Molimo o Bua le Rōna ka Jeremia
1. Kopanong ea setereke ea 2010 ho lokolotsoe buka efe, hona re tla e sebelisa joang?
1 Re ile ra thaba hakaakang ha ho lokolloa buka e ncha e nang le sehlooho seo Kopanong ea Setereke ea “Lulang le le Haufi le Jehova!” Buka ena e totobatsa lithuto tse ka re thusang bophelong ba rōna ba letsatsi le letsatsi tse fumanoang bukeng ea Jeremia le ea Lillo Tsa Jeremia. (Bar. 15:4) E reretsoe ho sebelisoa Thutong ea Bibele ea Phutheho, ’me re tla qala ho ithuta eona bekeng ea la 5 November, 2012.
2. Ke hobane’ng ha ho hlahloba buka ea Bibele ea Jeremia le ea Lillo Tsa Jeremia ho re tsoela molemo?
2 E re Tsoela Molemo Kajeno: Mongoli oa buka ena ea Bibele e bululetsoeng, e leng Jeremia, o ile a profeta nakong eo ho neng ho e-na le pherekano Juda. Qalong o ne a ikhalala hore a ka phetha kabelo ea hae. (Jer. 1:6) O ile a ba a hlorisoa ke batho bao a ba tsebang mohlomong ba bang ba bona e le beng ka eena ba lulang motseng oa habo oa Anathothe. (Jer. 11:21, 22) Hoa utloahala hore ebe ka linako tse ling Jeremia o ne a ee a nyahame. (Jer. 20:14) Mosebetsing oa rōna oa ‘ho etsa batho ba lichaba tsohle barutuoa,’ re atisa ho ba le mathata le ho ikutloa joaloka Jeremia. (Mat. 28:19) Ho hlahloba lengolo la hae ho tla re thusa hore re etse tšebeletso ea rōna re kholisehile re bile re e-na le cheseho.
3. Re tla ithuta buka ea Jeremia joang?
3 Tsela eo e Ngotsoeng ka Eona: Mangolo a sehlooho a lokelang ho baloa nakong ea thuto a ngotsoe ka mongolo o tšekaletseng. Qetellong ea thuto ea beke ka ’ngoe ho na le potso e le ’ngoe kapa tse peli tse fatang maikutlo tse ngotsoeng ka mongolo o motenya, tse totobatsang lintlha tsa sehlooho tsa thuto. Li lokela ho botsoa bamameli qetellong ea thuto. Buka ena e na le litšoantšo tse ntle tseo ho seng potang hore phutheho e tla thabela ho bua ka tsona.
4. Re ka rua molemo ka ho feletseng joang ha re ithuta buka ea Jeremia?
4 E le hore u rue molemo ka ho feletseng, lokisetsa thuto esale pele. Batla lintlha tseo u ka li sebelisang bophelong ba hao le tšimong. Kopanela ka botlalo thutong. Jehova o ile a hlohonolofatsa Jeremia ’me a phetha kabelo ea hae a thabile a bile a khotsofetse. (Jer. 15:16) E se eka ho ithuta buka ena e ncha ho ka re thusa ho phetha tšebeletso ea rōna ka tsela e tšoanang.