Bacha Baa Botsa . . .

Nka Tsoela Pele Joang Moeeng?

“Ha ke ne ke ea kerekeng, ke ne ke hlile keferekane. Ke ne ke sa utloisise seo ba neng ba leka ho se bolelajoale ka khaotsa ho ea kerekeng. Ha ke nahane hore u lokela ho ba oa bolumeli bo bong bo itseng hore u tle u lumele ho Molimo.”—Carrie ea lilemo li 17.

KE HOBANEˈNG ha bacha ba bangata ha-kaale ba tenoa ke kereke? Phuputsong e neng e tsamaisoa ke mofuputsi George Gallup, bacha ba ile ba fana ka mabaka a latelang: ‘Lithuto lia tena.’ ‘Ha li rute ka Molimo kapa Bibele.’ ‘Ka mehla ba batla chelete.’ ‘Likereke le ba li kenang ha ba phelele seo ba se bolelang.’ Ka ho hlakileng, likereke li hlōlehile ho matlafatsa bomoea ba bacha.

Empa na u batla hore “u hape bophelo bo sa feleng”? (1 Timothea 6:12) Na u batla ho hlomphuoa joaloka Mokreste ea hōlileng, ea ka tšepeloang boikarabelo? Na u batla tokelo ea ho ba e mong oa “basebetsiˈmoho le Molimo” ho thusa ba bang ho fumana bophelo bo sa feleng? (1 Ba-Korinthe 3:9, NW) Joale u lokela ho tsoela pele moeeng! Ka ho kopanela le Lipaki tsa Jehova, u thabela melemo eo bacha ba Bokreste-ˈmōtoana ba se nang eona. U ba teng libokeng Holong ea ˈMuso, moo ho fanoang ka taeo e matla ea Bibele. U fumana tlhokomelo ea botho ho batsoali ba hao ka thuto ea lehae ea Bibele. Ka mehla u kopanela le batho bao ka tieo ba lekang ho sebelisa Bibele bophelong ba bona. Leha ho le joalo, hore u tsoele-pele moeeng, ho hlokahala ho hongata ho feta. Joalokaha moapostola Petrose a hlalosa, u lokela ho etsa “boiteko bohle bo tiileng.” (2 Petrose 1:5, NW) Ha re boneng se kopanyelletsoang ho etsa seo.

Hlaolela Takatso ea Moea

Jesu o itse: “Ho thabile ba elang hloko tlhoko ea bona ea moea.” (Mattheu 5:3, NW) Ha e le hantle, Segerikeng sa pele, polelo ena e ne e lebisitsoe ho “bao e leng mekopa-kopa ea moea.” Joaloka mokōpi ea lahliloeng kherehloa eo ka ho utloisang bohloko a elang hloko tlhoko ea hao ea lijo tsa nama, u tlameha ho ela hloko tlhoko ea hae ea lijo tsa moea. Jesu o itse: “ˈMe bophelo bo sa feleng ke hore ba u tsebe, uena Molimo o ˈnotši oa ˈnete, le Jesu Kreste .. .”—Johanne 17:3.

Bacha ba bangata ba etsa ho fokolang ho khotsofatsa tlhoko ea bona ea moea. Buka The Psychology of Adolescence e re ka mocha ea tloaelehileng: “Mohlompng tsebo ea hae ka tumelo ea bolumeli ea fokola, le hoja kameho ea hae ka bolumeli le thahasello ea hae ka bona li hlile li phahame.” Phuputsong e ˈngoe sehlopha sa bacha se ile sa botsoa lipotso tse lekholo ka Bibele. Mocha ea tloaelehileng o ne a tseba ho araba lipotso tse 17 feela. Phuputsong e ˈngoe, bacha ba supileng ho ba leshome ba ne ba sa tsebe libuka tse ˈnè tsa Litaba se Molemo tsa Tšebeletso ea Kreste.

Ho thoeˈng ka uena? U ithutile Bibele ka tieo ho isa bohōleng bofe? Na u ka tiisa hore lithuto tsa bohata, tse kang Boraro-bo-bong le ho se shoe ha sephefumolohi li fosahetse? Na u ka tiisa ka Mangolo hore ho na le tšepo ea bophelo bo sa feleng maholimong le lefatšeng? Na u ka bontša hore re phetse “mehleng ea qetello” ho tloha ka 1914? (2 Timothea 3:1-5) Kapa na u “hloka motho e mong ho u ruta ho tloha qalong lintho tsa motheo tsa lipolelo tse halalelang tsa Molimo”?—Ba-Heberu 5:12, NW.

Haeba ho joalo, u hloka ho ˈlapela lebese la moea, le sa tsoakoang, u tle u hōlele poloko ke lona.ˈ (1 Petrose 2:2) Ho ka hloka matla a maholo qalong. Empa ha u ithuta Lentsoe la Molimo haholoanyane, takatso ea hao ea lintho tsa moea e tla eketseha haholo.

Lipelaelo tse Khathatsang

Kevin ea lilemo li 19 o itse: “Kannete ha ke tsebe moo ke emeng teng bolumeling hona joale. Sena sohle sea mpherekanya.” Bacha ba bangata ba Bokreste-ˈmōtoana ba ikutloa ka tsela ena. Empa na ho ka etsahala hore ebe tsoelo-pele ea hao ea moea ka ho tšoanang e sitisoa ke lipelaelo tse khathatsang?

Ka mohlala, na u kholisehile ka ho felletseng hore ho phela ka litekanyetso tsa Bibele tsa boitšoaro ke tsela e molemo ea ho phela? Kapa na u fumana hore u ˈhonohela batho ba khopoˈ? (Pesaleme ea 73:3, NW) Na u kholisehile pelong hore re phela mehleng ea bofelo? Kapa na u chesehela mosebetsi o itseng tsamaisong ee ea lintho? Na u kholisehile hore Bibele ke Lentsoe la Molimo le bululetsoeng? Kapa na ka linako tse ling oa ipotsa hore ebe e lumellana le likhopolo tsa saense? Haeba u khathatsoa ke lipelaelo, hopola seo Bibele e se bolelang ho Jakobo 1:6: “Feela, a kōpe ka tumelo, a se ke a lika-lika; hobane motho ea lika-likang o joale ka leqhubu la leoatle le tsuku-tloang, le akheloang hohle ke moea.” Lipelaelo mabapi le tumelo ea motho li ka boela tsa bapisoa le masoba sekepeng. Ha masoba a le maholo haholoanyane, ho bonolo hore sekepe seo se tebe.

Na sena se bolela hore tumelo ea hao e tla tloha e “teba” haeba ka makhetlo u ba le lipotso tse sa rarolleheng? Che ha ho joalo. Empa haeba u na le lipelaelo tse khathatsang, u lokela ho sebetsa ka matla ho li rarolla. Ka mohlala, haeba u na le lipelaelo ka ho reka borikhoe bo bocha, na u ne u ke ke ua bo hlahloba ka hloko, o lekole moetso oa bona, boleng ba lesela, le theko pele u etsa qeto? Ka ho tšoanang, lipelaelo tse ngata tse loketseng li ka rarolloa ka ho hlahloba Bibele ka hloko kapa ka ho buisana le Mokreste ea hōlileng ea nang le tsebo.a Liproverbia 15:14 e re: “Pelo ea motho ea masene e sela tsebo.”

Ho Beha Lipakane tsa Moea

Moapostola Pauluse o ile a bolella Timothea e mocha: “Hlokomela taba tseo, ˈme u be ho tsona; ho tsoela pele ha hao ho ˈne ho lemohuoe ke bohle.” Leha ho le joalo, hlokomela hore Pauluse ha a ka a imetsa Timothea ka lipakane tseo eseng tsa sebele tse phahameng, tse ke keng tsa finyelloa. O ile a neha Timothea lipakane tsa sebele tseo a ka sebeletsang ho tsona: “Empa e be uena u etsetsang balumeli mehlala ea lipolelo, ea metsamao, ea lerato, ea tumelo le ea hloeko.”—1 Timothea 4:12-15.

Joaloka Timothea, ho hlokahala hore u be le lipakane tsa sebele tsa moea le tse ka finyelloang habonolo. Ka mohlala, nahana u batla ho etsa qeto ea ho ithuta ho pheha. E ne e tla ba ho hamela letanteng ho hokaakang ho leka ho ba sephehi se hloahloa ka ho panya ha leihlo! Leha ho le joalo, u ka nepa mohato o le mong oa ho pheha ka nako e le ˈngoe—mohlomong ho ithuta pele ho pheha meroho ˈme ebe joale u pheha nama, bohobe, lijo tse halikoang, kapa lijo tse tsoekere tse jeoang ka morˈa lijo. Ka ho tšoanang, u ka finyella pakane ea hao ea nako e telele ea khōlo ea moea habonolo haeba u e atamela ka lipakane kapa mehato e kenellang lipakeng. Lintho tsena li ka sebetsa joaloka matšoao a tsoelo-pele ea hao ea moea. Nako le nako ha u qeta mohato ka katleho, u matlafatsa boikutlo ba hao ba ho itšepa. Sena se ka u susumelletsa ho phehella mohato o latelang.

Ho Finyella Lipakane tsa Hao

Ha re hlahlobeng lipakane tse ling tseo u ka li behang. Ka mohlala, na u kile oa bala Bibele kaofela? E, Bibele ke buka e khōlō, empa ke hobaneˈng u sa e arole likarolo tse nyenyane hore u tsebe ho e bala? (Motho ea tloaelehileng oa United States o ja lijo tse fetang likˈhilograma tse 640 selemo le selemo. Empa ke mang ea ka lekang ho li ja ka nako e le ˈngoe?) Baberea ba “khabane” ˈba ile ba hlahlobisisa Mangolo ka hloko ka mehla.ˈ (Liketso 17:11, NW) Haeba u latela kemiso ea ka mehla ea ho bala metsotso e 15 feela ka letsatsi—e leng nako e ka nkoang ho mamela lipina tse hlano tse tsebahalang seea-le-moeeng—u ka qeta ho bala Bibele pele selemo se fela.

U ka ipehela pakane ea ho bala tokollo e ˈngoe le e ˈngoe ea limakasine tsa Molula-Qhooa le Tsoha! Boitsebiso bo botle bo ka harˈa tsona bo tla potlakisa tsoelo-pele ea hao moeeng. U ka ˈna ua ho etsa pakane ea hao ho emela phutheho ea Lipaki tsa Jehova joaloka mohoeletsi ea sa kolobetsoang haeba u e-sˈo be eena hona joale. Sena se tla kopanyelletsa ho kopanela ka mehla mosebetsing oa ho bolela ka ntlo le ntlo le ho tlaleha tšebeletso e joalo khoeli e ˈngoe le e ˈngoe. U ka buisana ka hore ke joang u ka tšoanelehang bakeng sa tokelo ena le batsoali ba hao kapa baholo ba phutheho ea heno.

Lipakane tse ling tsa moea tse ka finyelloang ke life? Ho ba bohlale le ho hōla monahanong. (Ba-Heberu 5:14) Ho hlaolela tholoana e ˈngoe le e ˈngoe ea moea. (Ba-Galata 5:22, 23) Ho ntlafatsa boleng ba lithapelo tsa hao. (Ba-Filippi 4:6) Ho bontša tlhompho e eketsehileng bakeng sa bohlooho ba batsoali ba hao. (Ba-Efese 6:1) Ho ba ea koetlisehileng haholoanyane bakeng sa ho sireletsa tumelo ea hao. (1 Petrose 3:15) Lipakane tsena li bonolo ˈme li ka finyelloa.

Leha ho le joalo, hopola hore ha hoa lekana ho beha lipakane. U tšoanetse ho li khomarela! Ho joaloka tona-khōlō ea pele ea Brithani Benjamin Disraeli a boletse: “Lekunutu la katleho le tiisoa ke botšepehi.” E, hlaolela takatso ea moea. Beha lipakane tsa moea tse nepahetseng. Bontša tieo ka ho li khomarela. Phello e tla ba tsoelo pele moeeng.b

[Mongolo o botlaaseng ba leqephe]

[Setšoantšo se leqepheng la 23]

Ho behella ka thōko metsotso e seng mekae ea ho bala Bibele letsatsi le leng le le leng ke tsela e ˈngoe ea ho hōlisa tsoelo-pele ea hao ea moea