Re ka Tšepa Seo Bibele e se Buang ka se Nepahetseng le se Fosahetseng

RE HLOKA MOLIMO HORE A RE TATAISE

Ka Bibeleng, Jehovaa Molimo o bontšitse hore batho ba hloka thuso ea hae, ba ke ke ba khona ho etsa letho kantle ho eena. (Jeremia 10:23) Ke kahoo a faneng ka melao e re tataisang e hlahang ka Bibeleng. Molimo oa re rata ’me ha a batle hore re etse liqeto tse tla re utloisa bohloko le ho etsa hore bophelo ba rona bo be thata. (Deuteronoma 5:29; 1 Johanne 4:8) Joaloka ’Mopi oa rona, o re fa bohlale le tsebo tse tla re thusa ho phela bophelo bo molemo ka ho fetisisa. (Pesaleme ea 100:3; 104:24) Leha ho le joalo, Molimo ha a qobelle batho ho phela ka melao ea hae.

Jehova o ile a fa Adama le Eva lintho tsohle tseo ba neng ba li hloka e le hore ba thabe e le ka ’nete. (Genese 1:​28, 29; 2:​8, 15) O ne a boetse a ba file litaelo tse bonolo tseo a neng a lebeletse hore ba li phethe. Leha ho le joalo, o ne a ba lumeletse hore ba ikhethele hore na ba tla latela litaelo tseo kapa che. (Genese 2:​9, 16, 17) Ka masoabi, Adama le Eva ba ile ba khetha ho phela ka tsela eo ba e batlang ho e-na le ho phela ka tsela eo Molimo a e batlang. (Genese 3:6) Na qeto ea bona e ile ea ba tsoela molemo? Na batho baa thaba ha ba phela ka tsela eo ba nahanang hore e nepahetse? Che, ho theosa le lilemo re bone hore ho se phele ka melao ea Molimo ha ho tlisetse batho thabo le khotso.—Moeklesia 8:9.

Bibele e re thusa ho etsa liqeto tse molemo ho sa tsotellehe hore na re tsoa hokae. (2 Timothea 3:​16, 17; sheba lebokose le reng “Buka ea Batho Bohle.”) Bibele e re thusa joang?

Ithute hore na ke hobane’ng ha Bibele e bitsoa “lentsoe la Molimo.”—1 Bathesalonika 2:13. Shebella video e nang le sehlooho se reng Mongoli oa Bibele ke Mang? websaeteng ea jw.org/st.

BIBELE E RE BOLELLA SEO MOLIMO A BATLANG HORE RE SE ETSE

Bibele e re bolella kamoo Jehova a ’nileng a sebelisana le batho kateng ho tloha qalong. E re thusa ho utloisisa hore na ke lintho life tseo Molimo a li nkang li nepahetse kapa li fosahetse le tseo a li nkang li le molemo kapa li le kotsi. (Pesaleme ea 19:​7, 11) Melao-motheo eo re ithutang eona Bibeleng ha e felloe ke nako hape e re thusa ho etsa liqeto tse tla re tsoela molemo bophelong.

Ka mohlala, hlokomela molao-motheo oo re o fumanang lengolong la Liproverbia 13:20: “Ea tsamaeang le batho ba bohlale o tla hlalefa empa ea sebelisanang le ba hlokang kelello lintho li tla mo tsamaela hampe.” Molao-motheo ona haesale o sebetsa ho tloha khale ’me o ntse o le molemo le kajeno. Bibele e na le melao-motheo ea bohlokoa e tšoanang le ona e ka re thusang.—Sheba lebokose le reng “Likeletso Tsa Bibele li Ntse li Sebetsa le Kajeno.”

Mohlomong u ka ipotsa, ‘Nka kholiseha joang hore likeletso tsa Bibele li ka nthusa?’ Sehloohong se latelang, re tla bona mehlala ea batho ba ileng ba sebelisa likeletso tsa Bibele.