Lula U E-na le Tšepo e Tiileng

1. Jehova o re file tšepo efe?

JEHOVA o re file tšepo e thabisang ea bophelo bo sa feleng. Ba bang ba rona ba na le tšepo ea ho phela leholimong e le libopuoa tse matla tsa moea. (1 Bakor. 15:​50, 53) Ha ba bang bona ba e-na le tšepo ea ho phela lefatšeng ka ho sa feleng ba sa kule ebile ba thabile. (Tšen. 21:​3, 4) Ho sa tsotellehe hore na re tla phela ka ho sa feleng leholimong kapa lefatšeng, tšepo eo re nang le eona ke ea bohlokoa haholo ho rona.

2. Ke kholiseho efe eo re nang le eona mabapi le tšepo ea rona, hona hobane’ng re cho joalo?

² Lentsoe “tšepo” le ka bolela “ho lebella hore lintho tse molemo li tla etsahala,” ho latela tsela eo le sebelisitsoeng ka eona ka Bibeleng. Re ka kholiseha hore tšepo ea rona ka bokamoso e tla phethahala hobane ke Jehova ea tšepisitseng. (Bar. 15:​13) Rea tseba hore na o tšepisitse eng hape rea tseba hore o tla phethahatsa lintho tse a li tšepisitseng. (Num. 23:​19) Re tseba hantle hore Jehova o na le boikemisetso le matla a ho phethahatsa ntho e ’ngoe le e ’ngoe eo a reng o tla e etsa. Sena se bolela hore tšepo ea rona ha se toro feela kapa ntho eo re batlang hore e etsahale. Tšepo ea rona ke ea ntho eo re tsebang hantle hore ke ’nete.

3. Re tl’o bua ka’ng sehloohong see? (Pesaleme ea 27:14)

³ Ntate oa rona ea leholimong oa re rata hape o batla hore re mo tšepe. (Bala Pesaleme ea 27:​14.) Ha re tšepa Jehova haholo re tla khona ho mamella mathata, re be sebete hape re lule re thabile ho sa tsotellehe hore na re etsahalloa ke eng. A re bueng ka hore na tšepo ea rona e re sireletsa joang. Re tla hlahloba hore na tšepo e tšoana joang le ankora le hore na e tšoana joang le helmete. Re tla boela re bue ka hore na re ka matlafatsa tšepo ea rona joang.

TŠEPO EA RONA E TŠOANA LE ANKORA

4. Tšepo e tšoana joang le ankora? (Baheberu 6:19)

⁴ Moapostola Pauluse o ile a tšoantša tšepo ea rona le ankora lengolong la hae le eang ho Baheberu. (Bala Baheberu 6:​19.) Kaha Pauluse o ne atisa ho nka maeto ka sekepe, o ne a tseba hore ho sebelisoa ankora ho thusa sekepe hore se se ke sa ea koana le koana. Ka nako e ’ngoe ho ile ha tsoha sefefo se matla a le ka sekepeng. Ka nako eo, o ile a bona basesisi ba sekepe ba akhela liankora ka metsing e le ho thusa sekepe hore se se ke sa fefoha eaba se soahlamana majoeng. (Lik. 27:​29, 39-41) Joalokaha ankora e tsitsisa sekepe, tšepo ea rona e re thusa hore re se ke ra suthela hole le Jehova ha re kopana le mathata a tšoanang le lifefo tse matla. Tšepo eo re nang le eona e re thusa hore re lule re khobile matšoafo leha re kopana le mathata hobane re lumela hore lintho li tla loka. Re lokela ho hopola hore Jesu o ile a re re tla hlorisoa. (Joh. 15:​20) Kahoo, ho nahana ka lintho tseo Jehova a re fileng tsona ho re thusa hore re lule re mo sebeletsa.

5. Ho ba le tšepo ho ile ha thusa Jesu joang ha a ne a tobane le lefu?

⁵ Nahana kamoo tšepo e ileng ea thusa Jesu hore a lule a tšepahala leha a ne a tseba hore o tl’o shoa lefu le sehloho. Ka letsatsi la Pentekonta ea selemo sa 33, moapostola Petrose o ile a bua ka boprofeta bo hlahang bukeng ea Lipesaleme bo neng bo hlalosa kamoo Jesu a neng a khobile matšoafo kateng. Bo re: “Ke tla lula ke e-na le tšepo hobane u ke ke oa ntlohela Lebitleng kapa oa lumella motho ea u tšepahallang hore a bolle lebitleng . . . U tla etsa hore ke thabe haholo ha ke na le uena.” (Lik. 2:​25-28; Pes. 16:​8-11) Leha Jesu a ne a tseba hore o tl’o shoa, o ne a e-na le tšepo e tiileng ea hore Jehova o tla mo tsosa le hore o tla boela a thabele ho ba le eena leholimong.​—Baheb. 12:​2, 3.

6. Mor’abo rona Leonard Chinn o ile a re’ng ka tšepo?

⁶ Tšepo eo re nang le eona re le Bakreste e thusitse bara le barali babo rona ba bangata ho mamella. Nahana ka mohlala oa Mor’abo rona Leonard Chinn ea lulang Engelane. Nakong ea Ntoa ea Pele ea Lefatše o ile a kenngoa teronkong hobane a ne a sa batle ho kenela sesole. O ile a koalloa seleng a le mong ka likhoeli tse peli. Ka mor’a moo, o ile a qobelloa ho etsa mosebetsi o boima. Hamorao o ile a ngola a re: “Maemo ao ke ileng ka ba ho ’ona a ile a nthusa ho bona kamoo tšepo e leng ea bohlokoa kateng ho re thusa ho mamella. Re na le mohlala oa Jesu, baapostola le baprofeta. Re boetse re na le litšepiso tsa bohlokoa tse hlahang ka Bibeleng. Kaofela ha tsona li re thusa hore re lule re e-na le tšepo e tiileng ka bokamoso hape li re thusa ho mamella.” Tšepo e ile ea e-ba joaloka ankora ho Mor’abo rona Leonard, le ho rona e ka ba ka tsela e tšoanang.

7. Mathata a tiisa tšepo ea rona joang? (Baroma 5:​3-5; Jakobo 1:12)

⁷ Ka mor’a ho mamella liteko ’me re hlokomela kamoo Jehova a re thusitseng kateng, tšepo ea rona e tiea le ho feta. (Bala Baroma 5:​3-5; Jakobo 1:​12.) E tiea ho feta ha re ne re qala ho ithuta Bibele. Satane o batla hore mathata a re imele empa Jehova o re thusa hore re atlehe ho a mamella.

TŠEPO EA RONA E TŠOANA LE HELMETE

8. Tšepo ea rona e ka tšoana le helmete joang? (1 Bathesalonika 5:8)

⁸ Bibele e re tšepo ea rona e ka boela ea tšoana le helmete. (Bala 1 Bathesalonika 5:8.) Lesole le roala helmete ho sireletsa hlooho ea lona ha le le ntoeng. Kaha le rona re ntoeng le Satane, re lokela ho sireletsa likelello tsa rona e le hore a se ke a li silafatsa. O sebelisa lintho tse ngata ho silafatsa menahano ea rona le ho etsa hore re lakatse ho etsa lintho tse fosahetseng. Kahoo, feela joalokaha helmete e sireletsa hlooho ea lesole, tšepo e sireletsa menahano ea rona e le hore re ka lula re tšepahalla Jehova.

9. Ho etsahala’ng ka batho ha ba se na tšepo?

⁹ Ho ba le tšepo ea bophelo bo sa feleng ho tla re thusa hore re etse lintho ka bohlale. Ka lehlakoreng le leng, haeba tšepo e se matla, re ka iphumana re se re nahana ka lintho tseo re li batlang feela eaba re lebala ka bophelo bo sa feleng. Nahana ka Bakreste ba neng ba phela Korinthe mehleng ea khale. Ba ile ba khaotsa ho lumela tšepisong ea Molimo ea tsoho. (1 Bakor. 15:​12) Pauluse o ile a re batho ba se nang tšepo ea tsoho ba phelela ho khotsofatsa litakatso tsa bona feela. (1 Bakor. 15:​32) Mehleng ena batho ba se nang tšepo litšepisong tsa Molimo ba etsa ntho e ’ngoe le e ’ngoe e ka ba khotsofatsang. Ho fapana le bona, re behile tšepo ea rona bokamosong boo Molimo a re tšepisitseng bona. Tšepo ea rona e tšoana le helmete ea tšoantšetso e sireletsang menahano ea rona ’me e re thusa hore re se ke ra inahana borona feela e leng ntho e ka senyang kamano ea rona le Jehova.​—1 Bakor. 15:​33, 34.

10. Ho ba le tšepo ho ka re thusa joang hore re se ke ra ba le menahano e fosahetseng?

¹⁰ Tšepo e ka re thusa hore re se ke ra nahana hore ha ho mohla re tla khona ho khahlisa Jehova. Ka mohlala, batho ba bang ba nahana hore ha ba tšoanelehe ho phela ka ho sa feleng. Ba bang ba ka nahana hore ha ba bohlokoa hakaalo, ha ba bang bona ba ka ikutloa eka ba ke ke ba khona ho phela ka tsela eo Molimo a e ratang. Re lokela ho hopola hore Elifaze ea neng a etsa eka o tšelisa Jobo, o ile a bua lintho tse tšoanang le tseo ho Jobo. O ile a re: “Ha ho mohla motho e ka bang ea hloekileng.” A boela a re: “Molimo ha a tšepe mangeloi a hae le maholimo ha aa hloeka mahlong a hae.” (Jobo 15:​14, 15) Ao ke mashano e le kannete! Re lokela ho hopola hore Satane ke eena ea susumetsang mashano ana. Oa tseba hore ha re lula re nahana ka tsela eo, re ka qetella re se re se na tšepo. Le ka mohla u se ke oa lumela mashano ao ho e-na le hoo u lule u nahana ka litšepiso tsa Jehova. Kholiseha hore o batla u phele ka ho sa feleng hape o tla u thusa hore u finyelle seo.​—1 Tim. 2:​3, 4.

LULA U E-NA LE TŠEPO E TIILENG

11. Ke hobane’ng ha re lokela ho ba le mamello ha re ntse re emetse lintho tseo re li tšepisitsoeng?

¹¹ Ha se ka linako tsohle ho leng bonolo hore re lule re e-na le tšepo e tiileng. Re ka ’na ra felloa ke tšepo ha re ntse re emetse Molimo hore a phethahatse litšepiso tsa hae. Ke khale Jehova a le teng kahoo nako e ka bonahalang e le telele ho rona, ho eena ke nako e khutšoanyane. (2 Pet. 3:​8, 9) Jehova o tla etsa seo a se tšepisitseng, leha ho le joalo e ka ’na ea se ke ea e-ba ka nako eo rona re e lebeletseng. Ke’ng e ka re thusang hore re lule re e-na le tšepo e tiileng ha re ntse re emetse hore Molimo a etse lintho tseo a li tšepisitseng?​—Jak. 5:​7, 8.

12. Ho ea ka Baheberu 11:​1, 6, tumelo e re thusa joang hore re be le tšepo?

¹² Re tla ba le tšepo e tiileng hafeela re lula re le haufi le Jehova e leng eena ea fanang ka tšepo. E le hore re be le tšepo, re lokela ho ba le tumelo ea hore Jehova o teng ’me “o putsa ba mo batlang e le kannete.” (Bala Baheberu 11:​1, 6.) Haeba re lumela hore Jehova o teng, re tla kholiseha hore o tla etsa lintho tseo a li tšepisitseng. A re hlahlobeng lintho tse ka re thusang ho matlafatsa kamano ea rona le Jehova e leng se tla re thusa hore re be le tšepo e tiileng.

13. Re ka atamela ho Molimo joang?

¹³ Rapela Jehova ’me u bale Lentsoe la hae. Le hoja re ke ke ra bona Jehova, re ka khona ho atamela ho eena. Re ka bua le eena ka thapelo re kholisehile hore o tla re mamela. (Jer. 29:​11, 12) E le hore re mamele Molimo, re lokela ho bala Lentsoe la hae le ho nahanisisa ka seo re se balileng. Tšepo ea rona e tiea le ho feta ha re ithuta kamoo Jehova a ileng a thusa bahlanka ba hae ba tšepahalang kateng nakong e fetileng. Ntho e ’ngoe le e ’ngoe e ka Lentsoeng la Molimo, e ile ea “ngolloa ho re ruta e le hore re be le tšepo. Ha e le hantle, Mangolo ao aa re tšelisa ebile a re thusa hore re mamelle.”​—Bar. 15:4.

14. Ke hobane’ng ha re lokela ho hlahloba lintho tseo Jehova a li etselitseng batho ba bang?

¹⁴ Nahana ka litšepiso tsa Jehova tseo a seng a li phethahalitse. Nahana ka ntho eo Molimo a ileng a e etsetsa Abrahama le Sara. Ba ne ba se ba tsofetse hoo ba ke keng ba e-ba le bana. Leha ho le joalo, Molimo o ile a ba tšepisa hore ba tla ba le ngoana. (Gen. 18:​10) Abrahama o ile a etsa’ng? Bibele e re o ne a ‘e-na le tumelo ea hore e tla ba ntate oa lichaba tse ngata.’ (Bar. 4:​18) Le hoja Abrahama a ne a sa tsebe hore na Molimo o tla phethahatsa tšepiso ea hae joang, o ne a kholisehile hore Jehova o tla phethahatsa seo a se tšepisitseng. Monna enoa ea nang le tumelo ha aa ka a soetseha. (Bar. 4:​19-21) Litlaleho tse kang tsena li re kholisa hore Jehova o tla phethahatsa litšepiso tsa hae leha rona re bona eka ho ke ke ha khoneha.

15. Ke hobane’ng ha re lokela ho nahana ka lintho tseo Jehova a re etselitseng tsona?

¹⁵ Nahana ka seo Jehova a u etselitseng sona. Nahana ka melemo eo u e fumaneng litšepisong tse ka Lentsoeng la Molimo tse seng li phethahetse. Ka mohlala, Jesu o tšepisitse hore Ntate oa hae o ne a tla re fa lintho tseo re li hlokang letsatsi le letsatsi. (Mat. 6:​32, 33) Jesu o ile a boela a re tiisetsa hore Jehova o tla re fa moea oa hae o halalelang ha re o kopa. (Luka 11:​13) Jehova o phethahalitse litšepiso tseo. Nahana ka lintho tseo Jehova a li tšepisitseng tseo a seng a u etselitse tsona. Ka mohlala, o tšepisitse hore o tla u tšoarela, o tla u tšelisa a be a u fe lintho tseo u li hlokang e le hore u lule u le haufi le eena. (Mat. 6:​14; 24:​45; 2 Bakor. 1:3) Ha u nahana ka lintho tseo Molimo a seng a u etselitse tsona, tšepo ea hao e tla ba matla linthong tseo a tla u etsetsa tsona ka moso.

THABELA TŠEPO EO U NANG LE EONA

16. Ke hobane’ng ha tšepo e le mpho ea bohlokoa?

¹⁶ Tšepo ea rona ea bophelo bo sa feleng ke mpho e tsoang ho Molimo. Re lebeletse bokamoso bo thabisang haholo boo re tsebang hantle hore boa tla, ho bata kapa ho chesa. Tšepo ena e tšoana le ankora kaha e re thusa hore re se ke ra tsukutloa ke mathata, re mamelle ha re hlorisoa esita leha re tobane le lefu. E tšoana le helmete kaha e sireletsa likelello tsa rona e le hore re se ke ra ba le menahano e ka etsang hore re etse lintho tse fosahetseng. E boetse e re thusa hore re etse lintho tse nepahetseng. Tšepo eo Bibele e re fang eona e re atametsa ho Molimo ebile e re thusa ho bona hore na o re rata haholo hakae. Re fumana molemo o moholo haeba re lula re e-na le tšepo e matla.

17. Ke hobane’ng ha tšepo eo re nang le eona e re thabisa?

¹⁷ Pauluse o ile a khothalletsa Baroma hore ba ‘thabe ka lebaka la tšepo eo ba nang le eona.’ (Bar. 12:​12) Pauluse o ne a thabile hobane o ne a tseba hore o tla phela ka ho sa feleng leholimong hafeela a ntse a tšepahala. Le rona re ka thabela tšepo eo re nang le eona hobane rea tseba hore Jehova o tla phethahatsa litšepiso tsa hae. Mopesaleme o ile a ngola a re: “Ho thaba motho . . . ea tšepileng Jehova Molimo oa hae . . . ea lulang a tšepahala.”​—Pes. 146:​5, 6.