Mokhoa oa ho Susumetsa ba Bang
1 Moapostola Pauluse o ile a ikhapela botumo ba ho ba mosebeletsi ea nang le tšusumetso. (Lik. 19:26) Esita le Morena Agripa o ile a mo bolella: “Ka nako e khutšoanyane u ne u tla ntšusumelletsa hore ke be Mokreste.” (Lik. 26:28) Ke eng se ileng sa etsa hore tšebeletso ea Pauluse e be le tšusumetso e kaalo? O ne a beha mabaka ka Mangolo ka tsela e utloahalang, a lumellanya litaba tsa hae le bamameli.—Lik. 28:23.
2 E le ha re etsisa Pauluse, le rōna ho hlokahala re be le tšusumetso tšebeletsong ea rōna. Joang? Ka ho sebelisa temohisiso ha re bua le ba bang le ha re ba mamela. (Liprov. 16:23) Mehato e meraro ea bohlokoa e tla re thusa ho finyella sena.
3 Mamela ka Hloko: Ha motho e mong a bua, mamela hore na le lumellana ka eng eo u ka hahang holim’a eona. Haeba a hanyetsa, leka ho fumana hore na o hanyetsa hobane’ng. Ho tla thusa ho tseba hantle hore na o lumela eng, hobane’ng a e lumela, hona o kholisitsoe ke eng hore a e lumele. (Liprov. 18:13) Fumana maikutlo a hae ka bohlale.
4 Botsa Lipotso: Haeba motho a bolela hore o lumela Boraro-bo-bong, u ka ’na ua botsa: “Na esale u lumela Boraro-bo-bong?” Se latelang u ka re: “Na u se u kile ua ithuta ka ho teba seo Bibele e se buang ka taba ee?” U ka boetse ua botsa: “Haeba Molimo e ne e le karolo ea Boraro-bo-bong, na re ne re ke ke ra lebella hore Bibele e ne e tla bolela seo ka ho hlaka?” Likarabelo tseo u li fumanang li tla u thusa ho behelana mabaka le motho eo ka seo Mangolo e se buang.
5 Sebelisa Mabaka a Utloahalang: Paki e ’ngoe e ile ea botsa mosali e mong ea neng a lumela hore Jesu ke Molimo: ‘Haeba u ne u leka ho etsa papiso ea hore batho babeli baa lekana, u ne u tla sebelisa kamano efe ea lelapa?’ O ile a arabela: “Ke ne nka sebelisa bara ba motho ba babeli.” Paki eo ea phaella: “Mohlomong u ka sebelisa le mafahla a tšoanang. Empa ka ho re ruta hore re talime Molimo e le Ntate hape eena e le Mora, Jesu o ne a fetisa molaetsa ofe?” Mosali eo o ile a hlakeloa hore e mong o moholo ’me o na le matla a eketsehileng a ho laela. (Mat. 20:23; Joh. 14:28; 20:17) Ho ne ho finyelletsoe kelello le pelo ea hae ka tsebo ea ho susumetsa.
6 Ke ’nete hore hase bohle ba amohelang ’nete, ho sa tsotellehe hore na nehelano ea rōna e utloahala hakae kapa e nepahetse hakae. Empa joaloka Pauluse, a re beng mafolofolo ho batla ba lipelo li tšepahalang tšimong ea rōna, re ba susumelletsa ho amohela molaetsa oa ’Muso.—Lik. 19:8.