“Bopula-maliboho bo ka U Tšoanela!”
1. Morali e mong oabo rōna o ile a ikutloa joang ka tšebeletso ea hae e le pula-maliboho?
1 Kathe B. Palm o ile a re: “Ho ne ho se mosebetsi o mong o neng o ka nkhotsofatsa kapa o neng o ka ba le moputso o mokaalo moeeng.” O ile a qeta lilemo tse mashome e le pula-maliboho ea itetseng ea pakang ho tloha karolong e ’ngoe ea Chile, Amerika Boroa, ho ea ho e ’ngoe. Mohlomong ho na le motho eo e itseng ha a nahana ka bophelo bo khotsofatsang ba batho ba tšebeletsong ea nako e tletseng, a ileng a re ho uena: “Bopula-maliboho bo ka u tšoanela!”
2. Hlalosa hore na ke hobane’ng ha re khotsofala e le kannete ha re etsa mesebetsi e amanang le borapeli ba Jehova.
2 Bophelo bo Khotsofatsang: Motho ea re behetseng mohlala, e leng Jesu, o ile a khotsofala e le kannete ha a etsa thato ea Ntate oa hae. (Joh. 4:34) Kahoo, Jesu o ne a bua ho tloha botebong ba pelo ha a ruta balateli ba hae hore ba tla khotsofala e le kannete haeba ba etsa mesebetsi e amanang le borapeli ba Jehova. Rea khotsofala haeba re phathahane ka mesebetsi e khahlisang Jehova. Ho phaella moo, thabo ea rōna ea eketseha ha re ntse re fana ka nako e eketsehileng, matla le lintho tse ling ho thusa ba bang.—Lik. 20:31, 35.
3. Ke eng e ka re tlisetsang thabo ha re qeta nako e eketsehileng tšebeletsong?
3 Ha re qeta nako e eketsehileng tšebeletsong, re ba le menyetla e mengata ea ho fumana thabo e tlisoang ke ho qala lithuto tsa Bibele le ho li khanna. Esita le haeba batho ba bangata ba bonahala ba sa thabele molaetsa oa rōna, re ka ’na ra fumana hore ha re ntse re e-ba le phihlelo le tsebo tšebeletsong, tšimo ea rōna e beha haholo ho feta kamoo re neng re nahana kateng. Bo-pula-maliboho ba ka sebelisa sohle seo ba ithutileng sona Sekolong sa Tšebeletso sa Bopula-maliboho seo ba ileng ho sona ka mor’a ho qeta nako e ka etsang selemo ba bula maliboho. (2 Tim. 2:15) Haeba re phehella, ho ka etsahala hore re jale peō ea ’nete e tla beha litholoana hamorao.—Moek. 11:6.
4. Bacha ba haufi le ho qeta sekolong ba lokela ho nahana ka eng?
4 Bacha: Ha le ntse le itokisetsa ho qeta sekolong se phahameng, na le ile la nahanisisa ka seo le tla se etsa nakong e tlang? Hona joale, le qeta nako e ngata le etsa mosebetsi oa sekolo. Le tla sebelisa nako eo joang ha le qeta sekolong? Ho e-na le ho hahamalla mosebetsi oa maemo, ke hobane’ng ha le sa nahane ka ho ba bo-pula-maliboho ba kamehla le be le rapelle seo? Tsebo eo le tla ba le eona—e leng ea ho pakela batho ba sa tšoaneng, ho hlōla mathata, ho ikhanna le ho ntlafatsa tsebo ea ho ruta—e tla le tsoela molemo bophelong bohle ba lōna.
5. Batsoali le phutheho ba ka khothalletsa bopula-maliboho joang?
5 Batsoali, na le phetha boikarabelo ba lōna ba ho thusa bana hore ba khethe tšebeletso ea nako e tletseng? Mantsoe a lōna le mohlala oa lōna o motle li ka ba thusa hore ba eteletse mesebetsi e amanang le ’Muso pele. (Mat. 6:33) Ray, ea qalileng ho bula maliboho ha a qeta sekolong se phahameng, o re: “Haesale ’Mè a e-na le maikutlo a hore bopula-maliboho bo etsa hore motho a phele bophelo bo khotsofatsang ka ho fetisisa.” Bohle ka phuthehong ba ka khothalletsa ba bang ka mantsoe le ka liketso ho rata bopula-maliboho. Jose, oa Spain, o re: “Phutheho ea heso e ne e nka bopula-maliboho e le mosebetsi o molemo ka ho fetisisa oo bacha ba ka o etsang. Tsela eo ba neng ba bua ka bopula-maliboho ba bile ba bo rata ka eona haesita le kamoo ba neng ba thusa bo-pula-maliboho kateng e ile ea ’nolofalletsa hore ke qale ho bula maliboho.”
6. Re ka etsa’ng haeba hona joale bopula-maliboho bo le sieo lipelong tsa rōna?
6 Ho Hlōla Litšitiso: Mohlomong u re, ‘Bopula-maliboho ha bo eo pelong ea ka.’ Haeba qalong u ikutloa ka tsela eo, rapela Jehova, u re ho eena, ‘Ha ke bone eka nka khona ho bula maliboho, empa ke rata ho u khahlisa.’ (Pes. 62:8; Liprov. 23:26) Ebe u batla likeletso Lentsoeng la hae le mokhatlong oa hae. Bo-pula-maliboho ba bangata ba kamehla ba ile ba qala ho ‘latsoa’ bopula-maliboho ka ho ba bo-pula-maliboho ba thusang ’me ba thaba hoo ba ileng ba susumelletseha hore ba be tšebeletsong ea nako e tletseng.—Pes. 34:8.
7. Re ka etsa’ng haeba re tšaba hore re ke ke ra finyella lihora tse 70 tse hlokahalang khoeli le khoeli?
7 U ka etsa’ng haeba u tšaba hore u ke ke ua finyella lihora tse 70 tse hlokahalang khoeli le khoeli? Mohlomong u ka bua le bo-pula-maliboho bao maemo a bona a tšoanang le a hao. (Liprov. 15:22) Ebe u ngola likemiso tse ’maloa tsa nako eo u ka e sebetsang e le hore u finyelle lihora tse hlokahalang. U ka ’na ua fumana hore ho ithekela nako mesebetsing eo e seng ea bohlokoa e le hore u etse tšebeletso, ho bonolo ho feta kamoo u neng u nahana kateng.—Baef. 5:15, 16.
8. Ke hobane’ng ha re lokela ho hlahloba maemo a rōna nako le nako?
8 Hlahloba Maemo a Hao Hape: Hangata maemo a motho aa fetoha. Ho molemo hore u ’ne u hlahlobe maemo a hao nako le nako. Ka mohlala, na u se u tla ea pensheneng? Randy, ea ileng a ea pensheneng pele ho nako, o re: “Qeto ena e ile ea nthusa hore ke qale ho ba pula-maliboho oa kamehla joaloka mosali oa ka, ’me re bile le monyetla oa ho fallela moo ho hlokahalang bahoeletsi ba eketsehileng. Qeto eo ke e entseng e ntliselitse litlhohonolofatso tse ngata, empa tlhohonolofatso e khōlō ka ho fetisisa e bile ea ho ba le letsoalo le hloekileng.”
9. Banyalani ba lokela ho hlahloba eng?
9 Ka mor’a hore banyalani ba bang ba hlahlobisise maemo a bona, ba hlokometse hore ha ho hlokahale hore ba sebetse ka nako e tletseng ba le babeli. Ke ’nete hore ho ka ’na ha hlokahala hore lelapa le phele ka mokhoa o itekanetseng, empa boitelo boo hase ba lefeela. John, eo mosali oa hae a sa tsoa tlohela mosebetsi oa nako e tletseng e le hore a qete nako e eketsehileng a le tšebeletsong, o re: “Thabo ea ka ea khaphatseha ha ke nahana hore mosali oa ka o tšebeletsong ea Jehova motšehare.”
10. Ke eng e susumelletsang Bakreste ho nahana ka bopula-maliboho?
10 Pontšo ea Lerato le Tumelo: Jehova o entse hore mosebetsi oa boboleli e be oa bohlokoa ho feta mosebetsi leha e le ofe oo mang kapa mang a ka o etsang. Tsamaiso ena ea khale e se e tla felisoa, ’me ke ba ipiletsang lebitsong la Jehova feela ba tla pholoha. (Bar. 10:13) Haeba re mo rata ka pelo eohle ’me re leboha seo a re etselitseng sona, re tla susumelletseha hore re mamele taelo ea Mora oa hae ea hore re bolele ka cheseho. (Mat. 28:19, 20; 1 Joh. 5:3) Ntle ho moo, ho ba le tumelo ea hore ka sebele re phela matsatsing a ho qetela ho tla re susumelletsa ho etsa sohle seo re ka se khonang tšebeletsong nako e sa le teng, ho e-na le ho sebelisa lefatše ka botlalo.—1 Bakor. 7:29-31.
11. Re lokela ho ikutloa joang ha motho e mong a re bopula-maliboho bo ka re tšoanela?
11 Ho ba pula-maliboho oa kamehla hase feela taba ea ho finyella lihora tse hlokoang ke mokhatlo, empa ke tsela ea ho bontša hore re inehetse ho Molimo. Kahoo, haeba motho a re bopula-maliboho bo ka u tšoanela, nka hore oa u babatsa. Ebe ua itlhahloba hore na le uena u ka etsa tšebeletso ena e khotsofatsang u be u rapelle seo.
[Ntlha e Qolotsoeng e leqepheng la 4]
Batsoali, na le phetha boikarabelo ba lōna ba ho thusa bana hore ba khethe tšebeletso ea nako e tletseng?
[Ntlha e Qolotsoeng e leqepheng la 5]
Jehova o entse hore mosebetsi oa boboleli e be oa bohlokoa ho feta mosebetsi leha e le ofe oo mang kapa mang a ka o etsang.