Karolo ea Hao ho Etseng Hore Liboka li Ruise Molemo
1 Liboka tsa rōna li re thusa ho tloaelana hamolemonyana le Jehova. Li re thusa ho utloisisa melao ea hae le melao-motheo ’me li re khothalletsa ho phela ka eona. Liboka li re lokisetsa ho ba le kabelo e atlehileng haholoanyane mosebetsing oa ho bolela o pholosang bophelo. ’Me li re thusa ho finyella pakane ea rōna ea bophelo bo sa feleng lefatšeng le lecha la Molimo. Lihora tseo re li sebelisang re le ’moho libokeng li tla re tlisetsa molemo o moholohali haeba ka bomong re phetha karolo ea rōna ho etsa hore liboka li be molemo.
2 Ho na le linotlolo tse tharo tsa ho etsa hore liboka li be molemo—tokisetso, ho kopanela ka ho fana ka litlhaloso, le ho sebelisa se boletsoeng. Lintho tsena lia amana. Tokisetso e ntle e etsa hore ho kopanela ka ho fana ka litlhaloso ho be bonolo le ho thabisa. Lipolelo tse thabisang, tse mafolo-folo tsa tumelo li khothatsa le ho susumetsa ba mametseng. (Ba-Ef. 4:29) Ho na le monyetla o moholo oa hore ba leng teng ba tla sebelisa seo ho buuoang ka sona haeba ba se utloisisa le ho thusoa hore ba ananele kamoo boitsebiso boo bo ka sebelisoang ka litsela tse sebetsang bophelong ba bona le ho thuseng ba bang hore ba fetohe barutuoa.
THUTO EA MOLULA-QHOOA LE THUTO EA BUKA EA PHUTHEHO
3 Thuto ea Molula-Qhooa le Thuto ea Buka ea Phutheho ke liboka tsa bohlokoa haholo hobane ka tsona “mohlanka ea khabane, ea bohlale” o fepa ba ntlo ea tumelo. (Matt. 24:45-47) Na u behella nako ka thōko bakeng sa ho ithuta boitsebiso boo ho tla buisanoa ka bona? Na u itokiselitse ho fana ka litlhaloso libokeng? Ka ho hlakileng, u phetha karolo ea bohlokoa ntlheng ena.
4 Haeba u ithutile ka hloko boitsebiso ba Thuto ea Molula-Qhooa kapa Thuto ea Buka ea Phutheho, u tla ba boemong bo loketseng ba ho kopanela thabong e khōloanyane ea ho fana. (Lik. 20:35) Ba bangata ba fumana ho thusa ho thalla mantsoe a sehlooho. Ka ho phetla mangolo a sa qotsoang le ho nahanisisa ka hore na a sebetsa joang, u tla fumana kutloisiso ea motheo oa Mangolo bakeng sa likarabo tseo. Joale na u ka arabela ka mantsoe a hao, kapa na u ntse u tlameha ho bala likarabo? Thutong ea Puso ea Molimo sepheo se ka sehloohong ke ho etsa hore boitsebiso e be ba hao ’me u bo sebelise ka kananelo e tlohang pelong le ka kutloisiso.—Liprov. 2:5; 4:7, 8.
SEKOLO SA TŠEBELETSO SA PUSO EA MOLIMO LE SEBOKA SA TŠEBELETSO
5 Na u talima lipuo tsa hao tsa seithuti e le likabelo tse tsoang ho Jehova ebe u bonahatsa see ka tsela eo u lokisetsang ka eona? Tiisa hore u utloisisa boitsebiso le hore u ka fana ka bona ka tsela e ipiletsang. Empa esita leha u se na kabelo e itseng, ithute ka hore u bale likhaolo tse lokiselitsoeng tsa Bibele le boitsebiso bo bong bekeng e ’ngoe le e ’ngoe. U lokela ho etsa ho tšoanang ka Seboka sa Tšebeletso. Haeba sena se etsoa pele ho nako, nakong ea seboka u tla be u ntse u nahana ka mafolo-folo ka boitsebiso bo fanoang, ho fapana le ho loanela ho itloaetsa boitsebiso boo ka lekhetlo la pele.
6 Lipontšo tsa Seboka sa Tšebeletso le mokhoa oo lipuo li theiloeng ka oona li lokela hore e be lintho tsa sebele, li bontše maemo a sebaka ka seng ao bohle ba ka ikamahanyang le ’ona. Pheta-pheta karolo ea hao hantle. Hape, apara ka mokhoa o loketseng e le hore moaparo oa hao e be mohlala o motle ho ba bang.
7 Hahamalla ho nehelana ka likarolo tse lokiselitsoeng hantle tse nehelanoang ka cheseho. Batsoali, thusang bana ba lōna ho lokisetsa le ho arabela ka mantsoe a bona ha monyetla o hlaha. Ka sebele, haeba bohle ba ka ameha ka hore ba fihle ka nako le ho itokisetsa ho kopanela ka ho fana ka litlhaloso, liboka tsa rōna li tla tlōkoma ke boitsebiso ba bohlokoa, bo susumetsang bo nehelanoang ka tsela e hapang tlhokomelo ea bamameli. Na u tla phetha karolo ea hao ntlheng ena e le hore “lintho tsohle li etsahale bakeng sa ho haha” ba bang ba bōkaneng hammoho le uena?—1 Ba-Kor. 14:26.