e re Jesu o etsa “feela seo a bonang Ntate a se etsa.” Hlokomela hore temana ena e re Jesu o ne a bona a bile a etsisa seo Ntate oa hae ‘a se etsang.’ Hangata bana le bona ba joalo. Ka mohlala, haeba ntate a hlompha mosali oa hae a bile a mo siela seriti, ho ka etsahala hore mora oa hae le eena ha a hōla a siele basali seriti a be a ba hlomphe. Hase bashanyana feela bao boitšoaro ba bona bo angoang ke mohlala oa ntate empa le banana ba ka talima banna ka tsela e itseng ka lebaka la mohlala oa ntate oa bona.

Na ho thata hore bana ba hao ba kōpe tšoarelo? Le tabeng ena mohlala ke oa bohlokoa. Kelvin o sa ntsane a hopola mohla bara ba hae ba babeli ba robang k’hamera e turu. O ile a halefa hoo a ileng a otla tafole ka feisi ea ba ea khaoha likoto tse peli. Kelvin o ile a soaba haholo ka mor’a moo eaba o kōpa tšoarelo ho bohle, ho akarelletsa le mosali oa hae kahobane a ile a sitoa ho itšoara. O lumela hore ho kōpa tšoarelo ho ile ha thusa bana ba hae; ha ba na bothata ba ho kōpa tšoarelo.

3 Ho Hlokahala Hore Bana ba be Lelapeng le Thabileng

Jehova ke “Molimo ea thabileng.” (1 Timothea 1:11) Kahoo, hoa utloahala hore ebe Mora oa hae, Jesu, o ne a thaba haholo ha a e-na le Ntate oa hae. Liproverbia 8:30 e re thusa hore re utloisise kamoo Jesu le Ntate oa hae ba neng ba utloana kateng, e re: “Ke ile ka ba mabapa le eena [Ntate] ke le mosebetsi ea hloahloa, . . . ke ntse ke nyakaletse ka pel’a hae ka nako eohle.” Ntate le Mora ba ne ba utloana hakaakang!

Ho hlokahala hore bana ba hao ba be lelapeng le thabileng. Ho bapala le bana ba hao ho ka etsa hore lelapa la lōna e be le thabileng. Ha motsoali le ngoana ba bapala, sena se etsa hore ba utloane. Felix o lumellana le sena. O na le mora oa mohlankana ’me o re: “Ho ipha nako ea ho ikhatholla le mora oa ka ho entse hore re atamelane haholo. Re bapala hammoho, re thaba ’moho le metsoalle hape re etela libaka tse thabisang. Sena se entse hore re utloane haholo.”

4 Ho Hlokahala Hore Bana ba Rutoe ho ba le Kamano e Ntle le Molimo

Jesu o ile a rutoa ke Ntate oa hae. Ke kahoo a neng a ka re: “Lintho tseo ke li utloileng ho eena [Ntate] ke li bua lefatšeng.” (Johanne 8:26) Molimo o nka ntate a ikarabella bakeng sa ho ruta bana ba hae ho itšoara hantle le ho ba le kamano e ntle le Molimo. Ha u le ntate, bo bong ba boikarabelo ba hao ke ho ruta bana melao-motheo e lokileng hore e tebele lipelong tsa bona. U hopole hore thupa e otlolloa e sa le metsi. (2 Timothea 3:14, 15) Felix o ile a qala ho balla mora oa hae lipale tsa Bibele a sa ntsane a le monyenyane. O ne a mo balla lipale tse monate le tse thahasellisang, le tse hlahang Bukeng ea ka ea Lipale Tsa Bibele.b Ha mora oa hae a ntse a hōla, Felix o ile a khetha lingoliloeng tse ling tse hlalosang Bibele tse loketseng lilemo tsa hae.

Donizete o re: “Ha ho bonolo ho etsa hore thuto ea lelapa ea Bibele e be monate. Ke habohlokoa hore batsoali ba bontše hore ba thabela ho ithuta ka Molimo, kaha bana ba hlokomela kapele haeba batsoali ba sa phethe seo ba se buang.” Carlos ea nang le bara ba bararo o re: “Re tšoara seboka sa lelapa beke le beke ho tšohla lintho tse amang lelapa la rōna. Setho ka seng sa lelapa se na le monyetla oa ho khetha hore na re tšohle eng.” Kamehla Kelvin o ne a batla monyetla oa ho buisana le bana ba hae ka Molimo hohle moo ba leng teng ho sa tsotellehe hore na ba etsa’ng. Sena se re hopotsa mantsoe a Moshe, ha a re: “Mantsoe ana ao ke u laelang ’ona kajeno a be pelong ea hao; u a rute mora oa hao ka ho pheta-pheta ’me u bue ka ’ona ha u lutse ka tlung ea hao le ha u tsamaea tseleng le ha u robetse le ha u tsoha.”—Deuteronoma 6:6, 7.

5 Ho Hlokahala Hore Bana ba Khalemeloe

Ho hlokahala hore bana ba khalemeloe e le hore ha ba hōlile ba atlehe ’me ba be le boikarabelo. Ho bonahala eka batsoali ba bang ba nahana hore ho khalemela bana ho akarelletsa ho ba khahlapetsa ebang ke ka ho ba sokela kapa ho ba hlaba ka mantsoe. Leha ho le joalo, Bibele ha e re batsoali ba lokela ho khahlapetsa bana ha ba ba khalemela. Ho e-na le hoo, batsoali ba lokela ho khalemela bana ka lerato, joaloka Jehova. (Baheberu 12:4-11) Bibele e re: “Bo-ntate, le se ke la halefisa bana ba lōna, empa le tsoele pele ho ba hōlisa ka taeo le kelello e laoloang ke Jehova.”​—Baefese 6:4.

Ka linako tse ling ho ka hlokahala hore bana ba fuoe kotlo e itseng. Leha ho le joalo, ngoana o lokela ho utloisisa hore na o fuoe kotlo e joalo ka mabaka afe. Le ka mohla batsoali ha baa lokela ho khalemela ngoana ka tsela e tla etsa hore a ikutloe eka ha a ratoe. Bibele ha e lumele hore bana ba shapuoe habohloko, hoo ba ka bang ba tsoa kotsi. (Liproverbia 16:32) Kelvin o re, “Ha ho ne ho hlokahala hore ke khalemele bana ba ka ha ba entse liphoso tse khōlō, kamehla ke ne ke leka ho ba hlalosetsa hore ke ba khalemela hobane ke ba rata.”

6 Ho Hlokahala Hore Bana ba Sireletsoe

Ho hlokahala hore bana ba sireletsoe linthong tse ka bang kotsi le metsoalleng e ka bang kotsi. Ka bomalimabe, ho na le “batho ba khopo” lefatšeng mona ba ikemiselitseng ho hlekefetsa bana ba se nang molato. (2 Timothea 3:1-5, 13) U ka sireletsa bana ba hao joang? Bibele e fana ka keletso ena e bohlale: “Ea masene ke ea boneng tlokotsi ’me a ipata, empa ba se nang phihlelo ba fetetse pele ’me ba tla fumana kotlo.” (Liproverbia 22:3) E le ho sireletsa bana ba hao tlokotsing, u lokela ho ela hloko lintho tse ka bang kotsi ho bona. Lemoha maemo a ka bakang mathata ebe u nka mehato ea ho ba sireletsa. Ka mohlala, haeba u lumeletse bana ba hao ho sebelisa Inthanete, etsa bonnete ba hore ba tseba ho e sebelisa ka tsela e ke keng ea ba bakela mathata. Ho ka ba molemo hore k’homphieutha e lule pepeneneng e le hore u ka ba beha leihlo ha ba ntse ba e sebelisa.

Ho hlokahala hore ntate a hlomelle bana ba hae a be a ba koetlise bakeng sa likotsi tse ka ’nang tsa ba hlahela lefatšeng lena leo ho lona ho nang le batho ba hlekefetsang bana. Na bana ba hao baa tseba hore na ba lokela ho etsa’ng haeba motho e mong a leka ho ba hlekefetsa ha u le sieo?c Ho hlokahala hore bana ba hao ba tsebe tšebeliso e nepahetseng le e fosahetseng ea litho tsa bona tsa botona kapa botšehali. Kelvin o re: “Ke ne ke sa batle hore motho e mong a ba rute litaba tsena, leha e le matichere a bona. Ke ne ke nka e le boikarabelo ba ka hore ke rute bana ba ka ka tsa thobalano le kotsi ea batho ba hlekefetsang bana.” Bana bohle ba hae ba ile ba hōla hantle ho fihlela e e-ba batho ba baholo ’me hona joale ba phela hamonate le balekane ba bona.

Batla Thuso ea Molimo

Mpho e khōlō ka ho fetisisa eo ntate a ka e fang bana ba hae ke ho ba thusa hore ba be le kamano e matla le Molimo. Mohlala oa ntate ke oa bohlokoa ka ho fetisisa. Donizete o re: “Ho hlokahala hore bo-ntate ba bontše hore ba nka kamano ea bona le Molimo e le ea bohlokoa. Sena se lokela ho totobala haholo-holo ha ba e-na le mathata. Linakong tse joalo, ntate o bontša hore na o tšepile Jehova hakae. Ho rapela le le lelapa le ho leboha Molimo khafetsa bakeng sa molemo oa Hae, ho tla ruta bana bohlokoa ba hore Molimo e be Motsoalle oa bona.”

Kahoo, ke eng e ka thusang motho hore e be ntate oa khonthe? Batla keletso ea motho ea tsebang ho hōlisa bana hantle ho feta leha e le mang—e leng Jehova Molimo. Haeba u koetlisa bana ba hao ho latela tataiso ea Lentsoe la Molimo, ho ka etsahala hore u bone bonnete ba se boletsoeng ho Liproverbia 22:6, e reng: “Esita le ha a tsofala a ke ke a e kheloha.”

[Mongolo o botlaaseng ba leqephe]

[Setšoantšo se leqepheng la 19]

Ho hlokahala hore ntate a behele bana ba hae mohlala o motle

[Setšoantšo se leqepheng la 20]

Ho hlokahala hore ntate a thuse bana ba hae hore ba be le kamano e ntle le Molimo

[Setšoantšo se leqepheng la 21]

Ho hlokahala hore bana ba khalemeloe ka lerato