Sebelisa Limakasine Tsa Khale Hamolemo
Kaha ha ho na motho ea ruang molemo ha re boloka limakasine tsa khale kapa re li lahla, re lokela ho li tsamaisa. Makasine e le ’ngoe e ka etsa hore motho a rate ’nete a be a ipiletse lebitsong la Jehova. (Bar. 10:13, 14) Lintlha tse latelang li ka re thusa hore re sebelise limakasine tsa khale hamolemo.
Ha u paka tšimong e sa atiseng ho sebetsoa, malapeng ao ho ’ona ho se nang batho, u ka siea makasine moo batho ba fetang ka tsela ba ke keng ba e bona.
Ha u paka libakeng tseo batho ba emelang libese kapa literene ho tsona; ba botse hore na u ka ba fa se baloang, ebe u ba bontša limakasine tsa khale tse ’maloa, ’me u re ba khethe tseo ba li ratang.
Ha u ile moo ho hlatsuoang liaparo, mahaeng a batho ba hōlileng, litleliniking kapa libakeng tse kang tseo, u ka siea limakasine tsa khale tse seng kae. Hangata ho molemo hore u qale ka ho kōpa tumello ho motho ea ikarabellang haeba a le teng. Haeba ho se ho e-na le limakasine, u se ke ua siea tse ling hape.
Ha u lokisetsa maeto a ho boela, nahana ka hore na motho ka mong eo u rerang ho mo etela o ile a khahloa ke eng. Na o na le bana? Na o rata ho nka maeto? Na o rata ho sebetsa serapeng? Sheba limakasineng tsa khale hore na ebe ho na le sehlooho seo a ka ratang ho se bala, ’me u mo bontše sona ha u khutlela ho eena.
Haeba u fumana motho ea thabelang lapeng, eo u sa kang ua mo fumana ka makhetlo a itseng, mo bontše limakasine tsa khale tseo a sa li fumanang.