Na Molimo o na le Lebitso?

Batho ba tloaetse ho araba tjena:

▪ “Lebitso la hae ke Morena.”

▪ “Ha a na lebitso.”

Jesu o itse’ng?

▪ “Joale, le rapele ka tsela ena: ‘Ntat’a rōna ea maholimong, lebitso la hao le ke le halaletsoe.’” (Matheu 6:9) Jesu o ne a lumela hore Molimo o na le lebitso.

▪ “Ke ba tsebisitse lebitso la hao ’me ke tla le tsebahatsa, e le hore lerato leo u nthatileng ka lona le ka ba ho bona ’me ’na ke be bonngoeng le bona.” (Johanne 17:26) Jesu o ile a tsebahatsa lebitso la Molimo.

▪ “Ho hang le ke ke la mpona ho fihlela le re, ‘Ho hlohonolofetse ea tlang ka lebitso la Jehova!’” (Luka 13:35; Pesaleme ea 118:26) Jesu o ne a sebelisa lebitso la Molimo.

MOLIMO ka boeena o re bolella lebitso la hae. Tlaleho e re o ile a re: “Ke ’na Jehova, ke lona lebitso la ka.”a (Esaia 42:8, Bibele ea Sesotho) Lebitso la Seheberu leo Molimo a iphileng lona, ka Sesotho le tsejoa e le Jehova. U ka ’na ua makatsoa ke ho tseba hore lebitso lena le ikhethang la Seheberu le hlaha ka makhetlo a likete ka libukeng tsa pele tsa Bibele tse ngotsoeng ka letsoho. Ha e le hantle, le hlaha ka makhetlo a mangata ho feta lebitso leha e le lefe le leng ka Bibeleng.

Ba bang ba ka ’na ba araba potso e reng, “Lebitso la Molimo ke mang?” ka ho re, “ke Morena.” Karabo eo ha e fane ka boitsebiso ba bohlokoa joaloka ho araba potso e reng, “Ke mang ea hapileng likhetho?” ka ho re, “ke nkhetheng.” Likarabo tseo ka bobeli ha lia hlaka hobane “Morena” le “nkhetheng” hase mabitso.

Ke hobane’ng ha Molimo a ile a re bolella lebitso la hae? O ile a re bolella lona e le hore re ka mo tseba hamolemo. Ho tea mohlala, motho a ka ’na a bitsoa Monghali, Mookameli, Ntate, kapa Ntate-moholo ho itšetlehile ka maemo. Tseo ke litlotla tse re bolellang ho itseng ka motho eo. Empa lebitso la motho eo le re hopotsa ntho e ’ngoe le e ’ngoe eo re e tsebang ka eena. Ka tsela e tšoanang, litlotla tseo tse kang Morena, Ea Matla ’Ohle, Ntate le ’Mōpi, li etsa hore re nahane ka lintho tse sa tšoaneng tseo Molimo a li entseng. Empa ke lebitso la hae feela, Jehova, le re hopotsang ntho e ’ngoe le e ’ngoe eo re e tsebang ka eena. Na u ka tseba Molimo hantle u sa tsebe lebitso la hae?

Hase feela hore re lokela ho tseba lebitso leo, empa ke habohlokoa hore re le sebelise. Hobane’ng? Hobane Bibele e re: “E mong le e mong ea ipiletsang lebitsong la Jehova o tla pholoha.”—Baroma 10:13; Joele 2:32.

[Mongolo o botlaaseng ba leqephe]

[Ntlha e Qolotsoeng e leqepheng la 6]

Motho a ka ’na a bitsoa Monghali, Mookameli, Ntate, kapa Ntate-moholo ho itšetlehile ka maemo. Empa lebitso la motho eo le re hopotsa ntho e ’ngoe le e ’ngoe eo re e tsebang ka eena