KE HOBANE’NG HA BATHO BA HLOEANE HAKAALE?
3 | Ntša Lehloeo Ka Pelong Ea hao
Seo Bibele e se Rutang:
“Le fetohe ka ho fetola likelello tsa lona, e le hore le ka ipakela e le lona thato ea Molimo e molemo le e amohelehang le e phethahetseng.”—BAROMA 12:2.
Seo Temana Ena e se Bolelang:
Tsela eo re nahanang ka eona ke ea bohlokoa ho Molimo. (Jeremia 17:10) Re lokela ho etsa ho fetang ho qoba ho etsa lintho tse bontšang lehloeo kapa ho li bua. Lehloeo le qala ka pelong le ka likelellong tsa rona. Kahoo, re lokela ho khaotsa ho nahana ka lintho tse ka etsang hore re be le lehloeo. Haeba re etsa joalo, re tla khona “ho fetoha” ’me re hlole lehloeo.
Seo U ka se Etsang:
Nahanisisa ka hloko hore na u ikutloa joang ka batho ba bang, haholo-holo ba morabe o fapaneng kapa ba tsoang linaheng tse ling. Ipotse: ‘Ke ba tšoara joang? Na tsela eo ke ba tšoarang ka eona e itšetlehile ka hore na kea ba tseba kapa e itšetlehile ka hore na ke na le khethollo?’ Qoba mecha ea puisano, lifilimi kapa boithabiso bo bontšang lehloeo kapa lintoa.
Lentsoe la Molimo le ka re thusa hore re hlole lehloeo le ka pelong le le ka likelellong tsa rona
Ka linako tse ling ho ba thata ho hlokomela tsela eo re hlileng re ikutloang ka eona. Empa Lentsoe la Molimo le re thusa “ho lemoha menahano le boikemisetso ba pelo.” (Baheberu 4:12) Kahoo lula u ntse u ithuta Bibele. Bapisa seo Bibele e se rutang le tsela eo u nahanang ka eona ’me u leke ho ithuta ho nahana ka tsela e thabisang Molimo. Lentsoe la Molimo le ka re thusa hore re hlole lehloeo le “metseng ka matla” ka lipelong le ka likelellong tsa rona.—2 Bakorinthe 10:4, 5.