‘Khotso Har’a Batho Bao Molimo a Khahloang ke Bona’

Ke hobane’ng ha batho ba bang ba keteka Keresemese?

Selemo le selemo, mopapa le baeta-pele ba bang ba bolumeli ba phatlalatsa melaetsa ea khotso ka tšepo ea hore matsatsing a Keresemese, mantsoe ana a ileng a phatlalatsoa ke lengeloi a tla phethahala: “Khotso e be har’a batho bao a khahloang ke bona lefatšeng.” Ba bang ba nka maeto a khethehileng a bolumeli e le hore ba keteke.

Ke hobane’ng ha seo e le bothata?

Khotso e bang teng nakong ea Keresemese ha e tšoarelle. Ka mohlala, ka December 1914, ha Europe e ne e loana Ntoeng ea Pele ea Lefatše, masole a Brithani le a Jeremane a ile a tsoa liforong tseo a neng a ipatile ho tsona ’me a keteka Keresemese hammoho. A ne a e-ja, a e-noa a bile a tsuba hammoho. A ile a ba a bapala bolo. Empa khotso eo ha ea ka ea tšoarella. Lesole la Brithani le ile la ngola lengolo la bolela hore lesole la Jeremane le ile la le bolella sena: “Kajeno re na le khotso. Hosane u loanela naha ea heno le ’na ke loanela ea heso.”

Ke melao-motheo efe ea Bibele e ka re thusang?

“Re tsoaletsoe ngoana . . . O tla rehoa . . . Khosana ea Khotso. Ho ke ke ha e-ba le bofelo bongateng ba puso ea bohosana le khotso.” (Esaia 9:6, 7) Na boprofeta boo bo mabapi le Jesu Kreste ha bo re khothatse? Jesu o ne a sa tsoalloa ho tlisa khotso lefatšeng hanngoe feela ka selemo. E le ’Musi oa leholimo, o tla tlisa khotso ea sebele e ke keng ea fela.

“Le ka ba le khotso ka ’na [Jesu]. Lefatšeng le ba le matšoenyeho, empa le be sebete! Ke hlōtse lefatše.” (Johanne 16:33) Le kajeno, Jesu o ntse a thusa balateli ba hae hore ba phele ka khotso. Ke ’nete hore Bakreste ba na le matšoenyeho. Leha ho le joalo, Bibele e ba thusa ho utloisisa hore na ke hobane’ng ha lintho tse bohloko li etsahala le hore na Jesu o tla tlisa khotso e tšoarellang joang. Seo se etsa hore ba be le khotso.

Kaha Lipaki Tsa Jehova li latela mantsoe a Jesu, li na le khotso—ho sa tsotellehe hore na ke tsa sechaba sefe, ’mala ofe, morabe ofe kapa hore na li bua puo efe. U ka iponela seo ka bouena ha u e-ea libokeng Holong ea tsona ea ’Muso. Mohlomong le uena joaloka ba bangata, u tla lumela hore khotso eo e feta khotso leha e le efe e ka bang teng matsatsing a Keresemese.