SEHLOOHO SE KA NTLE | LEBAKA LA HORE U TŠEPAHALE!

Kamoo Bolotsana bo ka U Amang

“Bophelong, ho lula e-na le mathata a ka rarolloang feela ka hore motho a etse bolotsananyana.”—Samantha, oa Afrika Boroa.

Na u lumellana le maikutlo ao? Joaloka Samantha, kaofela re kile ra tobana le maemo a boima ka tsela e itseng. Tsela eo re etsang lintho ka eona ha re le maemong ao, e bontša hore na ke mekhoa efe eo re e nkang e le ea bohlokoa. Ka mohlala, haeba re tšaba ho hlajoa ke lihlong, re ka ’na ra nahana hore ho loketse ho etsa bolotsana maemong a itseng. Leha ho le joalo, ha ’nete e hlahella, hangata bolotsana bo beha motho ka mosing. Ak’u nahane ka lintlha tse latelang.

BOLOTSANA BO ETSA HORE BATHO BA SE KE BA TŠEPANA

Botšepehi ke motheo oa hore batho ba tšepane. Ha batho ba babeli ba tšepana, ba ikutloa ba phutholohile ebile ba sireletsehile. Empa ho tšepana ha ho be teng ka ho panya ha leihlo. Batho ba matlafatsa ho tšepana ha ba qeta nako ba le ’moho, ba buisana ka botšepehi ebile e se baithati. Leha ho le joalo, ho tšepana ho ka fela ka tšohanyetso ka lebaka la ketso e le ’ngoe feela ea bolotsana. Joale, ha batho ba se ba sa tšepane, ha ho bonolo hore ba boele ba tšepane.

Na u kile ua thetsoa ke motho eo u neng u nahana hore ke motsoalle oa hao oa bohlokoa? Haeba ho joalo, u ile ua ikutloa joang? Mohlomong u ile ua utloa bohloko, ua nka hore o u tsoile tlaase. Hoa utloahala hore ebe u ile ua ikutloa joalo. Ha ho pelaelo hore bolotsana bo ka senya kamano ea bohlokoa eo batho ba nang le eona le ba bang.

BOLOTSANA BO TSOALA BOLOTSANA

Phuputsong e ileng ea etsoa ke Robert Innes, eo e leng moprofesa oa lithuto tsa khoebo Univesithing ea California, o ile a fumana hore “ehlile batho ba tšoaetsana bolotsana.” Kahoo, bolotsana bo ka tšoantša le kokoana-hloko e bakang mafu—ha u qeta nako e ngata u e-na le motho ea bolotsana, u ipeha kotsing e khōlō ea hore a u “tšoaetse” bolotsana.

U ka etsa’ng hore u se ke ua oela lerabeng la ho ba bolotsana? Bibele e ka u thusa. Re kōpa hore u ke u hlahlobe melao ea Bibele e seng mekae.

Mekhoa e sa Tšoaneng ea ho se Tšepahale

Ho bua leshano

KE ENG? Ho bua leshano ke ho se bolelle motho ’nete eo a nang le tokelo ea ho e tseba. Ho bua leshano ho kopanyelletsa ho sotha litaba ka morero oa ho khelosa motho, ho pata lintlha tse itseng e le ho isa motho le khongoana holimo, kapa ho feteletsa ’nete ka sepheo sa ho thetsa motho e mong.

SEO BIBELE E SE BUANG: “Motho ea mano ke ntho e manyala ho Jehova, empa o na le kamano e haufi-ufi le ba lokileng.” (Liproverbia 3: 32) “Kaha joale le lahlile leshano, e mong le e mong oa lōna a bue ’nete le moahelani oa hae.”—Baefese 4:25.

Ho etselletsa

KE ENG? Ke ho bua leshano le lipolelo tse bontšang lehloeo, tse reretsoeng ho senya motho e mong lebitso.

SEO BIBELE E SE BUANG: “Motho ea bolotsana o ntse a hlahisa ho hloka kutloano, ’me moetselletsi o arola ba tloaelaneng.” (Liproverbia 16:28) “Moo ho se nang patsi mollo oa tima, ’me moo ho se nang moetselletsi khang ea emisa.”—Liproverbia 26:20.

Bomenemene

KE ENG? Ke ho susumelletsa motho e mong hore a fane ka chelete kapa thepa e le hore a ikhakanye.

SEO BIBELE E SE BUANG: “U se ke ua etsa bolotsana ho mosebetsi ea hiriloeng ea khathatsong le ea futsanehileng.” (Deuteronoma 24:14, 15) “Ea etsetsang ea tlaase bolotsana o nyelisitse Moetsi oa hae, empa ea bontšang mohau ho ea futsanehileng oa Mo tlotlisa.”—Liproverbia 14:31.

Ho utsoa

KE ENG? Ke ho nka thepa ea motho e mong empa a sa u lumella.

SEO BIBELE E SE BUANG: “Ea utsoang a se ke a hlola a utsoa, empa ho e-na le hoo, a sebetse ka thata, a etse mosebetsi o molemo ka matsoho a hae, e le hore a ka ba le ho hong hoo a ho abelang ea hlokang.” (Baefese 4:28) “Le se ke la khelosoa. . . . Masholu, kapa batho ba meharo, kapa matahoa, kapa ba litlhapa, kapa bahanyapetsi ba ke ke ba rua ’muso oa Molimo.”—1 Bakorinthe 6:9, 10.