LIPOTSO TSA BIBELE LIA ARAJOA
Na re ka tseba seo e leng ’nete ka Molimo?
Ke hobane’ng ha Molimo a batla hore re tsebe ’nete? Bala Johanne 17:3
Molimo o ile a buisana le batho. A sebelisa moea oa hae o halalelang kapa matla a hae, o ile a susumelletsa bangoli ba Bibele hore ba ngole mehopolo ea hae. (2 Petrose 1:20, 21) Re ka tseba seo e leng ’nete ka Molimo ha re bala Bibele.—Bala Johanne 17:17; 2 Timothea 3:16.
Molimo o senola lintho tse ngata ka eena ka Bibeleng. O re tsebisa hore na ke hobane’ng ha a bōpile batho, o rera ho ba etsetsa’ng nakong e tlang le hore na o batla hore re phele joang. (Liketso 17:24-27) Jehova Molimo o batla hore re tsebe seo e leng ’nete ka eena.—Bala 1 Timothea 2:3, 4.
Lebaka leo Molimo a amohelang batho ba ratang ’nete
Jehova ke Molimo oa ’nete, ’me o ile a romela Mor’a hae, Jesu hore a tl’o ruta batho ’nete. Kahoo, batho ba ratang ’nete ba rata Jesu. (Johanne 18:37) Molimo o amohela borapeli ba batho ba joalo.—Bala Johanne 4:23, 24.
Satane Diabolose o thibetse batho ba bangata ho tseba Molimo ka hore a phatlalatse lithuto tsa mashano mabapi le Molimo. (2 Bakorinthe 4:3, 4) Batho ba sa rateng se molemo ba rata lithuto tseo. (Baroma 1:25) Empa batho ba bangata ba ratang ’nete ba tseba seo e leng ’nete ka Molimo ha ba ithuta Bibele.—Bala Liketso 17:11.