Lipaki Tsa Jehova li Ikutloa Joang ka Tlhalo?
Re mamela melao eo Molimo a faneng ka eona ka Bibeleng mabapi le lenyalo le tlhalo. Molimo o entse hore lenyalo ebe tlamahano ea bophelo bohle pakeng tsa monna le mosali. Ho ea ka Bibele, banyalani ba ka hlalana feela haeba molekane e mong a entse bofebe.—Matheu 19:5, 6, 9.
Na Lipaki Tsa Jehova li thusa banyalani ha ba e-na le mathata lenyalong?
E!, Ka mekhoa e fapa-fapaneng e latelang:
Lingoliloeng tsa rona. Ho na le lingoliloeng tsa rona tse nang le lihlooho tse ka thusang manyalo le ao ho bonahalang e ka a ke ke a atleha. Mohlala, sheba lihlooho tsena “Ho Phelela Boitlamo ba Lōna ba Lenyalo,” “Tsela ea ho Tšoarela” le “Le ka Etsa Joang Hore le Boele le Tšepane?”
Liboka tsa rona. Libokeng le likopanong ho fanoa ka lipuo tse thehiloeng Bibeleng tse thusang manyalo.
Baholo. Baholo ba phutheho ba thusa banyalani ba sebelisa Mangolo a kang la Baefese 5:22-25.
Na Baholo ba ka khothalletsa banyalani ho hlalana?
Che! Baholo ha ba na tokelo ea ho bolella banyalani hore na ba nke qeto efe le hoja ba thusa banyalani ka mathata a bona a lenyalo. (Bagalata 6:5) Leha ho le joalo, ha motho a ka hlala molekane oa hae ntle ho mabaka a sa lumelloeng ke Mangolo, ha lokela ho nyala hape ’me o lahleheloa le ke litokelo ka phuthehong.—1 Timothea 3:1, 5, 12.
Na Lipaki li lumela hore banyalani ba ka arohana?
Ho ea ka Bibele, ha se mathata ’ohle a ka etsang hore banyalani ba hlalane. (1 Bakorinthe 7:10-16) Ba ka hlola mathata a mangata ka ho rapela, ho sebelisa melao-motheo ea Bibele le ho lula ba ratana.—1 Bakorinthe 13:4-8; Bagalata 5:22.
Leha ho le joalo, Bakreste ba ka arohana le balekane ba bona ka lebaka la maemo a latelang:
Ho se hlokomele lelapa ka boomo.—1 Timothea 5:8.
Tlhekefetso e feteletseng.—Pesaleme ea 11:5.
Ho sitisa motho ka ho feletseng ho rapela Jehova. Mohlala, ha Paki e ka sitisoa ke molekane oa eona ho mamela melao ea Jehova, e ka etsa qeto ea hore ba arohane e le hore a “mamela Molimo e le ’musi ho e-na le batho.”—Liketso 5:29.