Karolo 16
Mesia oa Fihla
Jehova o tsebahatsa hore Jesu oa Nazaretha ke Mesia eo e leng khale a tšepisitsoe
NA Jehova o ne a tla thusa batho hore ba tsebe Mesia eo ea tšepisitsoeng? Ka sebele o ne a tla etsa joalo. Hlokomela seo a ileng a se etsa lilemo tse ka bang makholo a mane ka mor’a hore ho ngoloe Mangolo a Seheberu. Motseng oa Nazaretha o karolong e ka leboea ea Galilea, moroetsana ea bitsoang Maria o ile a eteloa ke motho ea sa mo lebellang ho hang. Lengeloi le bitsoang Gabriele le ile la fihla ho eena ’me la mo bolella hore Jehova o tla sebelisa matla a hae, e leng moea o halalelang ho etsa hore a tsoale mora, le hoja e ne e le moroetsana. Mora enoa e ne e tla ba Morena eo e leng khale a tšepisitsoe, ea neng a tla busa ka ho sa feleng! Ngoana enoa e ne e tla ba Mora oa Molimo, ’me Molimo o ne a tla mo tlosa maholimong ebe o etsa hore a hōlele pōpelong ea Maria.
Ka boikokobetso, Maria o ile a lumela hore a sebelisoe ka tsela eo e hlomphehang. O ne a lebelelitsoe ke ’metli ea bitsoang Josefa, ’me o ile a mo nyala ka mor’a hore lengeloi le mo kholise hore na ho tlile joang hore Maria a ime. Empa na boprofeta bo reng Mesia o tla tsoalloa Bethlehema bo ile ba phethahala? (Mikea 5:2) Motsana oo o ne o le lik’hilomithara tse ka bang 140 ho tloha Nazaretha.
’Musi oa Roma o ile a laela hore ho baloe sechaba. Motho e mong le e mong o ne a lokela ho ea ngolisoa motseng oa habo. Ho bonahala eka ha habo Josefa le Maria eo e neng e le moimana e ne e le Bethlehema, kahoo, ba ile ba leba teng. (Luka 2:3) Maria o ile a belehela setaleng, e leng sebaka sa boemo bo tlaase, eaba o robatsa ngoana ka sejelong. Ka mor’a moo, Molimo o ile a romela letšoele la mangeloi ho ea bolella balisa ba leralleng hore ngoana ea sa tsoa tsoaloa ke Mesia ea tšepisitsoeng, kapa Kreste.
Hamorao, ba bang le bona ba ile ba paka hore Jesu ke Mesia ea tšepisitsoeng. Moprofeta Esaia o ne a profetile hore ho ne ho tla hlaha motho ea neng a tla hleka tsela bakeng sa mosebetsi oa bohlokoa oa Mesia. (Esaia 40:3) Motho eo e ne e le Johanne Mokolobetsi. Ha a bona Jesu, o ile a re: “Bonang, Konyana ea Molimo e tlosang sebe sa lefatše!” Barutuoa ba bang ba Johanne ba ile ba latela Jesu hang-hang. E mong oa bona o ile a re: “Re fumane Mesia.”—Johanne 1:29, 36, 41.
Ho ile ha e-ba le bopaki bo eketsehileng. Ha Johanne a kolobetsa Jesu, Jehova o ile a bua a le leholimong. O ile a tlotsa Jesu ka moea o halalelang hore e be Mesia, eaba o re: “Enoa ke Mora oa ka, ea ratoang, eo ke mo amohetseng.” (Matheu 3:16, 17) Mesia eo e leng khale a tšepisitsoe o ne a fihlile!
See se etsahetse neng? Se etsahetse ka selemo sa 29 C.E., hantle feela ha ho fela lilemo tse 483 tseo Daniele a buileng ka tsona esale pele. Ka sebele bona ke karolo ea bopaki bo ke keng ba latoloa ba hore Jesu ke Mesia, kapa Kreste. Empa o ne a tla phatlalatsa molaetsa ofe ha a le lefatšeng?
—E thehiloe ho Matheu khaolo ea 1 ho ea ho 3; Mareka khaolo ea 1; Luka khaolo ea 2; Johanne khaolo ea 1.
◼ Jehova o ile a laela mangeloi hore a etse’ng ho tsebahatsa hore Jesu ke Mesia?
◼ Ke ka tsela efe Jehova a ileng a etsa hore Johanne Mokolobetsi a bontše hore Jesu ke Mesia?
◼ Jehova o ile a re’ng e ileng ea bontša hore Mora oa hae ke Mesia?
[Lebokose le leqepheng la 19]
HO BOLELOA’NG HA HO THOE KE MOR’A MOLIMO?
Molimo ke Ntate oa Jesu—empa eseng ka tsela e tšoanang le eo banna e bang bo-ntate ka eona. Jesu ha aa emoloa ka hore monna le mosali ba kopane—o bōpiloe ke Molimo ka ho toba. Ha e le hantle, ke eena motho oa pele ea bōpiloeng ke Molimo. (Bakolose 1:15-17) Molimo o bitsoa Ntate oa Jesu hobane ke eena ea mo bōpileng. Ka mor’a hore a bōpe Mora enoa oa moea, o ile a mo sebelisa e le “mosebetsi ea hloahloa” hore a bōpe lintho tse ling tsohle, ho akarelletsa le leholimo le lefatše.—Liproverbia 8:30.
[Chate e leqepheng la 19]
Genese
Exoda
Levitike
Numere
Deuteronoma
Joshua
Baahloli
Ruthe
1 Samuele
2 Samuele
1 Marena
2 Marena
1 Likronike
2 Likronike
Esdrase
Nehemia
Esthere
Jobo
Lipesaleme
Liproverbia
Moeklesia
Sefela sa Lifela
Esaia
Jeremia
Lillo Tsa Jeremia
Ezekiele
Daniele
Hosea
Joele
Amose
Obadia
Jonase
Mikea
Nahume
Habakuke
Sofonia
Hagai
Zakaria
Malakia
Matheu ●
Mareka ●
Luka ●
Johanne ●
Liketso
Baroma
1 Bakorinthe
2 Bakorinthe
Bagalata
Baefese
Bafilipi
Bakolose
1 Bathesalonika