RE U LOME TSEBE?
Mosebetsi oa molaoli oa lebotho la sesole la Roma e ne e le ofe?
Seemahale sa molaoli oa lebotho la sesole, Marcus Favonius Facilis
Mangolo a Segerike a Bakreste a bua ka balaoli ba lebotho la sesole la Roma ka makhetlo a ’maloa. Ofisiri ea sesole e ileng ea laela hore Jesu a bolaoe e ne e le molaoli oa lebotho la sesole joaloka Korneliase, e leng Molichaba oa pele eo e ileng ea e-ba Mokreste. Ofisiri e ileng ea laela hore Pauluse a shapuoe hammoho le Juliase ea ileng a tsamaea le Pauluse ho ea Roma, e ne e le balaoli ba lebotho la sesole.—Mareka 15:39; Liketso 10:1; 22:25; 27:1.
Hangata molaoli oa lebotho la sesole o ne a laola masole a ka bang 50 kapa 100. Mosebetsi oa hae o ne o akarelletsa ho a koetlisa, ho a laea, ho hlahloba liaparo tsa ’ona le thepa le ho a fa litaelo nakong eo a itokisetsang ntoa.
Boemo ba molaoli oa lebotho la sesole e ne e le bo phahameng ka ho fetisisa ho masole a tloaelehileng. Balaoli ba lebotho la sesole e ne e lokela ho ba masole a tsebang ntoa a bileng a khonang ho etella pele. Ba ne ba lokela ho etsa bonnete ba hore lebotho la Roma le tseba ntoa ebile lea laoleha. Buka e ’ngoe e bontša hore balaoli ba lebotho la sesole “hangata e ne e e-ba banna ba nang le tsebo e ngata le boiphihlelo bo phahameng.”
Liipone tsa mehleng ea boholo-holo li fapane joang le tsa kajeno?
Seipone sa mehleng ea boholo-holo sa Egepeta
Liipone tsa mehleng ea boholo-holo li fapane le tsa kajeno tse entsoeng ka khalase, tsona li ne li etsoa ka tšepe e bentšitsoeng, hangata li etsoa ka boronse, ’me ka linako tse ling li etsoa ka koporo, silevera, khauta kapa khauta e kopantsoeng le silevera. Bibele e buile ka liipone ka lekhetlo la pele ha e ne e bua ka ho hahuoa ha tabernakele e leng sebaka sa pele sa Baiseraele sa borapeli. Basali ba ne ba fana ka liipone ha ho etsoa beisine ea koporo le seluloana sa eona. (Exoda 38:8) E le hore beisine ea koporo le seluloana sa eona li etsoe, mohlomong liipone tseo li ne li lokela ho qhibilihisoa pele.
Liipone tse epolotsoeng Iseraele le mathōko a eona hangata li fumanoe li e-na le mahakoe hammoho le lintho tse ling tsa mokhabo oa basali. Liipone tse tloaelehileng li ne li le chitja, ’me moo li tšoaroang teng e le lehong, lenaka la tlou kapa tšepe, ’me sebōpeho sa tsona e le sa ’mele oa mosali. Hangata ho ne ho se letho le behoang karolong ea sona e ka morao.
Liipone tsa mehleng ea boholo-holo li ne li le lerootho ’me li sa hlaka joaloka tsa kajeno. Mohlomong sena se re thusa ho utloisisa mantsoe a moapostola Pauluse ha a ne a re: “Hona joale re bona ka setšoantšo se lerootho ka seipone sa tšepe.”—1 Bakorinthe 13:12.