Nkang Baprofeta e le Mohlala—Hosea
1. Ke potso efe eo e ka ’nang eaba u kile ua ipotsa eona?
1 ‘Ke ikemiselitse ho itella Jehova ka litsela life?’ Mohlomong u kile ua ipotsa potso eo ha u nahanisisa ka mehauhelo ea hae e meholo le melemo ea hae e mengata. (Pes. 103:2-4; 116:12) Hosea o ile a ithaopela ho etsa seo Jehova a ileng a mo laela hore a se etse le hoja ho ne ho hlokahala hore a itele. Re ka etsisa Hosea joang?
2. Re ka etsisa mohlala o motle oa Hosea oa ho tiisetsa mosebetsing oa boboleli joang?
2 Bolela Molaetsa Nakong e Likhathatso: Molaetsa oa Hosea o ne o lebisitsoe haholo-holo ’musong oa Iseraele oa meloko e leshome, moo borapeli ba ’nete bo neng bo le haufi le ho fela. Morena Jeroboame II o ile a etsa se sebe mahlong a Jehova ’me a ntšetsa pele borapeli ba namane bo ileng ba qaloa ke Jeroboame I. (2 Mar. 14:23, 24) Marena a hlahlamang a ile a tsoela pele ho etsa hore ’muso oa meloko e leshome o fokole moeeng ho fihlela o timetsoa ka 740 B.C.E. Empa Hosea o ile a sebeletsa ka botšepehi e le moprofeta ka lilemo tse ka bang 59 ho sa tsotellehe borapeli ba bohata bo neng bo atile ka nako eo. Na ka ho tšoanang re ikemiselitse ho bolela molaetsa selemo le selemo ho sa tsotellehe khanyetso kapa ho se thahaselle ha batho?—2 Tim. 4:2.
3. Bophelo ba Hosea bo ile ba bontša joang hore Jehova o mohau?
3 Tsepamisa Kelello Mohaung oa Jehova: Jehova o ile a laela Hosea hore a nyale “mosali oa bohlola.” (Hos. 1:2) Le hoja mosali oa hae Gomere a ile a mo tsoalla mora, ho bonahala hamorao a ile a ba le bana ba babeli ba matšeo. Taba ea hore ebe Hosea o ile a ikemisetsa ho tšoarela mosali oa hae, e ile ea bontša mohau o moholo oa Jehova ho Baiseraele ba sa mameleng ha ba baka. (Hos. 3:1; Bar. 9:22-26) Na re ikemiselitse ho tela lintho tseo re li ratang e le hore re phatlalatse mohau oa Jehova ho batho ba mefuta eohle?—1 Bakor. 9:19-23.
4. Tse ling tsa litsela tseo re ka itellang Jehova ka tsona ke life?
4 Bahlanka ba bang ba Jehova ba ile ba tela mesebetsi e lefang chelete e ngata e le hore ba ka qeta nako e eketsehileng tšebeletsong. Ba bang ba ile ba lula e le masoha kapa ba se na bana e le hore ba ntšetse pele borapeli ba Jehova. Ha re nahana ka bophelo ba Hosea, re ka ’na ra re, ‘Ke ne nke ke ka etsa ntho e joalo.’ Leha ho le joalo, ha kananelo ea rōna bakeng sa mosa o sa tšoanelang oa Jehova e ntse e hōla ’me re itšetleha ka moea oa hae o halalelang hore o re fe matla, joaloka Hosea a ka re sebelisa ka litsela tseo ho seng mohla re kileng ra li nahana.—Mat. 19:26; Bafil. 2:13.