SEHLOOHO SE KA NTLE | LIPAKI TSA JEHOVA KE BO-MANG?
Ke hobane’ng ha re buisana le batho ka Bibele?
Ho ka etsahala hore re tsebahala haholo ka mosebetsi oa rōna oa ho buisana le batho ka Bibele ka ntlo le ntlo, libakeng tsa sechaba le hohle moo re ba fumanang teng. Ke hobane’ng ha re etsa mosebetsi oo?
Lipaki Tsa Jehova li etsa mosebetsi ona e le hore li tlotlise Molimo le ho tsebisa batho lebitso la hae. (Baheberu 13:15) Re boetse re batla ho mamela taelo ea Kreste Jesu e reng: “Ka hona e-eang ’me le etse batho ba lichaba tsohle barutuoa, . . . le ba rute ho boloka lintho tsohle tseo ke le laetseng tsona.”—Matheu 28:19, 20.
Ho feta moo, re rata baahelani ba rōna. (Matheu 22:39) Ke ’nete hore rea hlokomela hore batho ba bangata ba na le bolumeli ba bona le hore hase bohle ba thahasellang molaetsa oa rōna. Empa re lumela hore lithuto tsa Bibele li pholosa bophelo. Ke ka lebaka leo re tsoelang pele re “sa khaotse ho ruta le ho bolela litaba tse molemo mabapi le Kreste,” joaloka Bakreste ba mehleng ea baapostola.—Liketso 5:41, 42.
Antonio Cova Maduro, eo e leng setsebi sa thuto ea kahisano o ile a ngola a re, “Lipaki Tsa Jehova li etsa boiteko ba . . . hore litaba tsa Bibele li fihle hohle lefatšeng.”—Koranta ea El Universal, Venezuela
Batho ba bangata ba balang lingoliloeng tsa rōna hase Lipaki Tsa Jehova. Ba bangata bao re ithutang Bibele le bona ke litho tsa malumeli a mang. Empa ba thabela hore ebe Lipaki Tsa Jehova lia ba etela.
Haeba u na le lipotso tseo u ipotsang tsona ka Lipaki Tsa Jehova, u ka fumana likarabo ka hore u
Botse e mong oa Lipaki Tsa Jehova.
Kene websaeteng ea rōna ea www.pr418.com.
Etele libokeng tsa rōna moo ho amoheloang batho bohle ’me ba sa batloe koleke.