Leleme la Hummingbird

Na le Entsoe?

● Bafuputsi ba hlahlobisisa mokelikeli o seng mokae oa mali, DNA le metsoako e meng khalaseng e ka lekanang le seatla sa hao. Ha ba etsa seo, ba sebelisa mechine e hulang mokelikeli o monyenyane, empa mokhoa ona o atisa ho se sebetse hantle. Na ho na le mokhoa o atlehang haholo oa ho tsamaisa mokelikeli o monyenyane joalo? Ho ea ka Dr. John Bush oa Setsi sa Theknoloji sa Massachusetts, “lintho tsa tlhaho li se li ntse li rarolotse bothata boo.”

Ak’u nahane: Hummingbird ha e iqete matla ka hore e hule lero la lipalesa ka molomo. Ho e-na le hoo, e sebelisa matla a momahaneng a etsang hore metsi a sebakeng se bataletseng a hlōle matla a khoheli ’me a etse marotholi. Ha leleme la hummingbird le thetsa lero la palesa, matla a lerong leo a harela leleme la eona hore le be joaloka straw ebe le hula lero. Ha e le hantle, hummingbird e qoba ho iqeta matla ka hore e lumelle lero leo hore le nyolohele molomong ka “straw.” Nakong eo li-hummingbird li jang, li ka hula lero ka makhetlo a ka bang 20 ka motsotsoana, li sebelisa leleme!

Linonyana tse ling tse phelang mabōpong le tsona ho hlokometsoe hore li noa metsi ka tsela e tšoanang. Ha a bua ka bokhoni bona, Moprofesa Mark Denny oa Univesithi ea Stanford, California, U.S.A., o re: “Tsebo ea boenjiniere, ea fisiks le ea lipalo e sebetsang moo ea hlolla . . . Haeba u ne u ka kōpa moenjiniere leha e le ofe kapa setsebi sa lipalo hore ba qape tsela eo nonyana e ka noang metsi ka eona ka molomo, ba ne ba ke ke ba nahana ka sena.”

U nahana’ng ka see? Na leleme le lenyenyane la hummingbird—le khonang ho hula lero la lipalesa ka potlako le ka tsela e atlehileng joalo—le bile teng ka tšohanyetso? Kapa na le entsoe?

[Tlhaloso ea Moo Setšoantšo se Nkiloeng Teng e leqepheng la 23]

© Richard Mittleman/​Gon2Foto/​Alamy