’Mopi oa Rona o re Bolella Litšepiso Tsa Hae Joang?

Haesale ho tloha batho ba e-ba teng, ’Mopi o ’nile a bua le bona a sebelisa mangeloi le baprofeta. Hape o entse hore molaetsa oa hae le litšepiso tsa hae li ngoloe fatše. Litšepiso tsena tse tsoang ho Molimo li ama bokamoso ba hao. U ka tseba ka litšepiso tsa Molimo joang mehleng ee?

Molaetsa oa Molimo o tlang ho rona o fumaneha mangolong a halalelang. (2 Timothea 3:​16) Molimo o sebelisitse baprofeta joang ho ngola molaetsa oa hae? (2 Petrose 1:​21) O ile a kenya mehopolo ea hae likelellong tsa bangoli bana eaba bona ba li ngola fatše. Le mehleng ena, rakhoebo a ka laela mongoli hore a ngole lengolo empa molaetsa o ngotsoeng moo o ntse o nkoa e le oa rakhoebo. Ka ho tšoanang, le hoja Molimo a sebelisitse batho hore ba ngole molaetsa oa hae, e ntse e le eena mongoli oa Mangolo a Halalelang.

LENTSOE LA MOLIMO LE FUMANEHA HABONOLO

Lentsoe la Molimo le bohlokoa hoo a entseng hore batho ba lichaba tsohle, ba merabe eohle le ba lipuo tsohle ba khone ho le bala le ho le utloisisa. (Tšenolo 14:6) Ka lebaka la tlhohonolofatso ea Molimo, Mangolo a Halalelang a fumaneha ka lipuo tse fetang 3 000 e le buka e feletseng kapa e le ka likaroloana. E fumaneha ho feta buka leha e le efe e kileng ea e-ba teng lefatšeng.