SEHLOOHO SE KA NTLE
Molimo o Ikutloa Joang ka Ntoa?
U ka araba potso eo joang? Batho ba bangata ba nahana hore Molimo ha a tsotelle ha batho ba loana. Ba re Bibele e tiisa hore nakong e fetileng, Molimo o ile a khothalletsa barapeli ba bang ba hae hore ba loane. Leha ho le joalo, ba bang baa hlokomela hore Jesu, Mor’a Molimo o ile a ruta barutuoa ba hae hore ba rate lira tsa bona. (Matheu 5:43, 44) Kahoo, ba nahana hore Molimo o ile a fetola maikutlo a hae ka ntoa ’me kajeno o khahlanong le eona.
Uena u re’ng? Na Molimo o khothalletsa batho ho loana? Haeba ho joalo, o tšehetsa lehlakore lefe? Ho tseba likarabo tsa lipotso tsena ho ka u thusa hore u hlahlobe tsela eo u ikutloang ka eona ka ntoa. Ka mohlala, haeba u ne u ka bolelloa hore Molimo o khothalletsa batho ho loana ebile o tšehetsa lehlakore la hao ntoeng e itseng, mohlomong u ne u tla thaba hobane u tseba hore le tla hlōla. Ka lehlakoreng le leng, u ne u tla ikutloa joang haeba u bolelloa hore Molimo o tšehetsa ba lireng? Mohlomong maikutlo a hao a ne a tla fetoha.
Ke habohlokoa hore u tsebe hore na Molimo o ikutloa joang ka ntoa, kaha seo se ka ama tsela eo u mo talimang ka eona. Haeba u e mong oa batho ba limilione ba anngoeng ke ntoa, ha ho pelaelo hore u batla ho tseba karabo ea potso e reng, Na batho ba reng Molimo ke mohlohlelletsi oa ntoa, ebile ha a tsotelle batho ba hateletsoeng ba nepile?
U ka ’na ua makala ha u utloa hore Bibele e araba potso eo ka tsela e fapaneng hōle le maikutlo a batho bao. Ho phaella moo, tsela eo Molimo a ’nileng a talima ntoa ka eona ha e-s’o fetohe. A re ke re hlahlobeng hore na Bibele e re Molimo o ne a ikutloa joang ka ntoa mehleng ea khale le mehleng ea Jesu. Seo se tla re thusa ho bona hore na Molimo o ikutloa joang ka ntoa kajeno le hore na e tla ke e ee moriting.