Sehlopha se Busang sa Lipaki Tsa Jehova ke Eng?

Sehlopha se Busang ke Bakreste ba seng bakae ba holileng tsebong ba tataisang Lipaki Tsa Jehova lefatšeng lohle. Mosebetsi oa bona o likarolo li peli:

• Sehlopha sena se re lokisetsa lithuto tse thehiloeng Bibeleng se sebelisa lingoloa, liboka le likolo tsa Lipaki Tsa Jehova.—Luka 12:42.

• Se hlokomela mosebetsi oa lefatše lohle o etsoang ke Lipaki Tsa Jehova ka ho tsamaisa mosebetsi oa boboleli le ho hlokomela tsela eo menehelo e sebelisoang ka eona.

Sehlopha se Busang se latela mohlala oa ‘baapostola le baholo ba Jerusalema’ ba lekholong la pele la lilemo, ba ileng ba etsa liqeto tse nepahetseng bakeng sa phutheho eohle ea Bakreste. (Liketso 15:2) Joaloka banna bao ba tšepahalang, litho tsa Sehlopha se Busang ha se baeta-pele ba mokhatlo oa rona. Ba tataisoa ke Bibele ’me ba lumela hore Jehova Molimo o khethile Jesu Kreste hore e be eena Hlooho ea phutheho.—1 Bakorinthe 11:3; Baefese 5:23.

Litho tsa Sehlopha se Busang ke bo-mang?

Litho tsa Sehlopha se Busang ke Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane le Jeffrey Winder. Ba sebeletsa ntlo-kholo ea rona e Warwick, New York, U.S.A.

Sehlopha se Busang se hlophisitsoe joang?

Sehlopha se Busang se thehile likomiti tse tšeletseng hore li tsamaise likarolo tse fapaneng tsa mosebetsi oa rona ’me setho ka seng se sebetsa komiting e le ’ngoe kapa tse ’maloa.

• Komiti ea Bohokahanyi: Komiti ena e sebetsana le linyeoe, likoluoa, maemo ao balumeli-’moho le rona ba qosoang ka lebaka la seo ba se lumelang le litaba tse ling tse potlakileng tse amang Lipaki Tsa Jehova lefatšeng lohle.

• Komiti ea Basebetsi: E hlokomela litho tsa lelapa la Bethele.

• Komiti ea Khatiso: E hatisa le ho romela lingoloa tsa Bibele lefatšeng lohle, e haha Liholo Tsa ’Muso le tsa likopano, liofisi tsa phetolelo le mehaho ea makala.

• Komiti ea Tšebeletso: E hlokomela mosebetsi oa ho bolela “litaba tse monate tsa ’Muso.”—Matheu 24:14.

• Komiti ea Thuto: E hlophisa likolo, liboka, lintho tse mameloang le livideo tse matlafatsang tumelo ea rona.

• Komiti ea Bongoli: E hlophisa boitsebiso bo likhatisong tsa rona, websaeteng hammoho le ho hlokomela mosebetsi oa phetolelo.

Ho ekelletsa moo, Sehlopha se Busang se kopana beke le beke e le ho hlahloba seo mokhatlo o se hlokang. Libokeng tseo, se buisana ka Bibele ebe se lumella moea oa Molimo hore o se tataise e le hore se be ntsoe-leng ha se etsa liqeto.—Liketso 15:25.

Bathusi ba Sehlopha se Busang ke bo-mang?

Ke Bakreste ba tšepahalang ba thusang likomiti tsa Sehlopha se Busang. (1 Bakorinthe 4:2) Ba na le tsebo le boiphihlelo ba mosebetsi o etsoang komiting eo ba abetsoeng ho eona ’me ba ba teng libokeng tsa beke le beke tsa likomiti tseo. Le hoja ba sa nke karolo ha ho etsoa liqeto, bathusi bana ba fana ka keletso ea bohlokoa le boitsebiso bo eketsehileng. Ba boetse ba sebelisa liqeto tse entsoeng komiting le ho sheba tsoelo-pele e entsoeng khafetsa. Sehlopha se Busang se boetse se abela bathusi bana ho fana ka lipuo liketsahalong tse kang liboka tsa selemo le selemo kapa tsa kabo ea mangolo a Gileade.