Khutlela Moo U Fumaneng Thahasello
1 Ha re sebetsa ka ntlo le ntlo, hangata nako eo re khonang ho e qeta le motho ea thahasellang e lekanyelitsoe. Mabakeng a mangata mosebetsi oa sebele oa ho ruta o etsoa nakong ea ha re etsa maeto a ho boela ’me re khanna lithuto tsa Bibele. (Matt. 28:19, 20) E le hore re ka ruta ka katleho leetong la ho boela, ho hlokahala hore re hlahlobe seo re buileng ka sona ketelong ea pele ebe re lokisetsa ho ba le puisano e tsoelang pele.
2 Haeba u ile ua bua ka ho se tsitse ha tokisetso ea lelapa, u ka ’na ua sebelisa boitsebiso bo leng khaolong ea 29 ea buka ea “Phela ka ho sa Feleng.” U ka ’na ua re:
◼ “Nakong e fetileng re ile ra bua ka bohlale ba ho latela keletso ea Bibele e le hore re ka ba le bophelo bo thabileng ba lelapa. U nahana hore senotlolo sa ho kopanya malapa kajeno ke sefe?” Emela karabo. Bua ka serapa sa 27 leqepheng la 247, ’me u bale Ba-Kolosse 3:12-14. Etsa litlhaloso tse eketsehileng ho bontša kamoo lerato la ’nete le ka kopanyang malapa hammoho kateng. Hlalosa kamoo ho ithuta ka mokhoa o hlophisitsoeng buka ea Phela ka ho sa Feleng ho ka thusang ho rarolla mathata.
3 Haeba u buile ka maemo a ntseng a senyeha ho ea pele a lefatše ketelong ea hao ea pele, u ka ’na ua ekelletsa ho seo ka ho re:
◼ “Ke ea kholoa u tla lumela hore ho hlokahala liphetoho tse khōlō haeba ho tla ke ho etsahale hore re phele ka khotso. Bibele e bontša hore Satane ke sesosa se seholo sa mathata a rōna. Ba bangata ba ipotsa hore na ke hobane’ng ha Molimo a mo lumelletse ho tsoela pele halelele hakana. U nahana joang?” Emela karabo. Phetla leqepheng la 20, lirapeng tsa 14 le 15, bukeng ea Phela ka ho sa Feleng, ’me u hlalose hore na ke hobane’ng ha Satane a e-s’o timetsoe. Ebe u bala Ba-Roma 16:20, e bontšang seo re ka se lebellang nakong e tlang e haufi.
4 Haeba u buile ka litlhohonolofatso tse tla fumanoa tlas’a puso ea ’Muso, leetong la hao la ho boela, u ka ’na ua re:
◼ “’Muso oa Molimo o tla tlisa litlhohonolofatso tse hlollang lefatšeng le ho moloko oa batho. Litlhohonolofatso tsena li bontšitsoe hantle mona maqepheng a 12 le 13. U bona eng e ipiletsang ho uena? [Emela karabo.] Nahana hore na ho tla ba joang ho phela lefatšeng le tjena.” Bala serapa sa 12. Haeba ho e-na le thahasello, botsa potso serapeng sa 13, ’me le buisane ka karabo. Bontša hore khaolo ena e arabela lipotso tse ngata mabapi le litlhohonolofatso tsa ’Muso le hore u tla thabela ho buisana le eena ka tsona ketelong ea hao e tlang.
5 U ka ’na ua khona ho qala thuto ka ho re:
◼ “Batho ba bangata ba fumane likarabo tsa lipotso tsa bona tsa Bibele ka ho sebelisa buka ena.” Phetla ho tse ka hare, ebe ua botsa: “Ke sehlooho sefe mona se u thahasellisang haholo?” Emela karabo, phetla khaolong e ileng ea ba thahasellisa, ebe u bala serapa sa pele. Hlalosa kamoo lipotso tse leng botlaaseng ba leqephe ka leng li totobatsang lintlha tsa sehlooho serapeng ka seng. Etsa mohlala oa sena ka ho bua ka serapa se le seng kapa tse peli tse eketsehileng, ebe u etsa litokisetso tsa ho khutlela.
6 Ho khutlela moo ho bontšitsoeng thahasello bukeng ea Phela ka ho sa Feleng ho bonahatsa takatso ea rōna ea ho phetha tšebeletso ea rōna ka botlalo. (2 Tim. 4:5) Re ka khona ho thusa babali ba rōna ho hahamalla bophelo bo sa feleng.—Joh. 17:3.