Phephetso ea ho Etsa Maeto a ho Boela
1 Joaloka basebeletsi ba litaba tse molemo, re laetsoe ho etsa barutuoa. (Matt. 28:19, 20) Sena se akarelletsa ho etsa maeto a ho boela. Na u na le pono e ntle ka karolo ee ea bohlokoa ea tšebeletso ea rōna ea Bokreste? Ho etsa maeto a ho boela ka bohlale e ka ba phephetso e hlasimollang.—Liprov. 22:29.
2 Mokreste e mong le e mong ea inehetseng o lokela ho ikutloa a na le boikarabelo ba ho kopanela mosebetsing oa ho etsa barutuoa. Sena se ka hloka hore re behelle nako e itseng ea botho ka thōko bakeng sa ho arolela ba bang tšepo ea ’Muso. Maeto a ho boela a re neha monyetla oa ho thusa batho ba pelo li ntle hore ba khotsofatse litlhoko tsa bona tsa moea.
3 Latella Thahasello Eohle: Maeto a ho boela a lokela ho etsoa ho bohle ba bontšang thahasello molaetseng oa ’Muso, esita le hoja ba ka hana ho nka likhatiso tsa rōna. Ho na le batho ba bangata ba bontšang thahasello ka hore ba ikemisetse ho bua le rōna ka litaba tsa Bibele. Jesu le baapostola ba ile ba bontša kamoo ho ka hlaoleloang thahasello molaetseng oa ’Muso ka ho kenyelletsa batho lipuisanong tse tobileng tsa Mangolo.—Mar. 10:21; Lik. 2:37-41.
4 Sepheo sa rōna ha re etsa maeto a ho boela e lokela hore e be ho qalisa thuto ea Bibele. Re ka ’na ra khona ho bontša mong’a ntlo kamoo re khannang thuto ea lehae ea Bibele ka teng. U ka kholiseha hore Jehova o tla arabela thapelo ea hao e kōpang thuso ea ho fumana motho ea pelo e tšepahalang eo u ka mo rutang. Jehova o tla hlohonolofatsa boiteko ba hao bo tiileng tšebeletsong ea hae. Ke hobane’ng u sa batle thuso ea Jehova ebe u iketsetsa pakane ea ho qalisa thuto ea Bibele?
5 Sebelisa Lipampitšana ka ho Felletseng: Lipampitšana li ka sebelisoa ka katleho ho qalisa lithuto tsa Bibele. Ba bangata ba ile ba khona ho qala puisano ka ho bua feela ka setšoantšo se sekoahelong sa pampitšana. Bala serapa se le seng ka nako le mong’a ntlo. Ha ho hlaha potso serapeng, ema ’me u meme mong’a ntlo hore a itlhalose. Phetla mangolo ’me u bontše hore na a kenella joang. Joale puisano e ka lebisoa khatisong eo ho ka khannoang thuto ka eona.
6 Sebelisa Buka ea Ho Bea Mabaka: Maeto a ho boela a atlehileng a ka etsoa ho sebelisoa buka ea Ho Bea Mabaka. Ho hlahloba lethathamo la lihlooho tse khōlō kapa index ho ka u thusa hore u khethe boitsebiso bo loketseng boo u ka buang ka bona ha u etsa leeto la ho boela. Karolo “Mangolo a Atisang ho Sebelisoa Hampe” e ka ba thuso e khōlō ha ho sebetsanoa le likhanyetso tse ka ’nang tsa hlaha. Bo-pula-maliboho ba tlaleha hore ba bile le katleho e khōlō ka ho qalisa lithuto tsa Bibele ba sebelisa boitsebiso bo kang bo fumanoang bukeng ea Ho Bea Mabaka ho leqephe 251 tlas’a “Lipaki tsa Jehova li fihla joang tlhalosong ea tsona ea Bibele?” Ba bontša motho ea thahasellang hore re tlohella Bibele hore e fane ka tlhaloso ea eona. Sena sea atleha ’me se felletse ka lithuto tse ngata tsa Bibele.
7 Joaloka Jesu le baapostola, ho hlokahala hore re bontše thahasello e tiileng ho linku tsa Jehova. (Luka 9:11) Ho rata batho ho tla re thusa hore re ee ho bona ka linnete tsa ’Muso. (2 Ba-Kor. 2:17) Ha re hatella haholo ho itela ha rōna molemong oa katleho ea batho ba bang ea moea, re tla khona ho tobana ka katleho le phephetso ea ho etsa maeto a ho boela.