LIPOTSO TSA BIBELE LIA ARAJOA
Na bafu ba tla tsoha?
Ka sebele ’Mōpi o tla etsa hore bafu ba boele ba phele
Jehova Molimo ke Mohloli oa bophelo. (Pesaleme ea 36:9) Na hase ho utloahalang hore o tla etsa hore bafu ba boele ba phele? Bibele e re tiisetsa hore o tla ba tsosa nakong e tlang. (Bala Liketso 24:15) O tla ba tsosetsa’ng?
Qalong ’Mōpi oa rōna o ne a batla hore batho ba phele lefatšeng ka ho sa feleng. (Genese 1:31; 2:15-17) Ha e le e hantle, o ntse a batla ho phetha morero oo oa hae. O utloa bohloko ha a bona tsela eo re phelang ka eona hona joale kaha bophelo ba rōna bo tletse mathata ’me re shoa kapele.—Bala Jobo 14:1, 14, 15.
Batho ba tsositsoeng ba tla phela hokae?
Na Molimo o bōpetse batho hore ba phele leholimong? Che. Molimo o bōpetse mangeloi hore a phele leholimong empa batho bona o ba bōpetse hore ba phele lefatšeng. (Genese 1:28; Jobo 38:4, 7) Ka lebaka leo, nahana ka batho bao Jesu a ileng a ba tsosa. O ile a ba tsosetsa hona mona lefatšeng. Ka ho tšoanang, batho ba bangata ba tla tsosoa nakong e tlang ba tla phela lefatšeng.—Bala Johanne 5:28, 29; 11:44.
Leha ho le joalo, Molimo o khethile batho ba ’maloa hore ba tsosetsoe leholimong, moo ba tla ba le ’mele ea moea. (Luka 12:32; 1 Bakorinthe 15:49, 50) Batho bao ba tla busa lefatše hammoho le Kreste e le marena.—Bala Tšenolo 5:9, 10.