Na ho na le Motho ea ka Tsebang Hore na ke Mang ea Ngotseng Bibele?

Karabo ea Bibele

Batho ba bangata ba bolelloa hore re ke ke ra tseba hore na ke mang ea ngotseng Bibele. Empa hangata Bibele ea hlakisa hore na ke mang ea ngotseng litaba tse ka ho eona. Likarolo tse ling tsa eona li qala ka mantsoe a kang “mantsoe a Nehemia,” “pono ea Esaia” le “lentsoe la Jehova le ileng la hlaha ho Joele.”—Nehemia 1:1; Esaia 1:1; Joele 1:1.

Bangoli ba bangata ba Bibele baa lumela hore ba ngotse ka lebitso la Jehova, Molimo a le mong oa ’nete le hore o ne a ba tataisa. Baprofeta ba ngotseng Mangolo a Seheberu ba ile ba re ka makhetlo a fetang 300: “Sena ke seo Jehova a se boletseng.” (Amose 1:3; Mikea 2:3; Nahume 1:12) Bangoli ba bang ba ile ba fumana molaetsa oa Molimo ka mangeloi.—Zakaria 1:7, 9.

Bibele e ngotsoe ke banna ba ka bang 40 ka lilemo tse ka bang 1 600. Banna ba bang ba ile ba sebelisoa hore ba ngole libuka tse ’maloa tsa Bibele. Ha e le hantle, Bibele e tšoana le laebrari e nyenyane e nang le libuka tse 66. E na le libuka tse 39 tsa Mangolo a Seheberu, ao ba bangata ba reng ke Testamente ea Khale le libuka tse 27 tsa Mangolo a Segerike a Bakreste, ao hangata a bitsoang Testamente e Ncha.