SE KA THUSANG LELAPA
U Ka Etsa’ng ho Thusa Ngoana oa Hao Hore a Sebetse Hantle Sekolong?
A re nke hore ngoana oa hao ha a rate ho kena sekolo, ha a etse mosebetsi oa hae oa sekolo ebile ha a rate ho ithuta. Bothata e ka ba bofe? Mosebetsi oa hae oa theoha le tsela eo a itšoarang ka eona e ea fetoha. U ka mo thusa joang hore a sebetse hantle?
U lokela ho tseba’ng
Ho omana ho baka mathata. Haeba u qobella ngoana ho etsa mosebetsi oa sekolo a ka lula a tšoenyehile ha a le sekolong le ha a le hae. E le hore a ikimolle, ngoana a ka qalella ho bua leshano, haeba a fumane limaraka tse tlaase a ka li pata, a ka ba a tekena ripoto joalokaha eka ke motsoali ea e tekenneng, qetellong a ka ba a lofa sekolo. Kahoo, hoa hlaka hore mathata a tla eketseha le ho feta.
Ho fana ka limpho ho ka ’na hoa senya litaba. Ntate Andrew o re “Ha morali oa rona a pasitse re ne re mo etsetsa ho hong hore a thabe empa ka bomalimabe o ne a se a ameha haholo ka ho fumana limpho eseng ka mosebetsi oa hae oa sekolo. Hoo e neng e re ha a sebelitse hampe a neng a koatela hore ha a fumana limpho ho e-na le hore a koatele hore ha a sebetsa hantle.”
Ho beha matichere molato ha ho thuse. Ngoana a ka etsa qeto ea hore e le hore a pase hantle ha ho hlokahale hore a sebetse ka thata. A ka boela a ithuta ho beha batho ba bang molato ka liphoso tsa hae a ba a lebella hore ba mo rarollele mathata a hae. Hoa hlaka hore a ka thatafalloa ho itharollela mathata e leng ntho e tla mo thusa le ha a se a le moholo.
U lokela ho etsa’ng
Laola maikutlo a hao. Haeba u utloa u koatile ka lebaka la mosebetsi oa ngoana o mobe, leka ho buisana le eena nakong eo u sa koatang. Ntate Brett o re, “’Na le mohatsa’ka re ile ra atleha ho thusa ngoana oa rona ha re ne re bua le eena re khobile matšoafo re bile re mo bontša qenehelo.”
Molao-motheo oa Bibele: “Motho e mong le e mong a potlakele ho utloa, a liehe ho bua, a liehe ho halefa.”—Jakobo 1:19.
Tseba bothata. Ho na le mabaka a mangata a ka etsang hore ngoana a se ke a sebetsa hantle sekolong, a kang ho hlorisoa ke ba bang, ho kena likolo tse fapakaneng, ho tšoengoa ke litlhahlobo, mathata a ka lapeng, ho se robale hantle, ho se iketsetse lethathamo la ho ithuta le ho hloleha ho tsepamisa kelello mosebetsing oa hae. U se ke oa etsa qeto ea hore ngoana oa hao o botsoa mosebetsing oa hae sekolo.
Molao-motheo oa Bibele: “Ea bontšang temohisiso tabeng o tla fumana se molemo.”—Liproverbia 16:20.
Lokisa lintho bakeng sa ho ithuta. Thusa ngoana oa hao hore a be le lethathamo la ho ithuta. U ka boela oa mo thusa hore a etsetse mosebetsi oa sekolo sebakeng se nepahetseng moo ho se nang lintho tse ka mo sitisang (tse kang thelevishene le selefouno). Mo thuse ho arola mosebetsi oo a o fuoeng sekolong le ho o leka-lekanya hantle e le hore a ka tsepamisa kelello. Ntate Hector oa Jeremane o re, “Ha nako ea hore bana ba tl’o ngola tlhahlobo e atamela, re ikhopotsa lintho tse seng kae le bona letsatsi le letsatsi ho e-na le hore re emele motsotso oa ho qetela.”
Molao-motheo oa Bibele: “Ho na le nako e behiloeng bakeng sa ntho e ’ngoe le e ’ngoe.”—Moeklesia 3:1.
Mo khothalletse ho ithuta. Haeba ngoana a utloisisa molemo oa ho kena sekolo hona joale, o tla khothalla ho ithuta. Ka mohlala, lipalo li ka mo thusa hore a be le moralo oa ho sebelisa chelete hantle.
Molao-motheo oa Bibele: “Fumana bohlale, fumana kutloisiso. . . . Bo nke e le ba bohlokoa haholo.”—Liproverbia 4:5, 8.
Malebela: Thusa ngoana ka mosebetsi oa hae oa sekolo empa u se ke oa mo etsetsa oona. Ntate Andrew o lumellana le taba ena kaha o re, “Morali oa rona o ne a sa batle ho sebelisa kelello ea hae empa o ne a batla hore rona re mo nahanele.” Ruta ngoana oa hao ho iketsetsa mosebetsi oa sekolo.