“Ha re Tele”!

1. Re ka thusoa ke’ng hore re qete peisong ee ea bophelo?

BOPHELO ba Bakreste bo tšoantšoa le ho ba peisong. Ebang re sa tsoa kena peisong ena kapa e se e le lilemo re matha, re lokela ho tsoela pele re matha ho fihlela kholeng. Keletso eo moapostola Pauluse a ileng a e-fa Bakreste ba Filipi, e ka re khothatsa hore le rona re mamelle ho fihlela qetellong. Bakreste ba bang ba phutheho eo ba ne ba se ba e-na le lilemo ba sebeletsa Jehova ha Pauluse a ngola lengolo lena. E ne e se e le nako ba matha peisong ena, empa Pauluse o ile a ba hopotsa bohlokoa ba ho mamella ho fihlela kholeng. O ne a batla hore ba latele mohlala oa hae oa ho lula ba “phehella pakaneng bakeng sa moputso.”​—Bafil. 3:14.

2. Ke hobane’ng ha keletso eo Pauluse a ileng a e fa Bakreste ba Filipi e ne e loketse?

² Keletso eo Pauluse a ileng a e fa Bakreste ba Filipi e ne e loketse. Ho tloha qalong feela, haesale Bakreste ba moo ba hlorisoa. Mathata ana a qalile ka selemo sa 50 ha Pauluse le Silase ba fihla Filipi ka mor’a hore ba amohele memo ea hore ba ‘tšelele Macedonia.’ (Lik. 16:9) Ha ba fihla moo, ba ile ba kopana le Lydia, ea ileng a ba mamela “’me Jehova a bula pelo ea hae haholo” bakeng sa litaba tse molemo. (Lik. 16:​14) Ho e-s’o ee kae o ile a kolobetsoa hammoho le bohle ba lelapa la hae. Empa e ile ea ba ba khoathile tsa semana. Ba boholong motseng oo ba ile ba isa Pauluse le Silase makhotleng, ba ba qosa ka hore ba bakile pherekano motseng. Ka lebaka leo, Pauluse le Silase ba ile ba khakhathoa, ba isoa chankaneng, eaba hamorao ba laeloa hore ba tlohe motseng oo. (Lik. 16:​16-40) Na ba ile ba tela? Le khale! Joale, bara le barali babo rona ba phuthehong ee e ncha ba ile ba etsa’ng? Ntho e ntle ke hore le bona ba ile ba mamella! Ha ho potang hore ba ile ba tiisoa moko ke mohlala o motle oa Pauluse le Silase.

3. Pauluse o ne a ikemiselitse ho etsa’ng, hona re tl’o araba lipotso life?

³ Pauluse o ne a ikemiselitse ho mamella. (2 Bakor. 4:​16) Leha ho le joalo, o ne a tseba hore ntho e ka mo thusang hore a mamelle peisong ke hore a se ke a lumella letho ho mo sitisa. Re ithuta’ng mohlaleng oa Pauluse? Na ho na le mehlala ea Bakreste ba mehleng ee ba ileng mamella e ka re thusang? Tšepo eo re nang le eona bakeng sa bokamoso e ka re thusa joang hore re se ke ra tela?

MOHLALA OA PAULUSE O KA RE THUSA JOANG?

4. Pauluse o ile a phathahana ka eng tlas’a maemo ao a neng a le ho ’ona?

⁴ Ak’u nahane ka maemo ao Pauluse a neng a le ho ’ona ha a ne a ngolla Bafilipi. O ne a tšoeroe ’me a koaletsoe ntlong eo a neng a lula ho eona Roma. O ne a sa khone ho tsoa a il’o bolella batho litaba tse molemo. Empa o ile a iphathahanya ka ho pakela batho ba neng ba mo etela le ho ngolla liphutheho tse hole mangolo. Mehleng ena, Bakreste ba bangata ba sa khoneng ho tsoa ka tlung ba il’o bolela litaba tse molemo ba pakela batho ba ba etelang. Ba boetse ba ngolla beng ba matlo ao re sa khoneng ho ba fumana ha re ile matlong a bona.

5. Ho ea ka Bafilipi 3:​12-14, Pauluse o ile a thusoa ke’ng hore a lule a mameletse?

⁵ Pauluse ha aa ka lumella lintho tse ntle kapa tse mpe tseo a li entseng nakong e fetileng, li mo sitise ho sebeletsa Jehova. Ke kahoo a ileng a re “ha ke lebala lintho tse ka morao” ’me ke “hahamalla linthong tse ka pele,” seo ke sa bohlokoa e le hore nka fihla kholeng peisong ena ea bophelo. (Bala Bafilipi 3:​12-14.) Ke lintho life tseo li neng li ka ’na tsa sitisa Pauluse? Ea pele, pele Pauluse e e-ba Mokreste e ne e le motho ea hlaheletseng har’a Bajuda. Empa o ile a nka lintho tseo kaofela “e le lithole tse ngata.” (Bafil. 3:​3-8) Ea bobeli, le hoja e ka ’na eaba o ne a utloisoa bohloko ke hore o kile a hlorisa Bakreste, ha aa ka lumella seo hore se mo nyahamise. Ea boraro, ha aa ka nka hore o se a finyeletse lintho tse ngata haholo tšebeletsong ea Jehova, kahoo a ka khoehlisa. Pauluse o ile a khatha tema e kholo tšebeletsong le hoja a ile a isoa chankaneng, a khakhathoa, a tlepetsoa ka majoe, a robeheloa ke sekepe, a haelloa ke lijo, a ba a hloka liaparo. (2 Bakor. 11:​23-27) Ho sa tsotellehe maemo ana kaofela, Pauluse o ne a tseba hore o lokela ho tsoela pele a mameletse ho fihlela qetellong. Le rona re lokela ho mo etsisa.

6. Ke lintho life tse ka morao tseo re ka ’nang ra lokela ho li lebala?

⁶ Re ka etsisa Pauluse joang ka ho “lebala lintho tse ka morao”? Ba bang ba rona e ka ’na eaba re ntse ba ikutloa re sa tšoanelehe ka lebaka la libe tseo re li entseng nakong e fetileng. Haeba re ntse re ikutloa joalo, re khothaletsoa hore nakong eo re ithutang re le bang re ke re khethe ho ithuta ka sehlabelo sa Jesu sa thekollo. Ha re ithuta ka sehlooho sena se khothatsang, re thuisa ka sona, re bile re rapela, se ka ’na sa re thusa hore re imolohe. Re ka ba ra khaotsa ho ikutloa re sa tšoanelehe ka lebaka la libe tseo Jehova a seng a re tšoaretse tsona. Ho na le ntho e ’ngoe hape eo re ka ithutang eona ho Pauluse. E ka ’na eaba ba bang ba tlohetse mesebetsi e hlamatsehang e le hore ba eketse nako ea bona tšebeletsong ea Jehova. Haeba ho joalo, na re ka lebala lintho tse ka morao ka hore re se ke ra lula re nahana ka lintho tseo re ka beng re e-na le tsona hoja ra se ke ra tlohela mosebetsi? (Num. 11:​4-6; Moek. 7:​10) “Lintho tse ka morao” li ka ’na tsa akareletsa lintho tseo re li finyeletseng tšebeletsong ea Jehova, kapa mathata ao re ileng ra khona ho a mamella nakong e fetileng. Ke ’nete hore ha re nahana ka lintho tseo Jehova a re thusitseng ka tsona nakong e fetileng, seo se ka etsa hore re mo rate le ho feta. Empa, ha re batle hore le ka mohla re ikutloe eka re se re entse ho lekana.​—1 Bakor. 15:58.

7. Ho ea ka 1 Bakorinthe 9:​24-27, re lokela ho etsa’ng e le hore re tle re fumane moputso? Hlalosa.

⁷ Pauluse o ne a utloisisa hantle mantsoe a Jesu a reng: “Ikitlaetseng ka matla.” (Luka 13:​23, 24) Pauluse o ne a tseba hore feela joaloka Jesu le eena o lokela ho ikitlaetsa bophelo bohle ba hae. Ke kahoo a ileng a tšoantša bophelo ba rona le ho ba peisong. (Bala 1 Bakorinthe 9:​24-27.) Semathi se peisong se lula se nahana ka ho fihla kholeng, ’me ha se lumelle letho ho se sitisa. Mohlala, limathi li ka ’na tsa matha sebakeng se haufi le mabenkele, le moo ho nang le lintho tse ling tse ka ’nang tsa li ferekanya. Na u nahana hore ho na le semathi se seng se ka emang eaba se sheba lintho tse ka mabenkeleng? Ha ho na se ka etsang joalo haeba se batla ho hlola! Kaha le rona re peisong ea bophelo, re lokela ho qoba lintho tse ka re sitisang. Haeba re lula re nahana ka se larileng ka pele, ’me re sebeletsa Jehova ka cheseho joaloka Pauluse, re tla fumana moputso!

SEBELETSA JEHOVA LE HAR’A MATHATA

8. Re tl’o ithuta ka lintho life tse tharo tse ka re nyahamisang?

⁸ Joale a re ke re hlahlobeng lintho tse tharo tse ka re nyahamisang. Ke ha litabatabelo tsa rona li sa phethahale, ho kula kapa botsofali le liteko tse sa eeng moriting. Ho ithuta hore na batho ba bang ba ile ba mamella mathata ana joang ho ka re thusa.​—Bafil. 3:17.

9. Re ikutloa joang ha lintho tseo re li labalabelang li sa phethahale?

⁹ Litabatabelo tse sa phethahaleng. Ka tlhaho re labalabela hore lintho tseo Jehova a re tšepisitseng tsona li phethahale. Ha Habakuke a ne a kopa Jehova hore a felise lintho tse bohloko Juda, Jehova o ile a re ho eena, “u lule u . . . lebeletse.” (Hab. 2:3) Empa ha lintho tseo re labalabelang hore li phethahale li bonahala li lieha, re ka ’na ra nyahama. Re ka ba ra qetella re sa batle ho etsa letho. (Liprov. 13:​12) Sena se ile sa etsahalla barab’abo rona ba bang ka selemo sa 1914. Ka nako eo, batlotsuoa ba bangata ba ne ba lebeletse hore ba tl’o nyolohela leholimong. Empa ha tabatabelo eo e sa phethahale ba ile ba etsa’ng?

10. Banyalani ba bang ba ile ba thusoa ke’ng ha ntho eo ba e lebeletseng e sa phethahale?

¹⁰ A re ke re hlahlobeng mehlala ea Bakreste ba babeli ba ileng ba hlola ho nyahama hona. Mor’abo rona Royal Spatz o ile a kolobetsoa ka 1908 ha a le lilemo li 20. O ne a kholisehile hore haufinyane o ea leholimong. Ka 1911 ha a ne a kopa Morali’abo rona Pearl hore ba nyalane, o ile a re ho eena: “Na oa tseba hore na ho tl’o etsahala’ng ka 1914? Haeba u lumela hore re nyalane, ke hore re hle re potlake!” Na banyalani baa ba ile ba khaotsa ho matha peisong ea bophelo ha ba sa fumane moputso oa bona oa ho ea leholimong ka 1914? Che, hobane ntho ea bohlokoa haholo ho bona e ne e le ho sebeletsa Jehova, eseng ho ea leholimong. Ba ne ba ikemiselitse ho mamella peisong ena. Kahoo, ba ile ba sebeletsa Jehova ka lilemo tse ngata ka morao ho moo ho fihlela ba hlokahala. Ha ho potang hore u labalabela ho bona nako eo ka eona Jehova a tlang ho tlosa qoso lebitsong la hae, a pake hore ke eena ’Musi ea loketseng a be a phethahatse litšepiso tsohle tsa hae. U ka kholiseha hore lintho tsena tsohle li tla phethahala ka nako eo Jehova a e khethileng. Ho fihlela ka nako eo, e se eka re ka lula re phathahane tšebeletsong ea Jehova, ’me re se ke ra lumella litabatabelo tsa rona li re nyahamise ha re bona li sa phethahale ka nako eo re e lebeletseng.

11-12. Ke hobane’ng ha re lokela ho lula re sebeletsa Jehova ka botšepehi esita leha re se re se na matla joaloka pele? Fana ka mohlala.

¹¹ Ho kula kapa botsofali. Semathi se hloka ho ba le matla e le hore se lule se le sehlahlo peisong, empa rona ha re hloke ho ba sehlahlo e le hore re lule re e-na le tumelo e matla re bile re chesehela tšebeletso. Ha e le hantle, ho na le batho ba bangata ba seng ba se mahlaha-hlaha empa ba ntse ba rata ho sebeletsa Jehova. (2 Bakor. 4:​16) Mohlala, ha Mor’abo rona Arthur Secord a le lilemo li 88 o ne a se a qetile lilemo tse 55 a sebeletsa Bethele, ’me joale a se a fokolloa ke bophelo. Ka letsatsi le leng mooki o ile a tla betheng ea hae ho tla mo thusa. Eaba mooki eo o re ho eena: “Mor’abo rona Secord, u se u khathile tema e kholo tšebeletsong ea Jehova.” Leha ho le joalo, Mor’abo rona Secord o ne a sa lule a nahana ka lintho tseo a li entseng nakong e fetileng. O ile a sheba mooki eo eaba o re ho eena: “E, ke ’nete. Empa lintho tseo re li entseng nakong e fetileng ha se tsona tsa bohlokoa. Taba ea bohlokoa ke hore re lule re tšepahala.”

¹² Mohlomong u ’nile oa sebeletsa Jehova ka lilemo tse ngata empa hona joale bokuli bo se bo u khina ho sebetsa joaloka pele. Haeba ho joalo, u se ke oa nyahama. Kholiseha hore Jehova o tla lula a hopola mesebetsi e metle eo u ileng oa e etsa nakong e fetileng. (Baheb. 6:​10) Hona joale, lula u hopola hore taba ea hore na re rata Jehova hakae ha e pakoe ke boholo ba mesebetsi eo re mo etsetsang eona. Empa re bontša hore re rata Jehova ha re etsa sohle seo matla a rona a re lumellang hore re se etse. (Bakol. 3:​23) Jehova o tseba moo matla a rona a fellang teng ’me ha a batle hore re mo etsetse ho fetang hoo.​—Mar. 12:​43, 44.

13. Ho ile ha etsahala’ng ka Mor’abo rona Melnik le mohats’ae Lidiya, hona re ithuta’ng mohlaleng oa bona?

¹³ Liteko tse sa eeng moriting. Bahlanka ba bang ba Jehova ba ’nile ba mamella liteko le mahloriso ka lilemo tse ngata. Mohlala, Mor’abo rona Anatoly Melnikb o ne a le lilemo li 12 ha ntate oa hae a tšoaroa ’me a isoa teronkong, eaba hamorao o isoa Siberia, e bohole ba lik’hilomithara tse ka holimo ho 7 000 ho tloha moo ba lulang Moldova. Selemo hamorao, Mor’abo rona Anatoly le ’mè oa hae, hammoho le batsoali ba ’mè oa hae ba ile ba isoa Siberia. Ha nako e ntse e ea, ba ile ba khona ho ea libokeng motseng o mong, empa ba ne ba lokela ho tsamaea lik’hilomithara tse ka bang 30 lehloeng, ho bile ho bata haholo. Hamorao, Mor’abo rona Melnik o ile a hoehla lilemo tse tharo teronkong, a siile mohats’ae le morali oa bona ea neng a e-na le selemo feela. Le hoja Mor’abo rona Melnik le lelapa la hae ba ile ba phela nako e telele ka har’a mathata, ba ile ba tsoela pele ba sebeletsa Jehova ka botšepehi. Hona joale o lilemo li 82, ’me o sebeletsa e le setho sa Komiti ea Lekala la Central Asia. Joaloka Mor’abo rona Melnik le mohats’ae Lidiya, e se eka le rona re ka etsa sohle seo re ka se khonang tšebeletsong ea Jehova ’me re lule re mameletse.​—Bagal. 6:9.

LULA U NAHANA KA TŠEPO EO RE NANG LE EONA

14. Pauluse o ne a tseba hore o lokela ho etsa’ng e le hore a tle a fumane moputso oa hae?

¹⁴ Pauluse o ne a kholisehile hore o tla fihla kholeng ’me a fumane moputso oa hae. Kaha ke motlotsuoa o ne a e-na le tšepo ea ho fumana “moputso oa pitso ea holimo ea Molimo.” Empa e le hore a tle a fumane moputso oo, o ne a tseba hore o lokela ho lula a “phehella.” (Bafil. 3:​14) Pauluse o ile a etsetsa Bafilipi papiso e neng e tla ba thusa ho lula ba letetse moputso oa bona.

15. Pauluse o ile a etsa mohlala ofe e le ho thusa Bafilipi ho bona bohlokoa ba ho lula ba “phehella”?

¹⁵ Pauluse o ile a hopotsa Bafilipi hore qetellong ba tla ea phela leholimong. (Bafil. 3:​20) Ke hobane’ng ha ba ne ba lokela ho hopola taba ee? Mehleng eo, batho ba ne ba rata ho ba baahi ba Roma kaha ho ne ho e-ba le melemo e mengata.c Leha ho le joalo, batlotsuoa e ne e tl’o ba baahi ba ’muso o moholo le ho feta, le o nang le melemo e mengata ho feta eo. Ho ba moahi oa Roma e ne e se ntho ea bohlokoa hakaalo ha e bapisoa le ho ea leholimong! Ka lebaka leo, Pauluse o ile a khothaletsa Bafilipi hore ba “itšoare ka mokhoa o tšoanelang litaba tse molemo tse mabapi le Kreste” e le hore e ka ba baahi ba ’Muso oa Molimo. (Bafil. 1:​27) Le kajeno batlotsuoa ba ntse ba beha mohlala o motle tabeng ena.

16. Ebang re na le tšepo ea ho ea phela leholimong kapa ea ho tla phela paradeiseng, re lokela ho etsa’ng ho latela Bafilipi 4:​6, 7?

¹⁶ Ebang re na le tšepo ea ho ea phela leholimong kapa ea ho tla phela paradeiseng lefatšeng mona, re lokela ho mamella ho fihlela re fumane moputso oo. Ho sa tsotellehe hore na ke’ng eo re lokelang ho e mamella, ha rea lokela ho lula re nahana ka lintho tsa nakong e fetileng, empa re lokela hore re se ke ra lumella letho ho re thibela ho sebeletsa Jehova. (Bafil. 3:​16) Mohlomong re se re eme nako e telele re letetse ho bona ha litšepiso tsa Jehova li phethahala, kapa re se re holile ’me ha re sa na matla joaloka pele. E ka ’na eaba re ile ra lokela ho mamella liteko le mahloriso ka lilemo tse ngata. Ho sa tsotellehe hore na boemo ba hao ke bofe, u se ke oa “tšoenyeha ka letho.” Empa u rapele Jehova ’me u mo bolelle lintho tsohle tse u tšoenyang, kaha o tla u fa khotso e fetang ntho efe kapa efe eo u ka e nahanang.​—Bala Bafilipi 4:​6, 7.

17. Re tl’o ithuta’ng sehloohong se latelang?

¹⁷ Feela joalokaha semathi se ikitlaetsa peisong, e se eka le rona re ka matha ka mamello peisong ena ea bophelo ho fihlela re fihla kholeng. Joaloka semathi se tiisang le ho feta ha se le haufi le mola oa tlholo, e se eka le rona re ka etsa sohle seo re ka se khonang hore re mamelle ho fihlela qetellong kaha re se re le haufi. Re ka etsa’ng e le hore re lule re matha tseleng e nepahetseng, ebile e le ka lebelo leo re ka le khonang? Sehlooho se latelang se tl’o re thusa ho bona hore na re ka etsa’ng e le hore re tsebe lintho tse tlang pele bophelong le hore na re ka etsa’ng e le hore re khone ho “nepisisa lintho tsa bohlokoa haholo.”​—Bafil. 1:​9, 10.