Ha re Etsa Tšebeletso ea Rōna—Re Bontša Hore re Rata Molimo
1. Ho rata Molimo ho ile ha susumelletsa Jesu hore a etse’ng?
1 Lerato le ile la susumelletsa Jesu hore a etse tšebeletso. Sohle seo Jesu a neng a se etsa tšebeletsong se bontša ka ho totobetseng hore o rata Jehova. Jesu o ile a re: “E le hore lefatše le tsebe hore ke rata Ntate, esita le joalokaha Ntate a mphile taelo hore ke etse, ke etsa joalo.” (Joh. 14:31) Kaha re hata moo Jesu a hatileng teng, le rōna re fuoe tlotla ea ho bontša hore re rata Molimo haholo tšebeletsong ea rōna.—Mat. 22:37; Baef. 5:1, 2.
2. Tšebeletso ea rōna e bontša joang hore re rata Jehova?
2 “Lebitso la Hao le ke le Halaletsoe”: Ha ka cheseho re bua le ba bang ka Jehova le ka ’Muso oa hae ha monyetla o mong le o mong o hlaha, re bontša hore re rata Molimo, ha e le hantle re ba le seabo khalaletsong ea lebitso la hae. (Pes. 83:18; Ezek. 36:23; Mat. 6:9) Joaloka Jesu, kamehla ha re le tšebeletsong re bontša hore re na le takatso e tiileng ea hore lebitso la Jehova le halaletsoe ’me ho etsoe thato ea hae.—Mat. 26:39.
3. Lerato leo re ratang Jehova ka lona le re thusa joang hore re hlōle litšitiso?
3 Lerato le re Susumelletsa ho Hlōla Litšitiso: Ha motho a rata Jehova, lerato leo le mo thusa ho hlōla litšitiso tsohle. (1 Bakor. 13:4, 7) Jesu o ile a hlaheloa ke lintho tse ngata bophelong tse neng li ka ’na tsa mo thibela ho etsa tšebeletso ea hae. Leha ho le joalo, ho rata Jehova ka ho tebileng le ho lakatsa ho etsa thato ea hae ho ile ha mo thusa hore a hlōle bothata bofe kapa bofe. (Mar. 3:21; 1 Pet. 2:18-23) Le rōna re hlaheloa ke mathata a mangata, ao re ka a hlōlang ka lebaka la ho rata Molimo. Ha re latela mohlala oa Kreste, re ka ba sebete ’me ra utloa ho se letho le re sitisang tšebeletsong. Le hoja lelapa le ka ’na la re hanyetsa, ra fokolloa ke bophelo, ra tsofala, kapa batho ka kakaretso ba iphapanyetsa molaetsa oa rōna, lintho tsena ha li re sitise ho bontša hore re rata Jehova ka ho etsa tšebeletso ea rōna ka katleho ka hohle kamoo re ka khonang.
4. Ho rata Jehova ho re fa monyetla ofe?
4 Lerato le matla, ’me re hlohonolofalitsoe ka ho fuoa monyetla oa ho bontša hore re rata Molimo ka moea oohle tšebeletsong ea rōna. (1 Bakor. 13:13) Ha nako ea hore lebitso la Jehova le halaletsoe ka ho feletseng e ntse e atamela ka potlako, e se e ka ‘lerato la rōna le ka ata ka ho eketsehileng.’—Bafil. 1:9; Mat. 22:36-38.