Ela Hloko Mesebetsi e Hlollang ea Molimo
“U entse lintho tse ngata, Jehova Molimo oa ka, esita le mesebetsi ea hao e hlollang le menahano ea hao ho rōna; ha ho le ea mong ea ka bapisoang le uena.”—Pesaleme Ea 40:5.
1, 2. Re na le bopaki bofe ba mesebetsi e hlollang ea Molimo, ’me see se lokela ho re susumelletsa ho etsa eng?
HA U bala Bibele, u ka bona habonolo feela hore Molimo o ile a etsetsa batho ba hae ba boholo-holo, e leng Baiseraele, lintho tse hlollang. (Joshua 3:5; Pesaleme ea 106:7, 21, 22) Le haeba hona joale Jehova ha a kenelle litabeng tsa batho ka tsela eo, ho re potoloha re fumana bopaki bo bongata ba mesebetsi ea hae e hlollang. Ka hona, re na le lebaka la ho etsisa mopesaleme ha a re: “Jehova, mesebetsi ea hao e mengata hakaakang! Kaofela ha eona u e entse ka bohlale. Lefatše le tletse lihlahisoa tsa hao.”—Pesaleme ea 104:24; 148:1-5.
2 Kajeno ba bangata ba hana bopaki bo joalo bo hlakileng ba mesebetsi ea ’Mōpi. (Baroma 1:20) Leha ho le joalo, ke hantle ha re nahana ka eona le ho etsa liqeto tse amanang le boemo ba rōna le boikarabelo ba rōna ka pel’a ’Mōpi oa rōna. Jobo khaolo ea 38 ho ea ho 41 ke thuso e ntle haholo ho sena, hobane ho eona Jehova o ile a lebisa tlhokomelo ea Jobo likarolong tse itseng tsa mesebetsi ea Hae e hlollang. Hlahloba lintlha tse ling tse utloahalang tseo Molimo a ileng a li phahamisa.
Mesebetsi e Matla le e Hlollang
3. Joalokaha ho tlalehiloe ho Jobo 38:22, 23, 25-29, Molimo o ile a botsa ka lintho life?
3 Ka lekhetlo le leng Molimo o ile a botsa Jobo a re: “Na u kene ka matlung a polokelo a lehloa, kapa na u bona matlo a polokelo a sefako, ao ke a boloketseng nako ea mahlomola, bakeng sa letsatsi la ho loana le ntoa?” Lehloa le sefako li tloaelehile libakeng tse ngata tsa lefatše la rōna. Molimo o ile a tsoela pele a re: “Ke mang ea arotseng kotopo bakeng sa moroallo le tsela bakeng sa maru a sefefo a sealuma, ho nesa pula naheng eo ho eona ho se nang motho, lefeelleng leo ho lona ho se nang motho oa lefatše, ho khotsofatsa libaka tse otliloeng ke sefefo le tse lesupi le ho melisa lehlōmela la joang? Na pula e na le ntate, kapa ke mang ea tsoetseng marotholi a phoka? Ha e le hantle leqhoa le tsoa ka mpeng ea mang, ha e le serame sa leholimo, ke mang ea se tsoalang?”—Jobo 38:22, 23, 25-29.
4-6. Ke ka kutloisiso efe tsebo ea motho ea lehloa e sa fellang?
4 Batho ba phelang libakeng tse phetheselang ’me ba tlameha ho nka maeto, ba ka ’na ba nka lehloa e le tšitiso. Empa ba bang ba bangata ba nka lehloa e le mohloli oa thabo, o hlahisang meeka ea mariha le o bulang menyetla ea ho etsa mesebetsi e itseng e khethehileng. Ha re ntse re nahana ka potso ea Molimo, na u tseba ka ho qaqileng ka lehloa, esita le hore na le shebahala joang? Rea tseba hore na ha le le lengata le shebahala joang, mohlomong hobane re kile ra le bona kapa hobane re kile ra bona litšoantšo tsa litutulu tsa lona. Empa ho thoe’ng ka pepa ka ’ngoe ea lehloa? Na ua tseba hore na e shebahala joang, mohlomong haeba u kile ua li hlahloba mohloling oa tsona?
5 Batho ba bang ba nkile lilemo tse mashome ba ithuta lipepa tsa lehloa le ho li nka litšoantšo. Pepa e le ’ngoe ea lehloa e ka ’na eaba e entsoe ka lithollo tse lekholo tsa leqhoa le sa tieang tse nang le libōpeho tse ngata tse sa tšoaneng tse ntle. Buka e bitsoang Atmosphere e re: “Mefuta-futa ea lipepa tsa lehloa ea hlolla, ’me le hoja bo-rasaense ba tsitlellela hore ha ho na molao oa tlhaho o hanelang hore ho be le tse tšoanang, ha ho e-s’o fumanoe lipepa tse peli tse tšoanang hantle. Phuputso e ’ngoe ea boholo bo sa tloaelehang e ile ea etsoa ke . . . Wilson A. Bentley, ea ileng a qeta lilemo tse fetang 40 a ntse a hlahloba le ho nka litšoantšo tsa lipepa tsa lehloa a sebelisa microscope ho se mohla a fumanang tse peli tse tšoanang hantle.” Le hoja, boemong bo sa tloaelehang, ho ne ho ka bonahala eka tse peli lia tšoana, na seo se ne se tla hle se fetole ho hlolla ha mefuta e mengata-ngata ea lipepa tsa lehloa?
6 Hopola potso ea Molimo: “Na u kene ka matlung a polokelo a lehloa?” Ba bangata ba nahana hore maru ke ’ona matlo a polokelo a lehloa. Na u ka nahana u se u e-ea matlong a joalo a polokelo ho ea bala lipepa tsa lehloa ka mefuta-futa ea tsona e ke keng ea lekanngoa le ho ea ithuta hore na li bile teng joang? Encyclopedia e ’ngoe ea saense e re: “Sebōpeho le qaleho ea makumane a leqhoa, a hlokahalang ho etsa hore marotholi a marung a bate ho fihlela a hoamme ka tekanyo ea likhato tse ka bang 40 tsa Fahrenheit tlas’a ntlha ea khoamo [-40°C], li ntse li e-s’o utloisisoe.”—Pesaleme ea 147:16, 17; Esaia 55:9, 10.
7. Tsebo ea motho ka pula e tebile hakae?
7 Ho thoe’ng ka pula? Molimo o ile a botsa Jobo: “Na pula e na le ntate, kapa ke mang ea tsoetseng marotholi a phoka?” Encyclopedia eona eo ea saense e re: “Ka lebaka la ho rarahana ha metsamao ea lintho tse sepakapakeng le ho feto-fetoha ha boemo ba mouoane le tekanyo ea lesoe le moeeng, ho bonahala ho ke ke ha khoneha hore ho thehoe khopolo e qaqileng le e akaretsang ea mokhoa oo maru a roalellanang ka oona le pula e nang ka oona.” Ka mokhoa o bonolo, bo-rasaense ba fane ka likhopolo tse qaqileng, empa ha ba hlile ha ba khone ho hlalosa pula ka ho feletseng. Empa, ua tseba hore pula e hlokahalang e le kannete ea na, e kolobisa lefatše, e fepa limela, e etsa hore bophelo bo be teng ’me bo be monate.
8. Ke hobane’ng ha mantsoe a Pauluse a tlalehiloeng ho Liketso 14:17 a loketse?
8 Na u ne u ke ke ua lumellana le qeto eo moapostola Pauluse a ileng a e fihlela? O ile a khothalletsa ba bang hore ba bone mesebetsi ena e hlollang e le e fanang ka bopaki ba hore ho na le Ea e entseng. Pauluse o ile a re ka Jehova Molimo: “[Ha aa] ka a itlohela ntle ho bopaki ka hore o ile a etsa se molemo, a le fa lipula tse tsoang leholimong le linako tse behang, a tlatsa lipelo tsa lōna ka ho phethahetseng ka lijo le ho hlasimoloha ho molemo.”—Liketso 14:17; Pesaleme ea 147:8.
9. Mesebetsi e hlollang ea Molimo e bontša matla a hae a maholo joang?
9 Ha ho pelaelo hore Moetsi oa mesebetsi e hlollang joalo e ruisang molemo o na le bohlale bo ke keng ba lekanngoa le matla a maholo. Tabeng ea matla a hae, nahana ka sena: Ho boleloa hore ho na le lifefo tsa lialuma tse ka bang 45 000 letsatsi ka leng, tse fetang limilione tse 16 ka selemo. Sena se bolela hore hona joale, ho na le tse ka bang 2 000 tse fokang. Maru a rarahaneng a sefefo se le seng sa sealuma a tsukutleha ka matla a lekanang le a libomo tsa nyutlelie tse leshome kapa ho feta tse ileng tsa lihuoa Ntoeng ea II ea Lefatše. U bona a mang a matla ana e le lehalima. Ntle le hore lea tšosa, ha e le hantle lehalima le thusa ho hlahisa mefuta e itseng ea nitrogen e theohelang mobung, moo limela li e monyang e le monontša oa tlhaho. Kahoo lehalima ke matla a bonahalang, empa le boetse le tlisa melemo ea sebele.—Pesaleme ea 104:14, 15.
U Fihlela Qeto Efe?
10. U ka araba lipotso tse ho Jobo 38:33-38 joang?
10 Ak’u inahane u le boemong ba Jobo, Molimo ea Matla ’Ohle a u botsa lipotso. Mohlomong u tla lumela hore batho ba bangata ba lebisa tlhokomelo e fokolang mesebetsing e hlollang ea Molimo. Jehova o re botsa lipotso tseo re li balang ho Jobo 38:33-38. “Na u tseba litaelo tse hlomamisitsoeng tsa maholimo, kapa na u ka beha matla a ’ona lefatšeng? Na u ka phahamisetsa lentsoe la hao lerung, e le hore moroallo o nyolohang oa metsi o ka u koahela? Na u ka ntša mahalima e le hore a ka tsamaea a re ho uena, ‘Ke rōna bana!’? Ke mang ea kentseng bohlale marung, kapa ke mang ea fileng lipono tse makatsang tsa leholimo kutloisiso? Ke mang ea ka balang maru hantle ka bohlale, kapa linkho tsa metsi tsa leholimo—ke mang ea ka li thulamisang, ha lerōle le tšoloha joalokaha eka le tšolohela ka nthong e entsoeng ka ho qhibilihisoa, makote a khomarelana?”
11, 12. Lintho tse ling tse bontšang hore Molimo ke Moetsi oa mesebetsi e hlollang ke life?
11 Re hlahlobile lintlha tse seng kae feela tseo Elihu a ileng a li buisana le Jobo, ’me ra hlokomela tse ling tsa lipotso tseo Jehova a ileng a re Jobo a li arabe “joaloka monna ea shahlileng.” (Jobo 38:3) Re re “tse ling” hobane ho Jobo khaolo ea 38 le 39, Molimo o ile a lebisa tlhokomelo likarolong tse ling hape tse hlokomelehang pōpong. Re etsa mohlala ka lihlopha tsa linaleli tsa maholimo. Ke mang ea tsebang melao kapa litaelo tsa tsona kaofela? (Jobo 38:31-33) Jehova o ile a hlokomelisa Jobo tse ling tsa liphoofolo—tau le lekhoaba, pōli ea thaba le qoaha, poho e hlaha le mpshe, pere e matla le ntsu. Ha e le hantle, Molimo o ile a botsa Jobo hore na ke eena ea fileng liphoofolo tsena tse fapa-fapaneng litšobotsi tse li khethollang, a li lumella ho phela le ho atleha. Mohlomong u ka ’na ua thabela ho ithuta likhaolo tsena, haholo-holo haeba u motho ea thahasellang lipere kapa liphoofolo tse ling.—Pesaleme ea 50:10, 11.
12 U ka boela ua hlahloba Jobo khaolo ea 40 le ea 41, moo Jehova a ileng a boela a kōpa Jobo hore a arabele lipotso tseo a mo botsang tsona ka libōpuoa tse peli tse ikhethang. Re utloisisa hore liphoofolo tsena ke kubu (Behemothe), e nang le ’mele oa motonanahali le e matla, hammoho le koena (Leviathane) e tšosang ea Nile. E ’ngoe le e ’ngoe ka tsela ea eona e itseng ke sebōpuoa se thahasellisang seo re lokelang ho se ela hloko. Joale, a re boneng hore na re lokela ho fihlela liqeto life.
13. Lipotso tsa Molimo li bile le phello efe ho Jobo, ’me litaba tsee li lokela ho re ama joang?
13 Jobo khaolo ea 42 e re bontša hore na lipotso tseo Molimo a ileng a li botsa Jobo li ile tsa mo ama joang. Pejana Jobo o ne a amehile haholo ka eena le ka ba bang. Empa, ka ho amohela khalemelo e hlakileng lipotsong tsa Molimo, Jobo o ile a fetola monahano oa hae. O ile a ipolela: “[Jehova] kea tseba hore u khona ho etsa lintho tsohle, ha ho khopolo eo u ke keng ua e fihlela. ‘Ke mang eo ea patang keletso ntle ho tsebo?’ Ka hona ke buile, empa ke ne ke sa utloisise lintho tse hlollang haholo bakeng sa ka, tseo ke sa li tsebeng.” (Jobo 42:2, 3) E, ka mor’a hore Jobo a ele hloko mesebetsi ea Molimo, o ile a re lintho tsena e ne e le tse hlollang haholo ho eena. Ka mor’a ho hlahloba meeka ena ea pōpo, re lokela hore re hatise ka tsela e tšoanang ka ho rōna bohlale ba Molimo le matla a hae. Ka sepheo sefe? Na re lokela ho hlolloa feela ke matla a Jehova a maholohali le bokhoni ba hae? Kapa re lokela ho susumelletseha ho feta moo?
14. Davida o ile a arabela joang mesebetsing e hlollang ea Molimo?
14 Ho Pesaleme ea 86, re fumana lipolelo tse amanang le tseo tse buuoang ke Davida, eo pesalemeng ea pejana a itseng: “Maholimo a bolela khanya ea Molimo; sepakapaka se bolela mosebetsi oa matsoho a hae. Letsatsi le leng ka mor’a le leng le etsa hore puo e khaphatsehe, bosiu bo bong ka mor’a bo bong bo bonahatsa tsebo.” (Pesaleme ea 19:1, 2) Empa Davida o ile a tsoela pele. Ho Pesaleme ea 86:10, 11 re bala sena: “U moholo ’me u etsa lintho tse makatsang; u Molimo, uena u le mong. Jehova, nthupele ka tsela ea hao. Ke tla tsamaea ’neteng ea hao. Momahanya pelo ea ka hore e tšabe lebitso la hao.” Ho hlolloa ha Davida ke ’Mōpi ka lebaka la mesebetsi eohle ea Hae e hlollang ho ne ho akarelletsa tšabo e itseng ea bomolimo. U ka utloisisa lebaka la sena. Davida o ne a sa batle ho halefisa Ea khonang ho etsa mesebetsi ena e hlollang. Le rōna ha rea lokela ho etsa joalo.
15. Ke hobane’ng ha tšabo ea Davida e nang le tlhompho ho Molimo e ne e loketse?
15 E tlameha ebe Davida o ile a hlokomela hore kaha Molimo o na le matla a maholohali ’me oa a laola, a ka a sebelisa khahlanong le mang kapa mang ea sa tšoaneleng ho fumana mohau oa hae. Ba joalo, ba letetsoe ke tlokotsi feela. Molimo o ile a botsa Jobo: “Na u kene ka matlung a polokelo a lehloa, kapa na u bona matlo a polokelo a sefako, ao ke a boloketseng nako ea mahlomola, bakeng sa letsatsi la ho loana le ntoa?” Lehloa, sefako, pula ea sefefo, sefefo le lehalima kaofela ha tsona li pokellong ea hae ea libetsa. ’Me lintho tsee ke matla a tlhaho a hlollang hakaakang!—Jobo 38:22, 23.
16, 17. Ke’ng se bontšang matla a tšabehang ao Molimo a nang le ’ona, ’me o sebelisitse matla a joalo joang nakong e fetileng?
16 Mohlomong u hopola tlokotsi e kileng ea oela sebaka sa heno e bakiloe ke e ’ngoe ea lintho tsena—ebang ke leholiotsoana, sefefo sa sefako, kapa sekhohola. Ka mohlala, ho ella mafelong a selemo sa 1999, sefefo se matla se ile sa hlasela Europe e ka boroa-bophirimela. Se ile sa makatsa esita le litsebi tsa boemo ba leholimo. Meea e matla e ne e tsamaea ka lebelo la lik’hilomithara tse 200 ka hora, e fefola marulelo a likete, e liha litšiea tsa mehala ea motlakase ebile e phethola literaka. Ak’u leke ho bona sena ka mahlo a kelello: Sefefong seo ho ile ha fothoha kapa ha robeha lifate tse ka bang limilione tse 270, tse 10 000 tsa tsona serapeng sa lifate sa Versailles feela, se ka ntle ho Paris. Matlo a limilione a sala a se na motlakase. Ha e-shoa batho ba ka bang 100. Seo sohle se etsahala ka nako e khutšoanyane feela. Ao ke matla a makaakang!
17 Motho e mong a ka ’na a re lifefo ke liketsahalo tse tlang ka tšohanyetso, tse sa reroeng le tse sa laoloeng. Leha ho le joalo, ho ne ho ka etsahala’ng haeba Ea matla ’ohle, a ne a ka etsa mesebetsi e hlollang ka ho sebelisa matla a joalo ka tsela e tobileng, e laolehileng? O ile a etsa ntho e tšoanang le eo morao koana mehleng ea Abrahama, ea ileng a hlokomela hore Moahloli oa lefatše lohle o ne a sekasekile bokhopo ba metse e ’meli, e leng Sodoma le Gomora. E ne e bolile hoo mehoo e tletlebang ka eona e ileng ea nyolohela ho Molimo, ea ileng a thusa bohle ba lokileng ho pholoha kahlolo ea metse eo. Tlaleho ea histori e re: “Joale Jehova a nesa sebabole le mollo o tsoang ho Jehova, maholimong,” holim’a metse eo. Oo e ne e le mosebetsi o hlollang oa ho boloka ba lokileng le ho timetsa ba khopo bao ho se nang tšepo ka bona.—Genese 19:24.
18. Esaia khaolo ea 25 e bua ka lintho life tse hlollang?
18 Hamorao, Molimo o ile a liha kahlolo khahlanong le motse oa boholo-holo oa Babylona, oo e ka ’nang eaba ke motse oo ho buuoang ka oona ho Esaia khaolo ea 25. Molimo o ile a bolela esale pele hore motse o itseng e tla ba lesupi a re: “U entse motse qubu ea majoe, ua etsa motse o etselitsoeng qhobosheane lithako tse helehang, ua etsa hore tora ea bolulo ea basele e se ke ea e-ba motse, o ke keng oa tsosolosoa esita le ho isa nakong e sa lekanyetsoang.” (Esaia 25:2) Batho ba etelang sebaka sa Babylona kajeno ba ka tiisa hore seo se iponahalitse e le ’nete. Na timetso ea Babylona e ne e mpa e le taba feela e ileng ea iketsahalla ka tšohanyetso? Che. Ho e-na le hoo, re ka amohela qeto ea Esaia ha a re: “Jehova, u Molimo oa ka. Kea u phahamisa, ke roka lebitso la hao, etsoe u entse lintho tse hlollang, merero ho tloha linakong tsa pele, ka botšepehi, ka ho ba ea ka tšeptjoang.”—Esaia 25:1.
Mesebetsi e Hlollang Nakong e Tlang
19, 20. Re ka lebella phethahatso efe ea Esaia 25:6-8?
19 Molimo o ile a phethahatsa boprofeta bo ka holimo nakong e fetileng, ’me o tla nka khato ka tsela e hlollang nakong e tlang. Moelelong ona, moo Esaia a buang ka “lintho tse hlollang” tsa Molimo, re fumana boprofeta bo tšepahalang boo e leng hona bo tla phethahala, feela joalokaha kahlolo ea Babylona e ile ea fela ea phethahala. Ho tšepisoa ‘ntho efe e hlollang’? Esaia 25:6 e re: “Jehova oa mabotho o tla etsetsa lichaba tsohle, thabeng ena, mokete oa lijo tse nang le oli e ngata, mokete oa veine e nang le litšifa, oa lijo tse nang le oli e ngata tse tletseng moko, oa veine e nang le litšifa, e tlhotliloeng.”
20 Ka sebele boprofeta boo bo tla phethahala lefatšeng le lecha le tšepisitsoeng la Molimo le tlang. Ka nako eo, moloko oa batho o tla imolloa mathateng a imetseng batho ba bangata haholo hona joale. Ha e le hantle, boprofeta ba Esaia 25:7, 8 bo tiisa hore Molimo o tla sebelisa matla a hae a ho bōpa ho etsa o mong oa mesebetsi e hlollang ka ho fetisisa eo a kileng a e etsa: “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle. O tla tlosa nyeliso ea batho ba hae lefatšeng lohle, etsoe Jehova o boletse hoo.” Hamorao moapostola Pauluse o ile a qotsa temaneng eo ’me a e sebelisa tabeng ea Molimo ea ho tsosa bafu. Oo e tla ba mosebetsi o hlollang hakaakang!—1 Bakorinthe 15:51-54.
21. Molimo o tla etsetsa ba shoeleng mesebetsi efe e hlollang?
21 Lebaka le leng la hore ho se hlole ho e-ba le meokho e bakoang ke masoabi ke hobane batho ba nang le maloetse ba tla folisoa. Ha Jesu a ne a le lefatšeng, o ile a folisa batho ba bangata—a tutubolla mahlo a ba foufetseng, a thibolla litsebe tsa ba sa utloeng, a phekola ba holofetseng. Johanne 5:5-9 e re o ile a folisa monna ea neng a holofetse ka lilemo tse 38. Ba neng ba shebeletse ba ile ba nka hore hoo ke ntho e tsotehang, kapa mosebetsi o hlollang. ’Me ho ne ho hlile ho le joalo! Leha ho le joalo, Jesu o ile a ba bolella hore se hlollang le ho feta e tla ba ho tsosa ha hae bafu, a re: “Le se ke la hlolloa ke sena, hobane hora ea tla eo ka eona bohle ba mabitleng a khopotso ba tla utloa lentsoe la hae ’me ba tsoe, ba entseng lintho tse molemo ba ee tsohong ea bophelo.”—Johanne 5:28, 29.
22. Ke hobane’ng ha ba futsanehileng le ba mahlomoleng ba ka lebella nako e tlang ka tšepo?
22 Seo se tlameha ho etsahala kaha Jehova ke eena ea se tšepisitseng. U ka kholiseha hore mohla a sebelisang matla a hae a maholo a tsosolosang le ho a laola ka hloko, phello e tla ba e hlollang. Pesaleme ea 72 e bua ka seo a tla se etsa ka Mora oa hae oa Morena. Ka nako eo ea lokileng o tla atleha. Ho tla rena khotso. Molimo o tla lopolla ba futsanehileng le ba mahlomoleng. Oa tšepisa: “Ho tla ba le lijo-thollo tse ngata lefatšeng; ho tla ba le nala holim’a litlhōrō tsa lithaba. Litholoana tsa hae li tla ba joaloka Lebanone [ea boholo-holo], ba tsoang motseng ba tla thunya joaloka limela tsa naha.”—Pesaleme ea 72:16.
23. Mesebetsi e hlollang ea Molimo e lokela ho re susumelletsa ho etsa eng?
23 Ho hlakile hore re na le mabaka a ho ela hloko mesebetsi eohle e hlollang ea Jehova—seo a se entseng nakong e fetileng, seo a se etsang hona joale le seo a tla se etsa nakong e tlang e haufi. “Ho bokoe Jehova Molimo, Molimo oa Iseraele, ea etsang mesebetsi e hlollang a le mong. Ho bokoe lebitso la hae le khanyang ho isa nakong e sa lekanyetsoang, khanya ea hae e tlale lefatšeng lohle. Amen le Amen.” (Pesaleme ea 72:18, 19) Kamehla seo e lokela ho ba sehlooho sa meqoqo ea rōna e thabisang le beng ka rōna le ba bang. E, a re ‘boleleng khanya ea hae har’a lichaba, le mesebetsi ea hae
U ka Araba Joang?
•Lipotso tseo Jobo a li botsitsoeng li totobatsa joang hore tsebo ea motho ea haella?
•U khahliloe ke mehlala efe ea mesebetsi e hlollang ea Molimo e totobalitsoeng ho Jobo khaolo ea 37-41?
•Re lokela ho arabela joang ka mor’a ho hlahloba mesebetsi e meng e hlollang ea Molimo?
e hlollang har’a batho bohle.’—Pesaleme ea 78:3, 4; 96:3, 4.
[Litšoantšo tse leqepheng la 10]
U fihlela qeto efe mabapi le mefuta e mengata-ngata ea lipepa tsa lehloa le matla a tšabehang a lehalima?
[Tlhaloso ea Moo Setšoantšo se Nkiloeng Teng]
snowcrystals.net
[Litšoantšo tse leqepheng la 13]
E se eka kamehla u ka qoqa ka mesebetsi e hlollang ea Molimo