Jesu—Bophelo le Tšebeletso tsa Hae

Motho ea sa Lebelloang ho ba Morutuoa

KE PONO e tšosang hakaakang ha Jesu a fihla lebopong! Banna ba babeli ba befileng ka mokhoa o sa tloaelehang ba tsoa mabitleng a haufinyane ’me baa mo mathela. Ba tšoeroe ke bademona. Kaha ho bonahala hore e mong oa bona o befile haholo ho feta e mong, ’me o se a hlokofalitsoe ka nako e telele tlas’a taolo ea bademona ke eena eo ho lebisoang tlhokomelo ho eena.

Ka nako e telele monna enoa ea mesarelong o ’nile a lula a hlobotse mabitleng. Ka linako tsohle, bosiu le motšehare, oa bokolla ’me o itšeha ka majoe. O mabifi hoo ho seng motho ea nang le sebete sa ho tsamaea ka tsela eo. Ho entsoe boiteko ba ho mo tlama, empa o khaola mahlaahela likotoana ’me o khaola liketane maotong a hae. Ha ho motho ea nang le matla a ho mo thapisa.

Ha monna eo a atamela Jesu ’me a itihela maotong a hae, bademona ba mo laolang ba mo etsa hore a hoeletse: “Taba ea ka le uena ke’ng, Jesu, Mor’a Molimo o moholo-holo? Ke u antša ka Molimo, hore u se ke ua ntlhokofatsa.”

Jesu o tsoela pele hore: “Tsoa mothong eo, moea o litšila.” Empa joale Jesu oa botsa: “Lebitso la hao u mang?”

Karabelo ea re: “Lebitso la ka ke Legione; hobane re bangata.” Bademona ba thaba haholo ha ba bona masoabi a bao ba ba keneng, ’me ho bonahala ba nyakallela ho ba bokanela ba le bangata ka mokhoa o ba tšerehanyang. Empa ha ba tobane le Jesu, ba mo rapela hore a se ke a ba lelekela sekoting. Re boetse re bona matla a maholo ao Jesu a neng a e-na le ’ona a ho hlōla esitana le bademona ba khopo haholo. Hona ho boetse ho senola hore bademona baa tseba hore kahlolo ea ho qetela eo Molimo o ba boloketseng eona, ke ho liheloa sekoting ’moho le moetapele oa bona, Satane Diabolose.

Mohlape oa likolobe tse ka bang 2 000 o ntse o fula haufi thabeng. Joale bademona ba re: “U re romele likolobeng tseno, re kene ho tsona.” Ho totobetse hore bademona ba fumana thabo ea mofuta o mong oo e seng oa tlhaho le oa ho tlatlapa ba bang ka ho hlasela ’mele ea libōpuoa tsa nama. Ha Jesu a ba lumella ho kena mohlapeng oa likolobe, likolobe, tseo tse 2 000 kaofela li itihela selomong ’me li khangoa ke metsi leoatleng.

Ha balisa ba likolobe ba bona sena, ba potlakela ho ea tlaleha litaba motseng le mathokong a oona. Ha ba utloa tseo, batho baa tla ho tla bona se etsahetseng. Empa ha ba fihla, ba bona monna eo bademona ba tsoileng ho eena, ke eo o apere ’me o na le kelello e hlaphohileng, o lutse maotong a Jesu.

Lipaki tse boneng ka mahlo li tlalehela batho kamoo monna eo a folisitsoeng kateng. Li boetse li bolela ka lefu le sisimosang la likolobe. Ha ba utloa tsena, batho ba tšoha haholo, ’me ba phehella Jesu ka matla hore a tlohe naheng ea bona. O mamela kōpo ea bona ’me o kena seketsoaneng. Monna ea neng a na le bademona o phehella Jesu hore a mo lumelle ho tsamaea le eena. Empa Jesu o re ho eena: “E-ea hae, haeno, ho banab’eno, u ba tsebise tse kholo tseo Morena a u entseng tsona, kamoo a u utloetseng bohloko.”

Hangata Jesu o laela bao a ba folisitseng hore ba se ke ba bolella motho, kaha ha a batle hore batho ba fihlele liqeto ka baka la litlaleho tse susumetsang maikutlo. Empa mokhelo ona ke o loketseng hobane joale monna ea neng a e-na le bademona o tla be a paka har’a batho bao mohlomong Jesu a ke keng a hlola a fumana monyetla oa ho ba finyella. Ho feta moo, boteng ba monna eo bo tla fana ka bopaki ba matla a Jesu a ho etsa lintho tse molemo, le ho arabela tlaleho leha e le efe e mpe eo e ka bang e ile ea tsamaisoa ka baka la ho lahleheloa ke likolobe.

Tumellanong le taelo ea Jesu,monna ea neng a e-na le bademona oa tsamaea. O qala ho bolela ho pholletsa le Dekapolise eohle lintho tsohle tseo Jesu a mo etselitseng tsona, ’me batho baa hlolloa. Mattheu 8:28-34; Mareka 5:1-20; Luka 8:26-39; Tšenolo 20:1-3.

◆ Ka mohlomong, ke hobane’ng ha tlhokomelo e lebisoa ho monna a le mong ea tšoeroeng ke bademona empa ba ne ba le babeli?

◆ Ke’ng e bontšang hore bademona baa tseba hore ba tla liheloa sekoting ka nako e tlang?

◆ Kamoo ho bonahalang kateng, ke hobane’ng ha bademona ba rata ho kena ho batho le liphoofolo?

◆ Ke hobane’ng ha Jesu a etsa mokhelo ka monna ea neng a e-na le bademona pele, ka ho mo laela ho bolella ba bang ka tseo a mo etselitseng tsona?