Lipotso Tse Tsoang ho Babali

Na Bibele e bitsa Satane, Lucifera?

Lebitso la Lucifera le hlaha hanngoe Mangolong le hona e le liphetolelong tse itseng tsa Bibele. Ka mohlala, King James Version e fetolela Esaia 14:12 tjena: “U oele hakaakang leholimong, Uena Lucifera, mora oa mafube!”

Lentsoe la Seheberu le fetoletsoeng e le “Lucifera” le bolela “ea khanyang.” Septuagint e sebelisa lentsoe la Segerike le bolelang “ea tlisang mafube.” Kahoo, liphetolelo tse ling li fetolela lentsoe la mathomo la Seheberu e le “naleli ea hoseng” kapa “Naleli ea motšehare.” Empa Vulgate ea Selatine ea Jerome e sebelisa “Lucifera” (mojari oa leseli), ’me sena se hlalosa lebaka leo ka lona lebitso lena le hlahang liphetolelong tse sa tšoaneng tsa Bibele.

Lucifera enoa ke mang? Lentsoe “ea khanyang,” kapa “Lucifera,” le hlaha ho seo Esaia ka boprofeta a ileng a laela Baiseraele hore ba se bolele e le ‘polelo ea maele khahlanong le morena oa Babylona.’ Kahoo, ke karolo ea polelo e lebisitsoeng haholo-holo ho marena a Babylona. Polelo e reng: “U tla theoleloa Sheole,” e boetse e bontša hore “ea khanyang” ke motho, eseng sebōpuoa sa moea. Sheole ke lebitla le tloaelehileng la batho—hase sebaka seo Satane Diabolose a lulang ho sona. Ho feta moo, ba bonang ha Lucifera a tlisoa boemong bona baa botsa: “Na enoa ke eena monna ea neng a ferekanya lefatše?” Ho hlakile hore “Lucifera” ke motho, eseng sebōpuoa sa moea.—Esaia 14:4, 15, 16.

Ke hobane’ng ha marena a Babylona a hlalosoa ka tsela e phahameng hakaale? Re lokela ho hlokomela hore morena oa Babylona o ne a tla bitsoa ea khanyang feela ka mor’a ho oa ha hae, ebile o bitsoa tjena ka tsela e phoqang. (Esaia 14:3) Boikhohomoso ba boithati bo ile ba susumelletsa marena a Babylona hore a iphahamisetse ba a potolohileng. Marena ana a ne a ikhohomosa hoo ho thoeng a ne a ithorisa a re: “Ke tla nyolohela maholimong. Ke tla phahamisetsa terone ea ka holim’a linaleli tsa Molimo, ’me ke tla lula thabeng ea pokano, likarolong tse hōle ka ho fetisisa tsa leboea. . . . ke tla iketsa hore ke tšoane le Ea Phahameng ka ho Fetisisa.”—Esaia 14:13, 14.

“Linaleli tsa Molimo” ke marena a lesika la borena la Davida. (Numere 24:17) Ho tloha ho Davida ho ea pele, “linaleli” tsena li ne li busa li le Thabeng ea Sione. Ha Solomone a qeta ho haha tempele Jerusalema, lebitso la Sione le ile la sebelisoa ho bolela motse oohle. Tlas’a selekane sa Molao, bohle ba batona ba Iseraele ba ne ba laetsoe hore ba ee Sione hararo ka selemo. Kahoo, e ile ea fetoha ‘thaba ea pokano.’ Ka ho ikemisetsa ho hatella marena a Juda le ho a tlosa thabeng eo, Nebukadnezare o bontša hore o ikemiselitse ho iphahamisetsa “linaleli” tsena. Ho e-na le ho leboha Jehova ha ho hlōtsoe marena ana, ka boikhohomoso o ipeha sebakeng sa Jehova. Kahoo, ka mor’a ho oa ha ’ona, ka ho a phoqa, marena a Babylona a bitsoa “ea khanyang.”

Ka sebele boikhohomoso ba babusi ba Babylona bo bontša boikutlo ba “molimo oa tsamaiso ena ea lintho”—Satane Diabolose. (2 Bakorinthe 4:4) Le eena o nyoretsoe matla ’me o labalabela ho ipeha ka holim’a Jehova Molimo. Empa Mangolo ha a bitse Satane, Lucifera.

• Ke hobane’ng ha 1 Likronike 2:13-15 e re Davida ke mora oa bosupa oa Jese, empa 1 Samuele 16:10, 11 e bontša hore ke oa borobeli?

Ha Morena Saule oa Iseraele ea boholo-holo a furalla borapeli ba ’nete, Jehova Molimo o ile a romela moprofeta Samuele ho ea tlotsa e mong oa bara ba Jese hore e be morena. Tlaleho ea Bibele ka ketsahalo ena ea histori, e ngotsoeng ke Samuele ka boeena lekholong la bo11 la lilemo B.C.E., e bontša hore Davida e ne e le mora oa borobeli oa Jese. (1 Samuele 16:10-13) Leha ho le joalo, tlaleho e ngotsoeng ke moprista Esdrase lilemo tse ka bang 600 hamorao e re: “Jese, le eena, a tsoala letsibolo la hae Eliabe, le Abinadabe e le oa bobeli, le Shimea e le oa boraro, Nethaniele e le oa bone, Radai e le oa bohlano, Ozeme e le oa botšelela, Davida e le oa bosupa.” (1 Likronike 2:13-15) Ho etsahetse’ng ka mora e mong oabo Davida, hona ke hobane’ng ha Esdrase a siile lebitso la hae?

Mangolo a bolela hore Jese o ne a e-na le “bara ba robeli.” (1 Samuele 17:12) Ka ho hlakileng e mong oa bara ba hae ha aa ka a phela nako e telele hoo a sa kang a nyala ’me a ba le bana. Kaha o ne a se na litloholo, o ne a ke ke a fuoa lefa la moloko oa habo kapa a hlahella litlalehong tsa tatellano ea leloko la Jese.

Joale a re nahaneng ka mehla ea Esdrase. Nahana ka boemo boo a bokeletseng Likronike tlas’a bona. Ho ne ho fetile lilemo tse ka bang 77 Bajuda ba khutlile kholehong Babylona, ’me ba ne ba boetse ba lula naheng ea habo bona. Morena oa Persia o ne a laetse Esdrase hore a khethe baahloli le mesuoe ea Molao oa Molimo le ho khabisa ntlo ea Jehova. Ho ne ho hlokahala mathathamo a nepahetseng a tatellano ea leloko ho tiisa hore meloko e fuoa mafa a eona le ho tiisa hore ke batho ba tšoanelehang feela ba sebeletsang e le baprista. Kahoo, Esdrase o ile a lokisetsa tlaleho e feletseng ea histori ea sechaba, ho kopanyelletsa le tlaleho e hlakileng le e ka tšeptjoang ea leloko la Juda le la Davida. Lebitso la mora oa Jese ea shoeleng a se na bana le ne le sa hlokahale. Kahoo, Esdrase o ile a siea lebitso la hae.