Ha Rea ka ra Lahloa Kherehloa ha Tumelo ea Rōna e ne e Lekoa

Vicky e ne e le lesea la ngoanana le ratehang—le phelang hantle, le letle le le hlasimolohileng. E, ha a hlaha nakong ea selemo ka 1993, re ile ra thaba haholo. Re ne re lula torotsoaneng e ka boroa ho Sweden, ’me re ne re phela hamonate.

LEHA ho le joalo, ha Vicky a le selemo le halofo, re ile ra tšoenyeha haholo. E ne e le nakoana bophelo ba hae bo se botle, kahoo re ile ra mo isa sepetlele. Re ke ke ra lebala ha ngaka e re bolella hore morali oa rōna o jeoa ke mofuta o mong oa kankere ea bana ea mali e amang lisele tse tšoeu e hlokang tlhokomelo e potlakileng.

Ho ne ho le thata ho utloisisa le ho amohela hore ngoananyana oa rōna o hlasetsoe ke boloetse bona bo tšosang. O ne a sa tsoa qala ho bona lintho tse mo potolohileng, ’me joale o ne a ka ’na a shoa. Ha ngaka e leka ho re tšelisa e ile ea bolela hore a ka phekoloa ka katleho e itseng ka lik’hemik’hale hammoho le ho tšeloa mali ka makhetlo a ’maloa. Ke ntho ea bobeli e ileng ea re tšoenya.

Tumelo ea Rōna ea Lekoa

Ka sebele re ne re rata morali oa rōna ’me re mo batlela phekolo e molemo ka ho fetisisa. Empa tšelo ea mali eona re ne re sa e amohele ho hang. Re lumela ka ho feletseng Lentsoeng la Molimo, Bibele, le bolelang ka ho hlaka hore Bakreste ba lokela ho ‘ila mali.’ (Liketso 15:28, 29) Hape re ne re tseba hore tšelo ea mali ka boeona e kotsi. Batho ba likete ba tšoaelitsoe maloetse ’me ba shoele ka lebaka la tšelo ea mali. Ntho feela e neng e ka sebelisoa ke phekolo ea boleng bo phahameng e neng e sa hloke tšelo ea mali. Taba ena ke eona e ileng ea qholotsa ntoa ea rōna ea tumelo.

Ebe re ne re tla etsa joang? Re ile ra buisana le ba Lefapha la Boitsebiso bo Mabapi le Lipetlele ba ofisi ea lekala ea Sweden ea Lipaki tsa Jehova ho kōpa thuso.a Melaetsa ea fax e ile ea romeloa hang-hang lipetleleng tse fapa-fapaneng ho pota Europe ha re ntse re batla sepetlele le ngaka tse ka utloisisang ho phekola ka lik’hemi’khale ntle ho tšelo ea mali. Re ile ra matlafatsoa haholo ke cheseho le lerato tse ileng tsa bontšoa ke barab’abo rōna ba Bakreste ha ba leka ho re thusa. Ha rea ka ra lahloa kherehloa ntoeng ea rōna ea tumelo.

Kapele feela ho ile ha fumanoa sepetlele le ngaka Homburg/Saar, Jeremane. Re ile ra etsetsoa litokisetso tsa hore ka letsatsi le latelang re ee teng ka sefofane hore Vicky a e’o hlahlojoa. Ha re fihla, barab’abo rōna ba Bakreste ba tsoang phuthehong ea moo Homburg ea Lipaki tsa Jehova hammoho le beng ka rōna ba bang, ba ne ba le teng ho re amohela. Moemeli oa Komiti ea moo ea Bohokahanyi le Lipetlele, o ile a re amohela ka mofuthu. O ile a re felehetsa ho ea sepetlele ’me a re tšehetsa ka hohle kamoo ho ka khonehang. Re ile ra ikutloa re tšelisehile hore ebe le naheng eo e seng ea habo rōna re na le barab’abo rōna ba re tšehetsang.

Re ile ra tšeliseha hape ha re kopana le Dr. Graf, sepetlele. O ne a utloisisa ’me o ile a re tiisetsa hore o tla etsa sohle se ka khonehang ho phekola Vicky ntle ho tšelo ea mali. Le haeba tekanyo ea lisele tsa mali a hae e ne e ka theohela ho 5 g/dl, o ne a ikemiselitse ho tsoela pele ho mo phekola ntle ho tšelo ea mali. O ile a boela a bolela hore ho fumana kapele hore na Vicky o tšoeroe ke eng le ho nka khato e potlakileng ea ho mo isa moo, li fane ka monyetla o motle oa hore a phekoloe ka katleho. O ile a bolela hore Vicky ke oa pele ea tšoeroeng ke boloetse bona eo a tla mo phekola ka lik’hemik’hale ntle ho tšelo ea mali. Re ile ra leboha haholo ’me ra khahloa ke sebete sa Dr. Graf le boikemisetso ba hae ba ho thusa.

Mathata a Lichelete

Joale potso e ne e le ho re, Na re tla lefella phekolo ea Vicky joang? Re ile ra tsieleha ha re tsebisoa hore phekolo ea lilemo tse peli e ne e ka ’na ea fihla ho li-deutsche mark tse 150 000 (R520 000). Ho hang re ne re se na chelete e kaalo, empa ho ne ho hlokahala hore Vicky a qale ho phekoloa hang-hang. Kaha re ne re tlohile Sweden ho tla batla phekolo Jeremane, re ne re se na tokelo ea ho fumana inshorense ea sechaba ea bophelo ea mofuta ofe kapa ofe. Re ne re le moo le ngoananyana oa rōna ea kulang haholo ’me ngaka ea setsebi e loketse ho thusa, empa re se na chelete e lekaneng.

Sepetlele se ile sa re ntša bothateng ’me sa re bolella hore se ka qala ho mo phekola hang-hang ha re ka beheletsa ka li-mark tse 20 000 (R70 000) eaba re se kholisa ka ho saena hore re tla lefa chelete e setseng. Re ne re e-na le cheletenyana eo re e bolokileng, ’me ka thuso e lerato ea metsoalle le beng ka rōna, re ile ra khona ho lefa li-mark tse 20 000 (R70 000)—empa ho ne ho tla etsahala joang ka e setseng?

Re ile ra boela ra hopotsoa hore ha rea lahloa kherehloa ntoeng ea rōna ea tumelo. Ka nako eo re ne re sa tsebe hore ho na le mor’abo rōna oa moea ea ikemiselitseng ho lefa chelete e setseng. Leha ho le joalo, ha hoa ka ha hlokahala hore re sebelise mpho ea hae ea seatla se bulehileng, kaha re ne re khona ho etsa litokisetso tse ling.

Lingaka Tsa Litsebi Lia Sebetsa

Lingaka li ile tsa qala ho phekola ka lik’hemik’hale. Ho ile ha feta matsatsi le libeke. Ka linako tse ling ho ne ho le thata haholo ebile ho le boima ho ngoananyana oa rōna le ho rōna. Ka lehlakoreng le leng, re ne re thaba haholo le ho leboha nako le nako ha a bontša ho ntlafala. O ile a phekoloa ka lik’hemik’hale ka likhoeli tse robeli. Tekanyo ea lisele tsa mali e tlaase-tlaase eo Vicky a ileng a ba le eona e ne e le 6 g/dl, ’me Dr. Graf o ile a boloka tšepiso ea hae.

Ho se ho fetile lilemo tse fetang tse tšeletseng, ’me tlhahlobo ea ho qetela ea lero la lesapo la mokokotlo oa hae ha e bontše kankere. Hona joale ke ngoanana ea thabileng ea sa bontšeng matšoao a boloetse boo. E, ekare ke mohlolo hore ebe Vicky o folile ka ho feletseng. Rea hlokomela hore bana ba bangata ba nang le boloetse bona ba shoa ho sa tsotellehe ho phekoloa ka lik’hemik’hale le tšelo ea mali.

Re hlōtse ntoa ea rōna ea tumelo, empa e le ka thuso ea beng ka rōna, bara le barali babo rōna ba Bakreste le lingaka tsa litsebi. Lefapha la Boitsebiso bo Mabapi le Lipetlele le ne le re tšehelitse bosiu le motšehare. Dr. Graf le basebetsi-’moho le eena ba ile ba sebelisa bokhoni ba bona ho thusa Vicky hore a fole. Sena sohle re se leboha e le kannete.

Tumelo ea Rōna e Matlafalitsoe

Ka holimo ho tsena tsohle, re leboha Molimo oa rōna, Jehova, ka tlhokomelo ea hae e lerato le matla ao re a fumaneng ka Lentsoe la hae, Bibele. Ha re hetla morao, re hlokomela kamoo re ithutileng ho hongata kateng le kamoo ketsahalo ena e bohloko bophelong ba rōna, e bileng e matlafatsang tumelo.

Hona joale takatso ea rōna e tlohang botebong ba pelo ke ho boloka kamano ea rōna e haufi-ufi le Jehova Molimo le ho ruta morali oa rōna bohlokoa ba ho phela bophelo bo lumellanang le seo A se hlokang. Ha ho pelaelo hore re batla ho mo fa lefa le letle la moea la bophelo bo sa feleng Paradeiseng e tlang mona lefatšeng.—Se Nehelanoe.

[Mongolo o botlaaseng ba leqephe]