Tsela ea 4

Khetha Metsoalle ka Hloko

BIBELE E RUTA ENG? “Ea tsamaeang le batho ba bohlale o tla hlalefa.”—Liproverbia 13:20.

KE’NG E ETSANG HORE HO BE THATA? Metsoalle ea rōna e ka etsa hore re lule re khotsofatse kapa ea etsa hore re qetelle re sa khotsofale. Boikutlo ba eona le meqoqo ea eona joang kapa joang e tla ama tsela eo re talimang lintho ka eona bophelong.—1 Bakorinthe 15:33.

Ka mohlala, nahana ka tlaleho ea Bibele ea banna ba 12 ba ileng ba khutla naheng ea Kanana eo ba neng ba tsoa e hloela. Boholo ba bona ba ile ba “tlisetsa bara ba Iseraele tlaleho e mpe ka naha eo ba e hloetseng.” Leha ho le joalo, banna ba babeli ba ile ba bua hantle ka Kanana, ba re ke “naha e ntle, e ntle haholo.” Empa sechaba se ile sa hema moea o fosahetseng oa lihloela tse leshome. Tlaleho eo e re: ‘Phutheho eohle ea phahamisa lentsoe, ’me bara bohle ba Iseraele ba qala ho korotla.’—Numere 13:30–14:9.

Ka tsela e tšoanang, le kajeno batho ba bangata “ke bakorotli, ba belaelang ka tse ba hlahelang bophelong.” (Juda 16) Ho thata hore motho a lule a khotsofetse ha metsoalle ea hae e le batho ba sa khotsofaleng.

U KA ETSA’NG? Hlahloba seo le tloaetseng ho bua ka sona le metsoalle ea hao. Na hangata metsoalle ea hao e ithorisa ka lintho tseo e nang le tsona, kapa na e lula e tletleba ka lintho tseo e se nang tsona? Uena u motsoalle oa mofuta ofe ho bona? Na u etsa hore metsoalle ea hao e u khalle, kapa u e khothalletsa hore e khotsofalle seo e nang le sona?

Nahana ka mohlala oa Davida, eo e neng e tla ba morena, le Jonathane, mora oa Morena Saule. Davida e ne e ile ea e-ba mophaphathehi lefeelleng. Morena Saule o ne a hlokisoa botsitso ke Davida ’me a batla ho mo bolaea. Le hoja Jonathane e ne e lokela hore ebe ke eena mohlahlami boreneng, e ile ea e-ba motsoalle e moholo oa Davida. Jonathane o ile a hlokomela hore Molimo o ne a khethile Davida hore e be eena morena ea latelang ’me o ne a khotsofaletse seo a bile a tšehetsa motsoalle eo oa hae.—1 Samuele 19:1, 2; 20:30-33; 23:14-18.

U hloka metsoalle ea mofuta oo, metsoalle e lekang ho khotsofalla seo e nang le sona le e batlang hore u fumane lintho tse molemo. (Liproverbia 17:17) Ho hlakile hore, e le hore u be le metsoalle ea mofuta oo, uena ka bouena u lokela ho ba le litšobotsi tseo.—Bafilipi 2:3, 4.

[Setšoantšo se leqepheng la 7]

Na metsoalle ea hao e etsa hore u lule u khotsofetse kapa e etsa hore u qetelle u sa khotsofale?