Pesaleme ea 37:4—“Thabela Morena”

“Jehova o tla etsa hore u thabe haholo, o tla u fa lintho tseo pelo ea hao e li batlang.”—Pesaleme ea 37:4, Bibele—Phetolelo ea Lefatše le Lecha.

“Thabela Morena, ’me o tla u nea tse lakatsoang ke pelo ea hao.”—Pesaleme ea 37:4, Phetolelo e Ncha.

Pesaleme ea 37:4 e bolela’ng?

Mopesaleme o hlalosa hore bahlanka ba Molimo baa thaba hobane e le metsoalle ea Hae e haufi. Ka hona, bohle ba thabelang setsoalle seo ba ka kholiseha hore Jehovaa Molimo o tla ba fa lintho tseo ba li batlang tse tumellanong le thato ea hae.

“Jehova o tla etsa hore u thabe haholo.” Ka mantsoe a bonolo, re lokela ho thabisoa ke ho sebeletsa Molimo oa ’nete. (Pesaleme ea 37:4) Ke hobane’ng ha re cho joalo?

Batho ba sebeletsang Jehova ba sheba litaba ka tsela eo Jehova a li shebang ka eona joalokaha ho bontšoa ka Bibeleng. Ba tseba Molimo ebile baa tseba hore ha ba mo mamela ba tla ba bohlale. Kahoo, ba na le letsoalo le hloekileng ebile ba qoba mathata a mangata. (Liproverbia 3:5, 6) Ka mohlala, ha ba halefe kapa ho monela batho ba sa tšepahaleng le ba meharo ha ba atleha bophelong. (Pesaleme ea 37:1, 7-9) Batho ba Molimo ba thabisoa ke ho tseba hore haufinyane o tla felisa ho hloka toka ’me a putse batho ba tšepahalang ka lebaka la boitšoaro ba bona bo botle. (Pesaleme ea 37:34) Ba boetse ba thabisoa ke ho tseba hore ba thabisa Ntate oa bona ea leholimong.—Pesaleme ea 5:12; Liproverbia 27:11.

“O tla u fa lintho tseo pelo ea hao e li batlang.” Mantsoe ana a ka boela a fetoleloa e le “o tla araba lithapelo tsa lona” kapa e le “o tla le fa lintho tseo le li labalabelang.” Ke ’nete hore Jehova a ke ke a re fa ntho e ’ngoe le e ’ngoe eo re e kopang. Joaloka motsoali ea lerato, Jehova oa tseba hore na ke lintho life tseo bana ba Hae ba li hlokang. Kahoo, lithapelo tsa rona le tsela eo re phelang ka eona li lokela ho lumellana le melao-motheo le thato ea hae. (Liproverbia 28:9; Jakobo 4:3; 1 Johanne 5:14) Ha re etsa joalo re tla atamela “Ea Utloang thapelo” re kholisehile hore o tla re utloa.—Pesaleme ea 65:2; Matheu 21:22.

Litemana tse potolohileng Pesaleme ea 37:4

Pesaleme ea 37 e qapuoe ke Morena Davida. O ngotse pesaleme ena a sebelisa tatellano ea litlhaku tsa alfabete ea Seheberu.b

Batho ba bangata ba ne ba sa tšoare Davida hantle. Morena Saule le batho ba bang ba ne ba batla ho mo bolaea. (2 Samuel 22:1) Ho ntse ho le joalo, Davida o ne a tšepile Molimo ka pelo eohle. Davida o ne a tseba hore Jehova o tla felisa ba khopo. (Pesaleme ea 37:10, 11) Le hoja ho ne ho bonahala eka ba atleha joaloka “joang bo bocha bo botala” ba ne ba tla felisoa.—Pesaleme ea 37:2, 20, 35, 36.

Pesaleme ea 37 e bontša se tla etsahalla batho ba mamelang melao-motheo ea Molimo le ba sa e mameleng. (Pesaleme ea 37:16, 17, 21, 22, 27, 28) Ho feta moo, pesaleme ena e re thusa bona hore na ke joang re ka bang bohlale le ho ba batho bao Molimo a ba amohelang.

Shebella video ea selelekela sa buka ea Pesaleme.