Na Lipaki Tsa Jehova li Hanela Lifilimi, Libuka Kapa Lipina Tse Itseng?

Che. Mokhatlo oa rōna ha o hlahlobe lifilimi, libuka, kapa lipina tse itseng ebe o beha molao oa hore na litho tsa oona li qobe life. Hobane’ng?

Bibele e khothalletsa motho ka mong hore a koetlise ‘matla a hae a ho lemoha’ e le hore a tsebe ho khetholla se nepahetseng ho se fosahetseng.—Baheberu 5:14.

Mangolo a na le melao-motheo ea bohlokoa eo Mokreste a ka e hlahlobang ha a khetha boithabiso.a Joaloka likarolong tsohle tsa bophelo, sepheo sa rōna ke ho ‘nepisisa hore na ke sefe se amohelehang ho Morena.’—Baefese 5:10.

Bibele e ruta hore bao e leng lihlooho tsa malapa ba na le boikarabelo bo itseng ba ho laola lintho, kahoo ba ka ’na ba khetha hore ba hanele litho tsa malapa a bona ka boithabiso bo itseng. (1 Bakorinthe 11:3; Baefese 6:1-4) Leha ho le joalo, ka ntle ho lelapa, ha ho na motho ea nang le matla a ho hanela litho tsa phutheho ho shebella lifilimi, ho mamela lipina kapa ho mamela libini tse itseng.—Bagalata 6:5.

a Ka mohlala, Bibele e nyatsa ntho leha e le efe e khothalletsang tšebelisano le meea, boitšoaro bo litšila ba thobalano, kapa liketso tse mabifi.—Deuteronoma 18:10-13; Baefese 5:3; Bakolose 3:8.