Batho ba Limilione Tse Tšeletseng ba Bolailoe ke Seoa sa COVID-19​—Bibele e Re’ng ka Taba Ee?

Mokhatlo oa Lefatše oa Bophelo e leng WHO o ile oa re ho tloha ka la 23 May 2022, batho ba limilione tse 6.27 ba bolailoe ke seoa sa COVID-19. Leha ho le joalo ka la 5 May 2022, mokhatlo oa WHO o ile oa hakanya hore palo ea batho ba hlokahetseng e ngata ho feta eo. O ile oa re ho tloha ka 2020 ho ea ho 2021, “batho ba ileng ba bolaoa ke seoa sa COVID-19 kapa maloetse a mang a amanang le sona . . . ke ba ka bang limilione tse 14.9.” Bibele e re’ng ka litaba tse utloisang bohloko hakaale?

Bibele e ile ea bolela hore ho tla ba le mafu a seoa

•  Jesu o ile a re “matsatsing a ho qetela” ho tla ba le mafu a seoa.​—Luka 21:​11, Contemporary English Version; 2 Timothea 3:1.

Seo Jesu a ileng a se bua sea phethahala. Ho fumana lintlha tse ling, bala sehlooho se reng, “Re Tl’o Bona Ka’ng Hore re ‘Matsatsing a ho Qetela,’ kapa ‘Bofelong ba Lintho’?” (“What Is the Sign of ‘the Last Days,’ or ‘End Times’?”)

Bibele ea re tšelisa

•  ‘Molimo oa matšeliso ’ohle . . . o re tšelisa matšoenyehong ’ohle.’​—2 Bakorinthe 1:​3, 4.

Batho ba bangata ba ileng ba hlokahalloa ke baratuoa ba bona ba ile ba tšelisoa ke Bibele. Ho fumana lintlha tse ling bala sehlooho se reng, “U ka Etsa’ng ha U Siame?​—Lintho Tseo U ka li Etsang Hona Joale” le se reng, “Matšeliso a Molemo ho Batho ba Siameng.”

Bibele ea re bolella hore na ke’ng e ka lokisang lintho

•  “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”​—Matheu 6:10.

Haufinyane ‘’Muso oa Molimo’ o tla etsa bonnete ba hore “ha ho moahi ea tla re: ‘Kea kula.’” (Mareka 1:​14, 15; Esaia 33:​24) Shebella video e reng ’Muso oa Molimo ke Eng? e le hore u ithute ka ’Muso ona o leholimong le ho tseba hore na o tla etsa’ng.

Re u mema hore u ithute haholoanyane ka seo Bibele e se rutang e le hore uena le lelapa la hao le ka fumana molemo likeletsong tsa eona tse bohlale le litšepisong tsa eona tse thabisang.