Bibele e Re’ng ka Bolokolohi ba ho Ikhethela? Na Molimo o Laola Qetello ea Hao?
Karabo ea Bibele
Molimo o re file tokelo ea ho ikhethela, e leng matla a ho iketsetsa liqeto ho e-na le hore a rere esale pele hore na re tla etsa’ng. Hlokomela seo Bibele e se rutang.
Molimo o bōpile batho ka setšoantšo sa hae. (Genese 1:26) Ho fapana le liphoofolo, tse etsang lintho ho ea ka tšekamelo ea tsona ea tlhaho, rōna re bontša seo ’Mōpi oa rōna a leng sona ka bokhoni ba rōna ba ho bontša litšobotsi tse kang lerato le toka. Joaloka ’Mōpi oa rōna, re na le bolokolohi ba ho ikhethela.
Ka linako tse ling, tsela eo re etsang lintho ka eona e ka bontša hore na re tla ba le bokamoso ba mofuta ofe. Bibele e re khothalletsa hore re ‘khethe bophelo ka hore re mamele lentsoe la Molimo,’ e leng se bolelang ho khetha ho mamela litaelo tsa hae. (Deuteronoma 30:19, 20) Khothalletso eo e ne e ke ke ea thusa ka letho ebile e ne e tla bontša sehlōhō haeba re ne re se na bolokolohi ba ho ikhethela. Ho e-na le hore Molimo a re qobelle ho etsa seo a reng re se etse, o ipiletsa ho rōna ka mofuthu o re: “Hoja u ka ela litaelo tsa ka hloko! Joale khotso ea hao e ne e tla tšoana le nōka.”—Esaia 48:18.
Ha ho na motho ea laolang hore na re tla atleha kapa re tla hlōleha bophelong. Haeba re batla ho atleha mosebetsing oo re o etsang, re lokela ho sebetsa ka thata. Bibele e re: “Sohle seo letsoho la hao le fumanang hore le ka se etsa, u se etse ka matla a hao.”(Moeklesia 9:10) E boetse e re: “Ka sebele merero ea ea khothetseng e tlisa molemo.”—Liproverbia 21:5.
Ho ba le bolokolohi ba ho ikhethela ke mpho ea bohlokoa e tsoang ho Molimo, kaha bo re fa monyetla oa ho mo rata ka ‘lipelo tsa rōna tsohle’—hobane re batla.—Matheu 22:37.
Na Molimo ha a laole lintho tsohle?
Bibele e ruta hore Molimo o Matla ’Ohle ’me matla a hae ha a lekanyetsoe ke mang kapa mang ntle le eena. (Jobo 37:23; Esaia 40:26) Leha ho le joalo, ha a sebelise matla a hae ho laola ntho e ’ngoe le e ’ngoe. Ka mohlala, Bibele e re Molimo o ile a “sebelisa boitšoaro” ho Babylona ea boholo-holo, eo e neng e le sera sa batho ba hae. (Esaia 42:14) Ka ho tšoanang, hona joale o khethile ho mamella batho ba sebelisang bolokolohi ba bona hampe ho utloisa batho ba bang bohloko. Empa Molimo a ke ke a etsa seo ka ho sa feleng.—Pesaleme ea 37:10, 11.