Ho Bososela—Ho U Tsoela Molemo!
Ka mongolli oa Tsoha! Japane
HA E le e tsoang pelong, e felisa maikutlo a pelaelo. E tlosa leeme le lengata le bokellaneng ka lilemo. E nolofatsa lipelo tse thatafalitsoeng ke ho se kholoe le ho se tšepe. E khatholla ba bangata le ho ba thabisa. E re, “U se ke ua khathatseha. Kea utloisisa.” E fana ka boikutlo ba hore, “Ekare re ka ba metsoalle.” Ebe sesebelisoa see se matla hakaale ke eng? Ke pososelo. E ka ba pososelo EA HAO.
Pososelo ke eng? Ka kakaretso, libuka tse hlalosang mantsoe li hlalosa pososelo e le ‘ponahalo ea sefahleho eo ho eona molomo o kobehelang holimo hanyenyane, ho bontša ho qaboha, ho amohela le ho thaba.’ Lekunutu la pososelo e mofuthu le hona mona. Pososelo ke mokhoa oa ho hlalosa maikutlo a motho kapa ho bolella ba bang kamoo motho a ikutloang kateng ntle le hore a bue. Ke ’nete hore pososelo e ka boela ea bontša ho nyelisa kapa ho nyatsa, empa eo ke taba e ’ngoe.
Na ho bososela ho hlile ho etsa phapang? Na u hopola nakong eo motho e mong a neng a bososela le uena u ileng ua ikutloa u imoloha kapa hona ho khatholoha kateng? Kapa nakong eo u ileng ua tšoha kapa hona ho ikutloa u sa batlehe ha motho a ne a sa bososele? E, pososelo e etsa phapang. E ama motho ea bososelang hammoho le eo ho bososeloang le eena. Motho oa Bibeleng, Jobo, o ile a re ka lira tsa hae: “Ke ne ke ba bososella—ba ne ba sa lumele—leseli la sefahleho sa ka ba ne ba sa le fetole masoabi.” (Jobo 29:24, NW) “Leseli” la sefahleho sa Jobo e ka ’na eaba le ne le bolela ho khanya ha sona le ho nyakalla.
Phello e ntle ea pososelo e sa le teng le kajeno. Pososelo e mofuthu e ka thusa ho imolla khatello e bokellaneng ea maikutlo. E ka tšoana le sekoahelo se sireletsang sa pitsa e phehang ka ’muoane oa metsi a belang. Ha re ikutloa re tsitsipane kapa re ferekane maikutlong, pososelo e ka re thusa ho fokotsa khatello eo le ho sebetsana ka katleho le ho ferekana ha rōna maikutlong. Ka mohlala, hangata Tomoko o ne a bona batho ba mo shebile. O ne a nahana hore ba na le hoo ba ho nyatsang ho eena kaha ba ne ba balehisa mahlo ka potlako ha ba lemoha hore oa ba bona. Tomoko o ne a ikutloa a lahlehile a bile a sa thaba. Ka letsatsi le leng motsoalle o ile a etsa tlhahiso ea hore a bososele ha a khaoletsa motho a mo shebile. Tomoko o ile a leka mokhoa oo ka libeke tse peli ’me a makala ha a bona bohle ba bososela ha ba mo bona a bososela! Khatello ea maikutlo e ile ea fela. O re: “Ka sebele ke thabela bophelo.” E, pososelo e etsa hore re lokolohe ha re e-na le ba bang ’me e re thusa ho ba le metsoalle e eketsehileng.
Liphello Tse Molemo ho Uena le ho ba Bang
Ho bososela ho ka ama motho maikutlong. Ho thusa ho etsa hore a be le boikutlo bo nepahetseng. Ho molemo le bakeng sa bophelo bo botle ba ’mele. Ho na le polelo e reng, “Ho tšeha ke setlhare se sebetsang.” Ha e le hantle, ba boholong litabeng tsa bongaka baa hlokomela hore maikutlo a motho a amana haholo le boemo ba hae ba ’mele. Liphuputso tse ngata li bontša hore khatello ea maikutlo e bileng teng nako e telele, maikutlo a fosahetseng le lintho tse tšoanang le tseo li fokolisa tsamaiso ea ’mele ea rōna ea ho itšireletsa mafung. Ka lehlakoreng le leng, ho bososela hoa re thabisa, ’me ho tšeha ho bile ho matlafatsa tsamaiso ea ’mele ea rōna ea ho itšireletsa mafung.
Pososelo e ama ba bang ka tsela e matla. Nahana boemo ba ha u fuoa keletso kapa u khalemeloa. U ka rata ho bona sefahleho sa motho ea u eletsang se le joang? Sefahleho se hoaqileng kapa se thata se ka fetisa boikutlo ba ho halefa, ho teneha, ho khesa kapa hona ho ba le lehloeo. Ka lehlakoreng le leng, na pososelo e mofuthu sefahlehong sa motho ea u eletsang mohlomong e ne e ke ke ea etsa hore u ikutloe u phutholohile ’me ea etsa hore u amohele keletso haholoanyane? Ka sebele, pososelo e thusa ho fokotsa ho se utloisisane maemong a tsitsipano.
Mehopolo e Nepahetseng e Etsa Hore ho be Bonolo ho Bososela
Ke ’nete hore boholo ba rōna ha re tšoane le batšoantšisi ba litsebi ba ka khonang ho bososela ka nako leha e le efe, leha e le hona hore re lakatsa ho ba joalo. Re rata hore pososelo ea rōna e be ea tlhaho le e tsoang pelong. Mosuoe oa likamano tse ntle sekolong o ile a re: ‘Ke habohlokoa ho lokoloha le ho bososela ho tsoa botebong ba pelo, ho seng joalo, pososelo ea hao e ka bonahala e se ea tlhaho.’ Re ka bososela joang ho tsoa botebong ba lipelo tsa rōna? Bibele e ka re thusa mona. Mabapi le seo re se buang, ea re bolella ho Matheu 12:34, 35: “Molomo o bua ho tsoa ho se tletseng pelong. Ho tsoa letlotlong la hae le molemo motho ea molemo o ntša lintho tse molemo, athe motho ea khopo ho tsoa letlotlong la hae le khopo o ntša lintho tse khopo.”
Hopola hore pososelo ke tsela eo re fetisang maikutlo a rōna ka eona ntle le ho bua. Re hopola hore re bua “ho tsoa ho se tletseng pelong,” le hore “lintho tse molemo” li tsoa ‘letlotlong le molemo,’ hoa hlaka hore senotlolo sa pososelo e tsoang pelong se itšetlehile monahanong le maikutlong a rōna. E, ha ho pelaelo hore se ka lipelong tsa rōna se tla bonahala nako leha e le efe, eseng feela ka mantsoe le liketso tsa rōna empa le ka ponahalo ea sefahleho sa rōna. Ka hona, re tlameha ho sebeletsa ho lula re e-na le mehopolo e nepahetseng. Ponahalo ea sefahleho sa rōna e angoa haholo ke mehopolo eo re nang le eona ka ba bang. Ka hona, a re lebiseng tlhokomelo litšobotsing tse ntle tsa litho tsa lelapa, bathong bao re ahisaneng le bona le metsoalleng ea rōna e haufi. Re tla fumana ho le bobebe ho bososela le bona. E tla ba pososelo ea sebele kaha e tla be e tsoa pelong e tletseng se molemo, e mohau le e mosa. Mahlo a rōna a tla khanya khotso ’me ba bang ba tla tseba hore ha re ikaketse.
Leha ho le joalo, ho lokela ho hlokomeloe hore batho ba bang ba thatafalloa ke ho bososela ho feta ba bang ka lebaka la tsela eo ba hōlileng ka eona kapa sebaka seo ba leng ho sona. Esita le haeba ba e-na le botsoalle ho baahisani ba bona, ba mpa ba sa tloaela ho bososela le bona. Ka mohlala, ka tloaelo banna ba Majapane ba lebeletsoe ho lula ba ipotlile ka ho feletseng le ho lula ba khutsitse. Ka hona, ba bangata ba bona ha baa tloaela ho bososela le batho bao ba sa ba tsebeng. E ka ’na eaba ho joalo le ka litso tse ling. Kapa e ka ’na eaba batho ba bang ba lihlong ka tlhaho, ’me ba ka ’na ba thatafalloa ke ho bososela le ba bang. Kahoo, ha rea lokela ho ahlola ba bang ho ea ka hore na pososelo ea bona e khōlō hakae kapa ba bososela hangata hakae. Batho ba fapane, ’me ho joalo le ka litšobotsi tsa bona le litsela tseo ba buisanang le ba bang ka tsona.
Leha ho le joalo, haeba e le phephetso ho uena ho bososela le ba bang, ke hobane’ng ha u sa sebeletse ntlheng eo? Bibele ea eletsa: “A re se keng ra tela ho etsa se setle . . . A re sebetseng se molemo ho bohle.” (Bagalata 6:9, 10) Tsela e ’ngoe ea ho sebetsa “se molemo” ho ba bang ke ka ho bososela le bona—’me sena u ka se khona! Ka hona, ithaopele hore ebe uena ea qalang ho lumelisa ba bang le ho ba khothatsa ka pososelo. Seo se tla ananeloa haholo. Hape, u tla fumana hore ho bososela ho ba bonolo ha u hlaolela mokhoa oo.
[Lebokose le leqepheng la 30]
Tlhokomeliso
Ho utloisa bohloko hore ebe hase pososelo e ’ngoe le e ’ngoe eo re e bonang e tlohang botebong ba pelo. Baqhekelli ba bolotsana, barekisi ba sa tšepahaleng le ba bang ba ka ’na ba bososela pososelo e hohelang haholo. Baa tseba hore pososelo e ka nolofatsa batho ’me ea ba isa le khongoana holimo. Batho ba nang le boitšoaro bo belaetsang kapa ba nang le merero e litšila le bona ba ka ’na ba bososela ka pososelo e hohelang. Leha ho le joalo, pososelo ea bona ke ea lefeela, baa thetsa. (Moeklesia 7:6) Ka hona, le hoja re sa lokela ho belaella ba bang ka ho feteletseng, ho hlokahala re utloisise hore kaha re phela “matsatsing a ho qetela” ao ho leng thata ho sebetsana le ’ona, ho hlokahala re ‘ipake re le seli joaloka linoha ’me leha ho le joalo re le ba hlokang molato joaloka maeba,’ joalokaha Jesu a ile a khothalletsa.—2 Timothea 3:1; Matheu 10:16.
[Setšoantšo se leqepheng la 31]
Ithaopele hore ebe uena ea qalang ho lumelisa ba bang ka pososelo