Setho se Secha sa Sehlopha se Busang

Hoseng ka Laboraro la la 5 September, 2012, lelapa la Bethele la United States le Canada le ile la tsebisoa hore ho khethiloe setho se secha sa Sehlopha se Busang sa Lipaki Tsa Jehova. Mor’abo rōna Mark Sanderson o ile a qala ho sebetsa kabelong eo ho tloha ka la 1 September, 2012.

Mor’abo rōna Sanderson o hōletse San Diego, California, U.S.A., a hōlisoa ke batsoali ba hae ba Bakreste, ’me o ile a kolobetsoa ka la 9 February, 1975. O qalile ho sebeletsa e le pula-maliboho Saskatchewan, Canada, ka la 1 September, 1983. Ka December 1990, o ile a qeta thupelo ea hae sehlopheng sa bosupa sa Sekolo sa ho Koetlisetsoa Bosebeletsi (seo hona joale se bitsoang Sekolo sa Bibele sa Barab’abo Rōna ba Masoha), United States. Mor’abo rōna Sanderson o ile a khethoa hore a sebeletse e le pula-maliboho ea khethehileng sehlekehlekeng sa Newfoundland, Canada, ka April 1991. Ka mor’a ho sebeletsa e le molebeli oa potoloho ea tšoereng molepo, o ile a memeloa ho ea ba setho sa lelapa la Bethele ea Canada ka February, 1997. Ka November 2000, o ile a romeloa lekaleng la United States, moo a ileng a sebetsa Lefapheng la Boitsebiso ba Litšebeletso Tsa Lipetlele ’me hamorao a sebeletsa Lefapheng la Tšebeletso.

Ka September 2008, Mor’abo rōna Sanderson o ile a ba teng Sekolong sa Litho Tsa Komiti ea Lekala ’me ka mor’a moo a khethoa e le Setho sa Komiti ea Lekala la Philippines. Ka September 2010, o ile a kōptjoa hore a khutlele United States, moo a ileng a sebeletsa e le mothusi Komiting ea Tšebeletso ea Sehlopha se Busang.