Mokhoa oa ho Lokisetsa Seboka sa Tšebeletso
1. Morero oa Seboka sa Tšebeletso ke ofe, ’me re ka rua molemo o moholo joang ho sona?
1 Seboka sa Tšebeletso se lokiselitsoe ho re thusa hore re atlehe tšebeletsong. Lintlha tse tšohloang haholo sebokeng sena ke tse mabapi le ho bolela litaba tse molemo tsa ’Muso, ho etsa barutuoa le ho phatlalatsa kahlolo ea Molimo e ntseng e atamela. (Mat. 28:19, 20; Mar. 13:10; 2 Pet. 3:7) Re rua molemo o moholo sebokeng sena haeba re lokiselitse hantle ’me re itokiselitse ho araba.
2. Re ka itokisetsa ho mamela puo joang?
2 Puo: Hangata litaelong tse fuoeng sebui ho boleloa sengoliloeng seo taba e tšohloang e hlahang ho sona. U ka ’na ua bala sengoliloeng seo le mangolo a bontšitsoeng, ’me u nahane hore na u ka sebelisa taba eo joang tšebeletsong ea tšimo.
3. Re ka etsa’ng ha re lokisetsa puisano ea lipotso le likarabo?
3 Puisano ea Lipotso le Likarabo: Puo ena e tla fanoa ka tsela e tšoanang le ea Thuto ea Molula-Qhooa, sebui se tla etsa kenyelletso e khutšoanyane le sephetho se sekhutšoanyane. Tšoaea lintlha tsa sehlooho serapeng ka seng, ’me u itokisetse ho araba ka mantsoe a seng makae a otlang taba botsekeng.
4. Re ka etsa’ng ha re lokisetsa puo ea puisano le bamameli?
4 Puisano le Bamameli: Ke puo, empa sebui se tla botsa bamameli mona le mane. Haeba u tšoaea lintlha tsa sehlooho ’me u phetla mangolo a bontšitsoeng, u ka khona ho araba ha ho botsoa lipotso. Mor’abo rōna ea abetsoeng puo ena o tla leka kahohle ho batla maikutlo a bamameli ha a tšohla lintlha tsa sehlooho.
5. Ke’ng se tla re thusa hore re rue molemo o moholo lipontšong?
5 Lipontšo: Lipuo tse ling li tla ba le lipontšo tsa boemo ba sebele tsa kamoo taba e tšohloang e ka sebelisoang tšimong ea phutheho. Li tla etsoa ke baholo kapa bahoeletsi bao e leng khale ba li bona kapa bo-pula-maliboho. Ha u lokisetsa puo ena u ka nahana hore ebe e tla behoa joang. Ha ho etsoa pontšo ho sebelisoa nehelano e fanoeng e le mohlala, nahana hore na u ka e beha joang ka mantsoe a hao le hore na u ka e sebelisa joang ho batho ba sa tšoaneng. Etsa bonnete ba hore u ea sebokeng u nkile buka kapa makasine e tla sebelisoa pontšong. Mantsiboeeng a Borapeli ba Lelapa, u ka ’na ua bona ho le molemo ho itlhakisetsa linehelano tse ling ho tsena.
6. Re na le mabaka afe a ho lokisetsa Seboka sa Tšebeletso?
6 Seboka sa Tšebeletso se monate ha re lokiselitse ’me re nahanne esale pele ka lintho tse molemo tseo re tla ithuta tsona. Ha re etsa joalo re tla khothatsana haholo. (Bar. 1:11, 12) Haeba re ipha nako ea ho lokisetsa Seboka sa Tšebeletso, ho tla ba bonolo haholoanyane hore re phethe mosebetsi oa rōna.—2 Tim. 3:17.