Tsoelang Pele ho Tsamaea Kamoo Jesu Kreste a Ileng a Tsamaea Kateng
“Ea reng o lula bonngoeng le [Molimo] o tlamehile hore a tsoele pele ho tsamaea feela joalokaha eo [Jesu] a ile a tsamaea.”—1 JOHANNE 2:6.
1, 2. Ho talima Jesu ka hloko ho akarelletsa eng?
MOAPOSTOLA Pauluse o ile a ngola a re: “A re matheng ka mamello peisong e behiloeng ka pel’a rōna, ha re ntse re talimile ka hloko Moemeli ea ka Sehloohong le Mophethahatsi oa tumelo ea rōna, Jesu.” (Baheberu 12:1, 2) E le hore re tsamaee ka botšepehi, re lokela ho talima Jesu Kreste ka hloko.
2 Lentsoe la puo ea pele le bolelang “talimile ka hloko,” joalokaha le sebelisitsoe Mangolong a Segerike a Bakreste le bolela “ho tsepamisa kelello,” “ho hlokomoloha ntho e itseng e le hore u bone e ’ngoe” “ho tsepamisa mahlo nthong e itseng.” Buka e ’ngoe ea boitsebiso e re: “Hang feela ha semathi sa Mogerike se ka lebaleng la lipapali se ne se tlosa mahlo moleng oo se mathang ho oona le kholeng eo se habileng ho eona, ’me se talima matšoele, lebelo la sona le ne le fokotseha. Ho joalo le ka Mokreste.” Lintho tse faposang kelello li ka re sitisa ho hōla moeeng. Re lokela ho talima Jesu Kreste ka hloko. Re talima eng ho Moemeli eo ea ka Sehloohong? Lentsoe la Segerike le fetoletsoeng e le “moemeli ea ka sehloohong” le bolela “moeta-pele ea ka sehloohong, ea etellang pele nthong e ’ngoe le e ’ngoe ’me kahoo e le ea behang mohlala.” E le hore re talime Jesu ka hloko, ho hlokahala hore re latele mohlala oa hae.
3, 4. (a) Ho hlokahala hore re etse eng e le hore re tsamaee kamoo Jesu Kreste a ileng a tsamaea kateng? (b) Ke lipotso life tseo re lokelang ho li ela hloko?
3 Bibele e re: “Ea reng o lula bonngoeng le [Molimo] o tlamehile hore a tsoele pele ho tsamaea feela joalokaha eo [Jesu] a ile a tsamaea.” (1 Johanne 2:6) Re lokela ho lula bonngoeng le Molimo ka ho boloka litaelo tsa Jesu feela joalokaha le eena a ile a boloka litaelo tsa Ntat’ae.—Johanne 15:10.
4 Kahoo, e le hore re tsamaee kamoo Jesu a ileng a tsamaea kateng ho hlokahala hore re mo talime ka hloko joaloka Moeta-pele ea ka Sehloohong ’me re latele mehato ea hae haufi-ufi. Lipotso tsa bohlokoa tseo re lokelang ho nahana ka tsona tabeng ena ke tse latelang: Kreste o re etella pele joang kajeno? Ho etsisa mokhoa oo a ileng a tsamaea ka oona ho lokela ho re ama joang? Ho khomarela mohlala o behiloeng ke Jesu Kreste ho tlisa melemo efe?
Kamoo Kreste a Etellang Pele Balateli ba Hae Kateng
5. Pele Jesu a nyolohela leholimong, o ile a tšepisa balateli ba hae eng?
5 Pele a nyolohela leholimong, Jesu Kreste ea tsositsoeng o ile a itlhahisa ho barutuoa ba hae eaba o ba abela mosebetsi oa bohlokoa. O ile a re: “E-eang ’me le etse batho ba lichaba tsohle barutuoa.” Ka nako eo Moeta-pele enoa ea ka Sehloohong o ile a boela a ba tšepisa hore o tla ba le bona ha ba ntse ba etsa mosebetsi ona, a re: “Bonang! ke na le lōna ka matsatsi ’ohle ho fihlela qetellong ea tsamaiso ea lintho.” (Matheu 28:19, 20) Jesu Kreste o na le balateli ba hae ka tsela efe nakong ee ea qetello ea tsamaiso ea lintho?
6, 7. Jesu o re etella pele joang ka moea o halalelang?
6 Jesu o itse: “Mothusi, moea o halalelang, oo Ntate a tla o romela ka lebitso la ka, o tla le ruta lintho tsohle ’me a le hopotse lintho tsohle tseo ke le boleletseng tsona.” (Johanne 14:26) Moea o halalelang, o rometsoeng ka lebitso la Jesu, oa re tataisa ebile oa re matlafatsa kajeno. O re fa kutloisiso ea moea ebile o re thusa ho utloisisa “esita le lintho tse tebileng tsa Molimo.” (1 Bakorinthe 2:10) Ho feta moo, litšobotsi tsa bomolimo e leng “lerato, thabo, khotso, tiisetso, mosa, molemo, tumelo, bonolo, boitšoaro” ke “litholoana tsa moea.” (Bagalata 5:22, 23) Moea o halalelang o ka re thusa hore re be le litšobotsi tsena.
7 Ha re ntse re ithuta Mangolo le ho loanela ho sebelisa seo re ithutang sona, moea oa Jehova o re thusa hore re eketse bohlale, temoho, kutloisiso, tsebo, matla a ho nahana le ho ntlafatsa litsela tseo re ahlolang litaba ka tsona. (Liproverbia 2:1-11) Moea o halalelang o boetse o re thusa ho mamella liteko. (1 Bakorinthe 10:13; 2 Bakorinthe 4:7; Bafilipi 4:13) Bakreste ba eletsoa hore ba ‘itlhatsoe litšila tsohle tsa nama le tsa moea, ba bile ba ntse ba phethahatsa khalalelo.’ (2 Bakorinthe 7:1) Na ruri re ka phela tumellanong le seo Molimo a se hlokang tabeng ea khalalelo, kapa ea bohloeki ka ntle ho thuso ea moea o halalelang? Ntho e ’ngoe eo Jesu a re tataisang ka eona kajeno ke moea o halalelang, oo Jehova Molimo a o behileng taolong ea Mora oa hae.—Matheu 28:18.
8, 9. Kreste o sebelisa “lekhoba le tšepahalang le le masene” joang ho etella pele?
8 Nahana ka ntho e ’ngoe eo Kreste a etellang pele phutheho ka eona kajeno. Ha Jesu a bua ka ho ba teng ha hae le ka qetello ea tsamaiso ea lintho, o itse: “Ha e le hantle ke mang eo e leng lekhoba le tšepahalang le le masene leo mong’a lona a le behileng hore le okamele bahlanka ba hae ba ntlo, ho ba fa lijo tsa bona ka nako e tšoanetseng? Ho thaba lekhoba leo haeba mong’a lona ha a fihla a le fumana le etsa joalo! Kannete ke re ho lōna, O tla le beha hore le okamele lintho tsohle tsa hae.”—Matheu 24:3, 45-47.
9 ‘Monghali’ ke Jesu Kreste. “Lekhoba” ke sehlopha sa Bakreste ba tlotsitsoeng ba leng lefatšeng. Sehlopha sena sa lekhoba se filoe boikarabelo ba ho hlokomela lintho tsohle tsa Jesu tse lefatšeng le ho fana ka lijo tsa moea ka nako e tšoanetseng. Sehlopha se Busang, se emelang sehlopha sa lekhoba, se entsoe ka sehlopha se senyenyane sa balebeli ba tšoanelehang bao e leng karolo ea “lekhoba le tšepahalang le le masene” le entsoeng ka litho tse ngata. Se tsamaisa mosebetsi oa ho bolela ka ’Muso lefatšeng ka bophara le oa ho fana ka lijo tsa moea ka nako e tšoanetseng. Kahoo, Kreste o etella phutheho pele ka “lekhoba le tšepahalang le le masene” le Sehlopha sa lona se Busang.
10. Re lokela ho ba le boikutlo bofe ka baholo, hona hobane’ng?
10 Ntho e ’ngoe hape e bontšang hore Kreste o etella pele ke “limpho tseo e leng banna”—e leng baholo ba Bakreste, kapa balebeli. Ba fanoe “ka sepheo sa ho khutlisetsa bahalaleli tseleng, bakeng sa mosebetsi oa bosebeletsi, bakeng sa ho haha ’mele oa Kreste.” (Baefese 4:8, 11, 12) Baheberu 13:7 e re ka bona: “Hopolang ba etellang pele har’a lōna, ba le boleletseng lentsoe la Molimo, ’me ha le ntse le nahanisisa kamoo boitšoaro ba bona bo fellang kateng le etsise tumelo ea bona.” Baholo ba etella pele ka phuthehong. Kaha ba etsisa Kreste Jesu, re lokela ho etsisa tumelo ea bona. (1 Bakorinthe 11:1) Re ka bontša hore re ananela tokisetso ena ea baholo ka ho mamela le ho ikokobelletsa ‘limpho tsena tseo e leng banna.’—Baheberu 13:17.
11. Kajeno Kreste o etella pele balateli ba hae ka litsela life, hona ho tsamaea kamoo a ileng a tsamaea kateng ho akarelletsa eng?
11 Ha ho pelaelo hore kajeno Jesu Kreste o etella pele balateli ba hae ka moea o halalelang, ka “lekhoba le tšepahalang le le masene” le ka baholo ba phutheho. E le hore re tsamaee kamoo Kreste a ileng a tsamaea kateng re lokela ho utloisisa tsela eo a etellang pele ka eona ’me re e latele. Ho boetse ho hlokahala hore re etsise tsela eo a ileng a tsamaea ka eona. Moapostola Petrose o ile a ngola a re: “Le bitselitsoe tsela ena, hobane esita le Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi.” (1 Petrose 2:21) Ho latela mohlala o phethahetseng oa Jesu ho lokela ho re ama joang?
E-ba le Kahlolo e Molemo ha U Sebelisa Matla
12. Ke karolo efe ea mohlala oa Kreste eo e leng ea bohlokoa ka ho khetheha ho baholo ka phuthehong?
12 Le hoja Ntat’ae a ne a mo file matla a fetang a motho leha e le ofe, Jesu o ne a a sebelisa ka tsela e bontšang hore o na le kahlolo e molemo. Bohle ka phuthehong—haholo-holo balebeli—ba lokela ho etsa hore ‘ho ba le kahlolo e molemo ha bona ho tsejoe ke batho bohle.’ (Bafilipi 4:5; 1 Timothea 3:2, 3) Kaha baholo ba na le matla a itseng ka phuthehong, ke habohlokoa hore ba latele mehato ea Kreste ha ba a sebelisa.
13, 14. Baholo ba ka etsisa Kreste joang ha ba khothalletsa ba bang ho sebeletsa Molimo?
13 Jesu o ne a nahanela barutuoa ba hae. O ne a sa batle se fetang seo ba neng ba ka khona ho se etsa. (Johanne 16:12) Jesu ha aa ka a hatella balateli ba hae empa o ile a ba khothalletsa hore ba ‘ikitlaetse ka matla’ ho etsa thato ea Molimo. (Luka 13:24) O entse sena ka ho etella pele le ka ho susumetsa lipelo tsa bona. Ka ho tšoanang, baholo ba Bakreste kajeno ha ba tšose ba bang hore ba sebeletse Molimo ka ho ba etsa hore ba ikutloe ba le molato. Ho e-na le hoo, ba ba khothalletsa ho sebeletsa Jehova hobane ba mo rata ebile ba rata Jesu le batho ba bang.—Matheu 22:37-39.
14 Jesu ha aa ka a sebelisa hampe matla ao a a filoeng ka ho laola bophelo ba batho. Ebile ha aa ka a beha melao eo ho leng thata ho e finyella kapa e mengata haholo. E le hore a susumetse batho le ho finyella lipelo tsa bona, o ne a sebelisa melao-motheo ea melao e ileng ea fuoa sechaba ka Moshe. (Matheu 5:27, 28) Baholo ba etsisa Jesu Kreste ka ho qoba ho etsa melao e hatellang le e thehiloeng maikutlong a bona. Litabeng tsa moaparo le boitlhopho kapa tsa boithabiso, baholo ba leka ho finyella lipelo ka melao-motheo e fumanoang Lentsoeng la Molimo, e kang e boletsoeng ho Mikea 6:8; 1 Bakorinthe 10:31-33; le 1 Timothea 2:9, 10.
Bontšang Qenehelo le ho Tšoarela ba Bang
15. Jesu o ile a re’ng ha barutuoa ba hae ba ne ba entse liphoso?
15 Kreste o re sietse mohlala oa hore re latele tsela eo a neng a tšoara barutuoa ba hae ka eona ha ba ne ba etsa liphoso. Nahana ka liketsahalo tse peli tse ileng tsa etsahala bosiung ba hae ba ho qetela lefatšeng e le motho. Hoba a fihle Gethesemane, Jesu o ile “a nka Petrose le Jakobo le Johanne hore ba tsamaee le eena” eaba o ba bolella hore ba ‘lule ba lebetse.’ Joale, “ha a e-ea pejana a qala ho itihela fatše ’me a qala ho rapela.” Ha a khutla, o ile a “ba fumana ba robetse.” Jesu o ile a re’ng? O ile a re: “Ka ho hlakileng, moea o na le tabatabelo, empa nama ea fokola.” (Mareka 14:32-38) Ho e-na le ho khalemela Petrose, Jakobo le Johanne ka bohale, o ile a bontša qenehelo! Bosiung bona boo, Petrose o ile a latola Jesu ka makhetlo a mararo. (Mareka 14:66-72) Jesu o ile a tšoara Petrose joang ka mor’a hore see se etsahale? ‘Morena o ile a tsosoa ’me a bonahala ho Simone Petrose.’ (Luka 24:34) Bibele e re: “O ile a bonahala ho Kefase, ea ntan’o ba ho ba leshome le metso e ’meli.” (1 Bakorinthe 15:5) Ho e-na le ho mo halefela, Jesu o ile a tšoarela moapostola enoa ea bakileng a ba a mo matlafatsa. Hamorao, Jesu o ile a fa Petrose boikarabelo bo boholo.—Liketso 2:14; 8:14-17; 10:44, 45.
16. Ke joang re ka tsamaeang kamoo Jesu a ileng a tsamaea kateng ha balumeli-’moho le rōna ba re fosetsa kapa ba re tšoara ka leeme ka tsela e itseng?
16 Ha balumeli-’moho le rōna ba re fosetsa kapa ka tsela e itseng ba re tšoara ka leeme ka lebaka la ho se phethahale, na le rōna ha rea lokela ho ba qenehela le ho ba tšoarela joalokaha Jesu a entse? Petrose o ile a khothatsa balumeli-’moho le eena a re: “Kaofela ha lōna le be le kelello e joalo, le bontša ho utloelana bohloko, le e-na le boikutlo bo mofuthu ba bara ba motho, le e-na le qenehelo e bonolo, le ikokobelitse kelellong, le sa phetetse bobe ka bobe kapa ho hlapaola ka ho hlapaola, empa, ho fapana le hoo, le hlohonolofatsa.” (1 Petrose 3:8, 9) Re lokela ho etsa’ng ha motho e mong a sa re tšoare kamoo Jesu a neng a ka re tšoara kateng, a hana ho re qenehela kapa ho re tšoarela? Esita le boemong boo, re tlameha ho leka ho etsisa Jesu le ho etsa kamoo eena a neng a tla etsa kateng.—1 Johanne 3:16.
Etelletsa Pele Lintho Tse Amanang le ’Muso
17. Ke eng e bontšang hore ho etsa thato ea Molimo ho ne ho nka sebaka sa pele bophelong ba Jesu?
17 Ho sa na le tsela e ’ngoe hape eo ka eona re lokelang ho tsamaea kamoo Jesu Kreste a ileng a tsamaea kateng. Ho bolela litaba tse molemo tsa ’Muso oa Molimo e ne e le ntho ea bohlokoahali bophelong ba Jesu. Hoba Jesu a pakele mosali oa Mosamaria motseng oa Sikare oa Samaria, o ile a re ho barutuoa ba hae: “Lijo tsa ka ke hore ke etse thato ea ea nthomileng le hore ke qete mosebetsi oa hae.” (Johanne 4:34) Jesu o ile a matlafatsoa ke ho etsa thato ea Ntat’ae; e ne e mo phelisa hantle, e mo khotsofatsa ebile e mo khatholla joaloka lijo. Na ho etsisa Jesu ka ho lula re tsepamisitse mohopolo tabeng ea ho etsa thato ea Molimo ho ka etsa hore re phele bophelo bo bosula le bo sa khotsofatseng?
18. Ke litlhohonolofatso life tse bang teng ha bana ba khothalletsoa ho kenela tšebeletso ea nako e tletseng?
18 Ha batsoali ba khothalletsa bana ba bona ho kenela tšebeletso ea nako e tletseng, bona hammoho le bana ba bona ba fumana litlhohonolofatso tse ngata. Ntate e mong ea nang le bara ba mafahla o ile a ba khothalletsa ba sa le banyenyane haholo hore ba ipehele pakane ea bopula-maliboho. Ha bashemane bana ba qeta sekolo, e ile ea e-ba bo-pula-maliboho. Ha ntate oa bashemane bana a nahana kamoo sena se ileng sa mo thabisa kateng, o ile a ngola a re: “Bashemane ba rōna ha baa ka ba re soetsa. Ka motlotlo re re, ‘Bara ke lefa le tsoang ho Jehova.’” (Pesaleme ea 127:3) Bana ba rua molemo ofe ha ba kenela tšebeletso ea nako e tletseng? ’Mè e mong ea nang le bana ba bahlano o re: “Ho bula maliboho ho thusitse bana ba ka kaofela hore ba be le kamano e haufi haholo le Jehova, ho ntlafalitse mekhoa ea bona ea ho ithuta, ho ba thusitse ho ithuta ho sebelisa nako ea bona ka bohlale, ho boetse ho ba thusitse ho ithuta ho etelletsa pele lintho tsa moea bophelong ba bona. Le hoja kaofela ha bona ba ile ba tlameha ho etsa liphetoho tse ngata, ha ho le ea mong oa bona ea ikoahlaeang ka tsela eo a e khethileng.”
19. Ke lintho life tseo ho leng bohlale hore bacha ba nahane ka tsona ha ba rera bokamoso?
19 Bacha, le rerile ho etsa’ng ka bokamoso ba lōna? Na le batla ho itlhoma pele mosebetsing o itseng oa lefatše? Kapa na le hahamalla pakane ea ho kenela tšebeletso ea nako e tletseng? Pauluse o ile a fana ka keletso e latelang: “Le lule le lebetse ka tieo hore kamoo le tsamaeang kateng hase joaloka batho ba seng bohlale empa ke joaloka ba bohlale, le ithekele nako e loketseng, hobane matsatsi a khopo.” O ile a phaella ka ho re: “Ka lebaka lena khaotsang ho ba ba se nang kahlolo e molemo, empa le tsoele pele ho lemoha seo thato ea Jehova e leng sona.”—Baefese 5:15-17.
Tšepahala
20, 21. Jesu o ne a tšepahala joang, hona re ka etsisa botšepehi ba hae joang?
20 E le hore re tsamaee kamoo Jesu a ileng a tsamaea kateng, re lokela ho etsisa botšepehi ba hae. Ha Bibele e bua ka botšepehi ba Jesu e re: “Le hoja a ne a le teng ka sebōpeho sa Molimo, [ha aa ka] a nahana ho inkela ka mahahapa, e leng, hore o lokela ho lekana le Molimo. Che, empa o ile a ikhokhotha ’me a nka sebōpeho sa lekhoba ’me a tšoana le batho. Ho feta moo, ha a iphumana ka sebōpeho e le motho, o ile a ikokobetsa ’me a mamela ho isa lefung, e, lefu thupeng ea tlhokofatso.” Jesu o ile a tšehetsa bobusi ba Jehova ka hore ka botšepehi a etse thato ea Molimo ka boikokobetso. O ile a mamela ho isa lefung la ho khokhotheloa thupeng ea tlhokofatso. Re lokela ho “[boloka] boikutlo bona ba kelello” ’me ka botšepehi re etse thato ea Molimo ka boikokobetso.—Bafilipi 2:5-8.
21 Hape Jesu o ile a bontša barutuoa ba hae ba tšepahalang hore oa tšepahala. Ho sa tsotellehe mefokolo ea bona le ho se phethahale, Jesu o ile a ba rata “ho isa bofelong.” (Johanne 13:1) Le rōna ha rea lokela ho lumella hore mefokolo ea barab’abo rōna e etse hore re be batho ba ratang ho tšoaea-tšoaea liphoso.
Khomarela Mohlala oo Jesu a o Behileng
22, 23. Melemo ea ho khomarela mohlala o behiloeng ke Jesu ke efe?
22 Ke ’nete hore joaloka batho ba sa phethahalang, re ke ke ra tsamaea ka ho phethahetseng mehatong ea ’Mehi-mohlala oa rōna ea phethahetseng. Leha ho le joalo, re ka loanela ho latela mehato ea hae haufi-ufi. E le hore re etse sena ho hlokahala hore re utloisise tsela eo Kreste a etellang pele ka eona, re e latele re be re khomarele mohlala oo a re behetseng oona.
23 Ho etsisa Kreste ho tlisa melemo e mengata. Bophelo ba rōna bo ba le morero ebile boa khotsofatsa hobane re amehile ka ho etsa thato ea Molimo eseng ea rōna. (Johanne 5:30; 6:38) Re na le letsoalo le letle. Tsela eo re tsamaeang ka eona e behela ba bang mohlala. Jesu o ile a khothalletsa bohle ba neng ba sehla le ba neng ba imetsoe hore ba tle ho eena e le hore ba fumanele meea ea bona khatholoho. (Matheu 11:28-30) Haeba re latela mohlala oa Jesu, le rōna re tla khatholla batho bao re tloaelanang le bona. Kahoo, a re tsoeleng pele ho tsamaea kamoo Jesu a ileng a tsamaea kateng.
Na U sa Hopola?
• Kreste o etella pele balateli ba hae joang kajeno?
• Baholo ba ka etsisa Kreste joang ha ba sebelisa matla ao Molimo a ba fileng oona?
• Re ka latela mohlala oa Jesu joang ha ba bang ba re fosetsa?
• Bacha ba ka etelletsa pele lintho tse amanang le ’Muso joang?
[Setšoantšo se leqepheng la 23]
Baholo ba Bakreste ba re thusa ho latela boeta-pele ba Kreste
[Setšoantšo se leqepheng la 24, 25]
Bacha, le rerile ho etsa’ng e le hore bophelo ba lōna ba Bokreste e be bo khotsofatsang?