Ithute Lentsoe la Molimo
Na U ka Phela ka ho sa Feleng?
Sehlooho sena se na le lipotso tseo e ka ’nang eaba u ’nile ua ipotsa tsona ’me se bontša hore na u ka fumana likarabo hokae Bibeleng. Lipaki Tsa Jehova li ka thabela ho tšohla likarabo tsena le uena.
1. Ke hobane’ng ha bophelo ba rōna bo le bokhutšoaane?
Likolopata tse ling li phela lilemo tse 150, athe lifate tse ling li phela lilemo tse 3 000. Ha li bapisoa le bophelo ba batho, batho ba phela nako e khutšoaane haholo. Leha ho le joalo, bophelo ba rōna ke ba bohlokoa ho feta ba likolopata kapa ba lifate. Jehova Molimo o bōpile batho hore ba khone ho thabela ’mino, lipapali, lijo, ho ithuta, ho hahlaula le ho etsa setsoalle le ba bang. Molimo o kentse ka lipelong tsa rōna takatso ea ho phela re sa shoe.—Bala Moeklesia 3:11.
2. Na ruri re ka phela ka ho sa feleng?
Jehova o phela ka ho sa feleng. Ha a shoe. Ke Mohloli oa bophelo, kahoo a ka khona ho fa batho bophelo bo sa feleng. (Pesaleme ea 36:9; Habakuke 1:12) Ho feta moo, o tšepisa ho fa batho ba mo mamelang bophelo bo sa feleng. O tla etsa hore ba tsofetseng ba nchafale.—Bala Jobo 33:24, 25; Esaia 25:8; 33:24.
Jesu o ile a bontša ka mesebetsi ea hae e matla hore re ka ba le tumelo tšepisong ea Molimo ea hore o tla re fa bophelo bo sa feleng bo phethahetseng. Jesu o ile a phekola mafu a mangata a ba a tsosa bafu.—Bala Luka 7:11-15, 18, 19, 22.
3. Bophelo bo sa feleng bo tla ba teng neng?
Molimo o batla hore re phele ka ho sa feleng lefatšeng la paradeise, eseng lefatšeng lena le tletseng khatello le pefo. O batla hore re ikutloe re sireletsehile. (Pesaleme ea 37:9, 29; Esaia 65:21, 22) Ha lefatše e se e le Paradeise hape, batho ba limilione ba shoeleng ba tla tsosoa. Haeba batho ba tsositsoeng ba khetha ho rapela Molimo le ho mo mamela, ba tla phela ka ho sa feleng.—Bala Luka 23:42, 43; Johanne 5:28, 29.
4. Re ka fumana bophelo bo sa feleng joang?
Ho ithuta ka Molimo ho hloka boiteko empa hase tšenyo ea nako
Ke Molimo feela ea ka re fang bophelo bo sa feleng. Kahoo, e ka ba hantle hore re be le kamano e haufi le Molimo ka hore re mo tsebe. Bibele e tšoantša ho ithuta ka Molimo le ho ja. (Matheu 4:4) Ho ja lijo hoa thabisa, empa hore u li fumane le ho li pheha ho hloka boiteko. Hoa tšoana le ka lijo tsa moea, ho iphepa tsona ho hloka boiteko. Empa na ho na le ntho e molemo ho feta ho ba le kamano e haufi le Molimo le ho fumana bophelo bo sa feleng?—Bala Luka 13:23, 24; Johanne 6:27; 17:3.