Lengolo le Tsoang ho Sehlopha se Busang
Basebetsi-’moho le Rōna ba Ratehang ba Lipaki Tsa Jehova:
Re phela nakong e thabisang hakaakang! Ka sebele re nyakaletse! Bara le barali babo rōna ba ratehang, ruri re thabela ho sebetsa ’moho le lōna “ka mahetla a bapileng” ha re ntse re pakela Ntate oa rōna ea leholimong, Jehova, ka tsela e matla ho feta eo a kileng a pakeloa ka eona.—Sof. 3:9; Joh. 14:12.
Thabo eo re nang le eona ha re sebeletsa Jehova ha e bolele hore mathata a maholo a re pota ka thōko. Selemong se fetileng sa tšebeletso, ba bang ba lōna ba bile mahlomoleng ka lebaka la litšisinyeho tsa lefatše, likhohola, meroallo le likoluoa tse ling tsa tlhaho tse ka bolaeang motho. (Mat. 24:7) Letsatsi le letsatsi ba bangata ba sotloa ke ho kula le botsofali. Bohle re loana le “bohloko ba mahlomola” bo ntseng bo tota. (Mat. 24:8) Linaheng tse ngata, ho akarelletsa le Armenia, Eritrea le Korea Boroa, barab’abo rōna ba bangata ba koaletsoe lichankaneng ka lebaka la tumelo ea bona.—Mat. 24:9.
Ke eng e re thusitseng hore re se ke ra felloa ke tšepo le har’a mathata aa? Temana ea selemo ea 2010 e re hopolitse ntlha ena ea bohlokoa: ‘Lerato le mamella lintho tsohle. Lerato ha le fele le ka mohla.’ (1 Bakor. 13:7, 8) Ha ho pelaelo hore lerato leo re ratanang ka lona hammoho le leo re ratang Jehova ka lona, lea re matlafatsa hore re mamelle ka katleho.
Ba bangata ba reng ke Bakreste baa makala ha ba bona mosebetsi o moholo oa boboleli oo re o etsang le hore re o etsa re sa khaotse. Le hoja mohlomong ba sa lumellane le litumelo le lithuto tsa rōna, ba bang ba ile ba ba ba susumelletseha hore ba re, “Le etsa mosebetsi oo re lokelang hore ebe rea o etsa!” Lebaka le leng le etsang hore Lipaki Tsa Jehova li tsoele pele li bolela litaba tse molemo kamehla ke lefe? Re sa boetse re re li o etsa ka lebaka la lerato. Joaloka Ntate oa rōna ea leholimong, ha re batle hore leha e le mang a timetsoe. (2 Pet. 3:9) Takatso ea rōna ea hore bohle ba fihle pakong e bontšoa ke tlhōrō e ncha ea bahoeletsi ba 7 508- 050 ba tlalehiloeng selemong sa tšebeletso se fetileng. Ke mokhatlo ofe o mong oa bolumeli o nang le basebeletsi ba mafolofolo le ba bangata hakaalo bao ka boithaopo ba tšoarehileng mosebetsing oa boboleli oo ba o etsang ka lerato?
Rea khothala ha re bona boprofeta bona bo tlalehiloeng ke Esaia bo tsoela pele ho phethahala: “Karolong e qetellang ea matsatsi thaba ea ntlo ea Jehova e tla tiisoa ka thata ka holim’a litlhōrō tsa lithaba, ’me ka sebele e tla phahamela maralla; lichaba tsohle li tla phallela ho eona.” (Esa. 2:2-4) Har’a bongata bo boholo bo phallelang ntlong ea Jehova ke batho ba 294 368 ba kolobelitsoeng selemong sa tšebeletso se fetileng. Re amohela batho bana ba bohlokoa ka liatla tse peli mokhatlong oa rōna. E se eka lerato la rōna la Bokreste le ka re susumelletsa hore re tsoele pele ho ba thusa ho loantša litlhaselo tsa sera sa rōna Satane Diabolose.—1 Pet. 5:8, 9.
Tlhōrō e fetang tsohle ea batho ba 18 706 895 ba bileng teng Sehopotsong ka Labobeli la la 30 March, 2010, e bontša hore ho sa ntse ho ka lebelloa hore ba bang ba limilione ba ikopanye le rōna borapeling ba Jehova. Ka sebele re thabela hore ebe Jehova ha a e-s’o felise tsamaiso ena ea lintho e khopo! Khabareng, lerato la rōna le re thusa hore re ’ne re mamelle.—2 Bathes. 3:5.
Likopano tsa Setereke tsa “Lulang le le Haufi le Jehova!” tseo boholo ba tsona li ileng tsa tšoaroa lefatšeng lohle ka 2010, li matlafalitse kamano ea rōna le Ntate oa rōna ea leholimong, Jehova. Ruri mantsoe a mopesaleme ke a ’nete ha a re: “Ho thaba batho bao Molimo oa bona e leng Jehova!” (Pes. 144:15) Ho sa tsotellehe hore na ho tla ba joang ka moso, re kholisehile hore ha Jehova a le ka lehlakoreng la rōna, ha ho letho leo re ka le tšohang. (Pes. 23:4) Haufinyane Jehova o tla sebelisa Mora oa hae hore a ‘qhaqhe mesebetsi ea Diabolose.’ (1 Joh. 3:8) Ruri re labalabela hore letsatsi leo le tle! Empa pele ho moo, re na le mosebetsi o mongata oo re ka phathahanang ka oona.—1 Bakor. 15:58.
Kholisehang hore ha ‘re phetse’ ho bua ka lōna lithapelong tsa rōna. (Bar. 1:9) E se eka le ka ‘ipoloka leratong la Molimo, ha le ntse le letetse mohau oa Morena oa rōna Jesu Kreste ka tebello ea bophelo bo sa feleng.’—Juda 21.
Re le rata kaofela!
Barab’abo lōna,
Sehlopha se Busang sa Lipaki Tsa Jehova