Ka Lerato Thusa ba Bontšang Thahasello
1 Ha morutuoa Filipi a ne a tataisetsoa ho Moethiopia ea neng a bontša thahasello Lentsoeng la Molimo la ’nete ke lengeloi la Jehova, ka lerato o ile a ithaopela ho mo thusa ho utloisisa seo a se balang. (Lik. 8:26-39) Na re etsa boiteko bo khethehileng ho thusa ba bontšang thahasello? Re lokela ho bo etsa, kaha thomo ea rōna ea bomolimo e kopanyelletsa ho etsa barutuoa. (Matt. 28:19, 20) Re ka etsa’ng ho ba thusa?
2 Behella nako ka thōko beke e ’ngoe le e ’ngoe bakeng sa ho etsa maeto a ho boela. Lokisetsa ho etela ba bontšitseng thahasello, ’me u leke ho ntšetsa pele puisano ea Mangolo eo u e qalileng ketelong ea hao ea pele. U hopole pakane ea ho qalisa thuto ea Bibele. Khutlela kamehla hore u nehelane ka litokollo tsa morao-rao tsa Molula-Qhooa le Tsoha! haeba nehelano ea peeletso eo u e entseng qalong e hanoa.
3 Haeba ketelong ea hao ea pele u ile ua tšohla bohlokoa ba Bibele, u ka ’na ua ntšetsa pele puisano, u sebelisa tlhahiso e leqepheng la 62 bukeng ea “Ho Bea Mabaka” ebe u bua mantsoe a kang ana:
◼ “Ba bang ba ikutloa hore keletso ea Bibele ha e na thuso lefatšeng la rōna la kajeno. U ikutloa joang ka seo? [Emela karabo.] Na ha u lumele hore buka e fanang ka keletso e utloahalang e ka re nolofalletsang ho ba le bophelo bo thabileng ba lelapa e na le molemo? [Emela karabo.] Likhopolo le litloaelo tse amang bophelo ba lelapa li fetohile, ’me liphello tseo re li bonang kajeno ha li ntle. Empa malapa a sebelisang se boleloang ke Bibele ha e le hantle a tsitsitse ’me a thabile.” Bala Ba-Kolosse 3:18-21. Nehelana ka pampitšana Lebaka la Hore U Tšepe Bibele, ’me u hlalose hore re fana ka lenaneo la thuto ea Bibele e sa lefelloeng.
4 U ka qalisa puisano ka boemo ba bafu ka tsela ena:
◼ “Ho ’nile ha buuoa haholo ka boemo ba bafu. U nahana hore ho etsahala eng ka rōna ha re e-shoa? [Emela karabo.] Malumeli a mangata a ruta hore re tsoela pele re phela ka sebōpeho se seng. Ba bangata ba ’nile ba makatsoa ke ho ithuta ka se boleloang ke Bibele tabeng ena. [Bala Moeklesia 9:5.] Le hoja bafu ba sa ikutloe, ha baa lebaloa. Molimo o tšepisitse ho ba khutlisetsa bophelong tlas’a puso ea ’Muso oa hae.” Phetla Molula-Qhooa oa October 15, 1994, kapa leqepheng la 162 bukeng ea Phela ka ho sa Feleng, ebe u tšohla mangolo le litšoantšo. Lokisetsa hore ho be le leeto le leng la ho boela, ka sepheo sa ho qalisa thuto ea Bibele.
5 Haeba u lakatsa ho fana ka tlhaloso e eketsehileng mabapi le pono ea Bakreste ka ntoa har’a lichaba, u ka ’na ua batla ho bua mantsoe a kang ana:
◼ “Ba bang ba lumela hore ho loana ke eona feela tsela ea ho rarolla liqabang. U ikutloa joang ka seo? [Emela karabo.] Bibele e bontša hore Molimo o batla hore batho ba phele hammoho ka khotso. [Bala Ba-Roma 12:17, 18.] Sena e tla ba ntho ea sebele lefatšeng lohle tlas’a puso ea ’Muso oa Molimo.” Bua ka bukana e lekanang le makasine Na Ruri Molimo oa re Tsotella?, maqepheng a 25-6. Ithaopele ho khutla ho tla hlalosa lebaka leo ka lona Jesu a re rutileng ho rapella hore ‘thato ea Molimo e etsoe lefatšeng joalokaha e etsoa leholimong.’—Matt. 6:10.
6 Leqhalaha la Ethiopia le ile la lumela hore ha le khone ho utloisisa ha ho se ea le tataisang. (Lik. 8:31) Ka lerato Filipi o ile a le fa thuso eo le e hlokang. Re ka bontša lerato la rōna la sebele ho ba bang ka ho ba thusa ka tsela e tšoanang.